Hmanni deuha PROMISE buatsaih workshop-ah khan he thupui sawi tur hian min sawm a, kalkhawmten ngaihtuahna zau zawk an neih theihna turin tawi tein hun ka hmang a. Sawihona tha tak a awm avangin a hlawk thlak ang reng viau. Sorkar inrelbawlna tha (Good governance) nei tur chuan mipui mawhphurhna a sang hle a, sorkar pawhin mipui thuneihna a pe sang tur a ni bawk. Ram hmasawnna chungchangah thung hi chuan mipui hmaah sorkar a kal a ngai a, ram hruaitute mawhphurhna a sang hle a, rilru a tih tak takna (political will) a ngai bawk. Tuna kan dinhmun hi han thlir ta ila, kan duh ang leh ram hruaitute sawi thin anga hma kan sawn loh avang hian Chemtatrawta thawnthu ang deuhin kan mawhpuh kual mek a, sorkar dem tawk te, mipui zir loh vanga ngai te kan awm a, inhnialna a tawp thei lo a ni ber. Ram hmasawnna atan hian hruaitu nge pawimawh mipui tih chhanna tha tak ni a ka hriat fo chu Singapore chanchin hi a ni. He ram chanchin hmasa lam hi a ropui lem lo, tunhma chuan lawng suamhmangte chawlhhmun, chirhdum hmun, khawpui tawp tak a ni thin a. Nawhchizuar tamna, kutdawh tamna, mirethei tamna, pawikhawihna a hluarna hmun a ni a. Mahse, prime minister ropui tak mai an neih avangin rei lo te chhungin khawvela ram hausa ber pawl, khawpui thianghlim ber zinga mi a lo ni thei. LKY (Lee Kuan Yew) prime minister a nih tirh khan tunlaia Mizorama kan harsatna tawh mek ang hi an harsatna a ni. Chenna in nei lo an tam a, thalai hna hmu lo an tam em em a, sorkar hnathawk leh thuneitute zingah eiruk a hluar hle a. Mahse, LKY hian huaisen takin hma a la a, nasa takin a bei a, a thawk rim a, a taima a...kihhnawk then tur a ngah tur zia kha kan chhut pui pha lo ang. Rei lo teah khawvela hmun ropui berah a siam thei. Kum 1959 atang 1990, kum 30 chhung hruaitu lu ber a ni a, nawmchen vanga hausak ngaisang lo tak a ni..'Ka thih hnuah chauh singapore-ah hian casino hawn a ni ang,' a ti. India ramah pawh hian state thenkhata an hruaitute hi chu an danglam bik. Mipui hamthatna tura nasa taka bei thin, eirukna laka fihlim, hruaitu taima leh thawkrim an awm ve nual mai. Hmarchhak state zingah pawh hian kan thenawm Tripura chief minister hi a zahawm fal bik chu a nih hi. Kawng hrang hranga an state hmasawn dan hi mipuiin an zir bik vangah an puh kan hre ngai lo a, chief minister rethei ber ni thei khawpa mahni tanghma hai lo a nih thu an sawi a, a mimal nun an fakna piah lamah hian an state hmasawnna atana a hmalakna hi a ropui. Mizoramah chuan ram hmasawnna chungchang te, hlemhletna chungchang te kan sawi changin mipui zir loh vangah kan hruaitute hian an puh tlat thin. Sorkar thaah chuan ramin harsatna a tawhin thuneituten mawh an phur ngam a, hma an la thin. Hruaitu taima tawk lo te, hlemhletna a fihlim bik lo te, a ngaihna hre vak lote tan chuan mawhpuh tur zawn mai awl viau tur chu a ni. Chhuanlama an hman thin ‘Mipuiin an zir lo’ tih hi ram dangah chuan sawi ila min nuihzat maithei, leader nei lo society emaw min tih hial a rinawm. Kum nga chhung sorkarin a lo kalpui tawh NLUP pawh hian beisei a pha dawn loin a lang a, mipui thiam loh vekah an puh em lo ang chu maw.. Hmanlaiin ‘Lal huai khua chu an huai’ an ti thin a, lal zahmawh sawi hrat khua chuan zahmawh sawi an hrat te pawh an ti thin. Chuvangin, lal taka awm a, mipui che vel thlir mai mai tura inngai hruaitu kan neih chuan mipui chu kan hawihai mai mai dawn tihna a ni ang. Thufingin “Hruaitu tha chu mipuiin an hruai tur a ni lo a, mipui a hruai tur a ni” a tih angin hruaitu tha chu mipui hmaah a kal thin. Mipui ruala kal mai mai hruaitu ropui an awm ngai lo a, mipui hmaa kal thinte hi a ni hruaitu tha chu an ni. Hruaitu pawimawhna kan sawi uar avang hian mipuiin mawh an phur ve lo tihna erawh a ni lo ang. Ram hmasawnna hi sorkar leh mipui tanrualna atanga lo awm tur a ni a, a pawimawh zawk erawh an awm. Kalphung nghet tak, tha si lo kan nei nual mai. Entirnan, insawipui te, ai kal lak te, duhsak zawng hna pek te, advertisement chhuah lo a hnalak/contract hna pek te leh a dangte. Corruption langsar tak a ni tih hi kan ngaihtuah ngai em? Hengte hi ram hruaituten mipui thiam loha an puh letna a ni fo bawk. Mahse, corruption hluarna ram Singapore kha LKY-a’n kum rei lo te chhungin corruption-a fihlimah a siam thei. Mizote hi hruai nuam tak hnam kan ni a, hnatlang thang, thahnemngai taka a huhoa thiltih thiam kan ni. Kalphung tha lo hi a thlak theih a, system tha lo thlak ngam khawpa thilti tak tak chi awm ta sela chuan mipuiin kan thlawp khawp ang. Hetianga kan sawi avang hian tuna kan hruaitute hi kan dem bik tihna a ni lo a, tunhma atanga kan ram kalphung sawina a ni zawk. Mi tam tak chuan ram hmasawnna tih te, sorkar inrelbawlna tha (good governance) tih te hi hla taka awm, ram dangte chauhin an neih theihah an ngai thin a. Mahse, kan ban phak leka hnaiah a awm tih hi kan hriat a tha khawp mai. India sorkar kalphung a inthlak mek a, state rethei leh hausa kar te hi a zau tial tial dawnin a lang a, hruaitu nei tha apiangin hma an sawn chak mai dawn a nih hmel. Chutiang te a nih mek lai chuan kan hruaitute hian tan an lak thar sauh sauh beisei ila, an tum tak tak chuan mitthlaa kan hmuh thin raltiang ramah hian mipuite hi min hruai thleng ngei ang.