Zawhna: Mipa, kum 30 mi ka ni a, Panic attack/disorder leh Anxiety disorder hi 2012 vel atang khan ka nei tan tawh a, Psychiatrist pawh ka rawn nasa tawh hle. Hetiang natna hian Depression te keimahah hian a thlen telin ka hria a, a theih reng em? Damdawi hmang loin engtianga inenkawl nge tha ang? Hetiang lampang natna a councellor rawn turte hi an awm em?

Chhanna: I zawhna hi Psychiatrist lam doctor te chhan awm tak a ni a, i rawn zawh takah chuan theih angin chhan ka han tum chhin ang e. Panic Attack/Disorder i rawn sawi hi Anxiety Disorder zinga mi a ni a, “panic” kan tih chuan chiai thut, hlauh nei thut ti tein sawi ta ila, “anxiety” hi chu vei/hlauhthawn nei tiin sawi ta bawk ila. Anxiety hi chu mihring tu pawhin kan nei vek awm e, exam dawn te, interview hmachhawn dawna huphurh taka awm hun lai dinhmun te hian a sawifiah thei bawk ang. Mahse, Anxiety Disorder-ah erawh chuan heng vei/hlauh/huphurh zawngte hi a nasa zual a, ni tin khawsak tibuai khawpin, pangngai taka awm thei lo khawpin mi a siam thei a ni. Rilru lam harsatna a ni a, a nasa zual tak tak phei chu hospital-a enkawl ngai khawpin an awm thei a ni.

Hetiang harsatna a lo lan chhuah dan tlangpui te chu: hlauh neih thut thut, vei/nuam tih lohna nei reng, mut harsat, kut ke thlan emaw vawt te, thaw chham emaw thaw kham lo anga inhriatna, lungphu rang, awm hle hle thei lo, ka chhung ro, luak chhuak, tihrawl hahdam thei lo vanga rawl titih reng te, luhai chiai chiai reng te a ni.

A lan dan a inang lo thei a, a then chu nasa takin a rawn lang chhuak a, bul hnaia awmte hriat theih khawpin a lang thei a, a thenah erawh chuan pawn lam lan dan pangngai hmel thlap si; mahse, a ruka nuam lo reng angte pawhin a awm thei bawk a ni.

A awm chhan hi mihring chak loh vang emaw, nungchangin a zir loh vang emaw, chhungkua lama fel lohna avang te a ni kher lo va, thluak lam fel lohna avangin a awm deuh ber a, thenkhat erawh chu inthlahchhawn vang (genetic) te a ni thei bawk. Ruihhlo eng emaw ber, a bikin drugs chi hrang hrang leh zu hmansual vangtein a awm fo a, stress nasa tak, a bikin chhungte hnai thihna avangtein a awm thei bawk a ni. Rilru lam buai, ât vangah te kan ngaih fo vangin tam tak chuan Psychiatrist pante an hreh phah bawk thin. Mipa aiin hmeichhiain an nei duh zawk a, tleirawl chhuah leh kum 30 hnuai lam hun lai hian a awm duh hun lai a ni bawk. BP sang neite hian an nei duh viau bawk.

A enkawlna kawngah chuan Psychotherapy te, Behavioural Therapy te an hmang nasa a, chu chu Counseling chi khat a ni a, Psychiatrist emaw, Clinical Psychologist emaw te hi hetiang lama mi thiam bik an ni. Aizawlah pawh hian Psychiatry OPD, Civil Hospital-ah hian an awm a, rawn theih reng an ni. A nasa zualah chuan damdawite pawh an hmang a; mahse, heng damdawi tam zawk hi a hman sual (ngaih - dependent) theih avangin fimkhur taka hman a tul thung.

Kan hriat tur pawimawh chu thlarau lam thlirna zawn atanga en a, thiltih sual eng emaw ber vang ang ni awma insawithaih hi a sawt mawh khawp. Enkawl theih a ni a, a enkawl thiamte pan phawt hi a fuh ber a ni.