Zawhna: Zawhna: Ka pu, nu nau pawm ka ni a, 2020 khan mît paih tawh ka ni a. Ka nau neih hnu hian ka cher phah em em a, vitamin tha an tih ang hi ka ei kim thawkhat tawh viau a, tunlai hian ka pum ni nghelh nghulh te ka nei a, engtia inenkawl tur nge ni ang? Thau ve deuh ka chak bawk si a.

Chhanna: Chhanna: Nu in nau an pai hian an rih belh a, rih dan pangngai tak nu chuan a naupai chhung hian kg 10-15 vel te pawh an rihbelh thei. Nau an neih hian chu an rihbelhna chu engemaw chen an hloh leh fo bawk. Mihring an in ang lova, a then chu thau hlen ta te pawh an awm a, thenkhat erawh cher phah daih te pawh an awm bawk. Mît paih (gallbladder removal) hnu hian weight loss hi a awm ve fo bawk. Nangma dinhmun bikah hian i weight loss zat hi engzat chiah nge i sawi lova, nau i pai hma, nau i pai lai leh i neih hnua i weight te han tarlang tel thei la a tha hle mai.

Engpawhnise, rit lutuk ai chuan a la ziaawm deuh turah ngai ta ila. Nu in nau an neih hnu hian mawhphurhna a rawn awm belh a, nau enkawl ngai nen, ei leh in te pawh an ei mumal lo fo thin. Rilru kaput a tam a, mut hunbi te a lo buai a, chutiang avang chuan weight loss hi an nei fo thin a ni. Stress a tam hian rihna a tlahniam thei a, chuvangin nau pawm lai nih a hnute tui pe nih bawk chuan ei leh in uluk hi a pawimawh khawp mai. Ei leh in uluk kan tih hian ei chiam chiam lam aiin kan thil ei quality kha a pawimawh zawk bawk.

Pum lam insawiselna i nei tel a, chu lai chu ngaih pawimawh tel a that hmel. Stress sang vangin i pumpui a lawng ani thei a, chu chuan digestion a ti buai fo thin. Endoscopy lo ti thei la a tha hle mai. Tin, in checkup hrim hrim pawh a tha ang. Blood test ah i Hb a hniam em, zunthlum i neih leh neih loh te pawh hriat tel a that hmel. Tin, thyroid buai hian (a bikin Hyperthyroidism) rihna tlahniam a thlen duh viau mai bawk a, chuvangin Thyroid function test te pawh lo ti tel thei ta la. I thi neih a buai tel tih te pawh han hriat theih ta se. Medicine Specialist lo pan phawt ta la, a tul ang investigation te an lo tih tir che anga, I harsatna hi an pui thei ngei ang che.