Ram hmasawnna awmzia hi mithiamten kawng hrang hrangin an hrilhfiah thin a, zirna huanga hrilhfiahna tam berin a kawh chu hmasawnna lo thleng thut a tawp leh daih tur ni lo, daih rei tak, mihring nunphung (living standard) chawisanna te, awp behna hrang hrang laka zalenna te, mipui rilrua mahni induh tawkna neihtir te hi a ni a. Kawng hrang hranga mihring hmasawnna te, hmasawnna kipui/ruhrel (Infrastructure) din te, retheihna um bo te, hriselna lama hmasawn te, mipui himna te hi a tum ber a ni. Sawi tawh angin, mi tlemte hmasawnna hi ram hmasawnna a tling lo a, thiltithei zualte hlawkpui tur chauha hmalakna hi ram hmasawnna tichhetu a ni zawk. Hmasawnna tehfung chi hrang hrang mi thiamten an sawi zingah Human Development Index hi a dik bera ngaih a ni a, chu chu mihring nunphung leh dinhmun tehna a ni a, chumi atana tehfung pawimawh chu ziak leh chhiar thiam zat (literacy rate) leh mihring dam chin chawhrual (Life expectancy) te hi a ni. Heng tehna pahnihte hian ram chhung mipui dinhmun a hril a, an nunphung changkan dan te, eizawnna leh sum lak luh dan te leh khawsak phung hrim hrim pawh a tarlang a ni, an ti. India ram hmasawnna tura ruahmanna siamtu leh bawhzuitu Planning Commission chuan kum 30 kal ta chhunga India hmasawn dan a zir chiang a, kum 2000 hnu lama chhuanawm khawpa a than nasat viau lai hian hmasawnna hi hi a kairual tawk lo hle a, a zarzo pha lo tam tak an awm avangin Plan sawmpakhatna (Eleventh Five Year Plan 20) ah khan thupui atan Huapzo hmasawnna (Inclusive growth policy) an hmang ta a. Keini pawh hi han inngaihtuah ta ila, ram hmasawnna kan sawi thin hian thlawh khum a nei nual tih hai rual a ni lo, hmalakna lian pui puiah hian rethei dinhmun phet laklawhte hnen thleng pha lo hmuh tur a tam hle a nih hi. Hlemhletna chi hrang hrang vangin thingtlang miten an chanvo tur an chang lo a, sorkarin buaipui viau mahse miretheiten lei rem an rap hlei thei lo a, loneitute an ding chhuak thei lo a nih hi. Huapzo hmasawnna hi hmasawnna dik chu a ni. Sorkar hmalaknate hi a hlawkpuitu leh a tuartu an awm thin a. Hmun thenkhatah chuan hmasawnna hmingpu hmalakna avangin miretheiten an in leh lo, an eizawnna bulpui an chan fo a, mi tam tak an vakvai thin. Chutiang chu 'Development induced displacement' an ti a, India hmarchhakah mai pawh hian tuikhuah lian pui pui (Mega dams) vanga an chenna hmun atanga um chhuah sawi tur leh hmuh tur a tam hle. Hetiang lakah hian keini pawh hi kan him reng bik lo maithei a, ngaihtuahna sen ve pawh a hun ta khawp mai. Chumai a ni lo a, hmasawnna hnathawh hrang hrang vanga environment-in a tawrh dan pawh hi ram dangah chuan an buaipui fe tawh bawk. Kum zabi tharah hian leilunga chhiatna chi hrang hrang lo thleng avang leh khawvel lum zelin harsatna a thlen avanga vakvaite (Environmental refugees/migrants) hi an pung zel dawnin an sawi lehnghal. Keini tana chutiang ang thlen theihna hnaivai ber chu kan thenawm Bangladesh hi a ni. Khawvel lum zel avanga tlang sang vur tui zel avangin tuifinriat tui chim hi a sang zel dawn niin an sawi a. Tun atanga kum 50 ah chuan tuifinriat chim chin hi metre 1 vela a san belh an ring a, chuti a nih chuan Bangladesh ram pumpui hmun thuma thena hmun khat hi tuiin a chim pil anga, mihring maktaduai 20 atanga 30 inkar vel hian in leh lo an chan dawn, an ti. Chutih hunah chuan vakvai (climate change refugees/environmental refugee) chutiang zat chu chenna tur zawngin an kiang hnai (India hmarchhakah) hi an rawn pan khawm maithei a ni. Ram hmasawnna kan buaipui viau laia ngaihtuah tel tur pawimawh em em mai chu hnam himna hi a ni. Tunlai hunah mi tam takin hnam bing rilru put a hun tawh lo tiin an sawi thin a, 'Nationalism' tuipuitute pawh an hmu thing tan mek bawk. Mahse, mahni hnam vei tul tih loh hi a him lo hle zawk a, hmasawnna atana hmalakna reng rengah hnam himna ngaihtuah tel reng tur a ni zawk. Sorkar laipui leh hmun dang atanga tawktarh itawm tak tak hmanga min rawn vehthlem emaw hmasawnna hmingpu thil chi hrang hrang min barh luih an tum emaw a nih chuan kan hnam tan leh mipui nawlpui tan a him leh him loh ngaihtuah chian phawt nise a tha ngawt ang. A hma lama kan lo tarlan tawh ang khan tualto hnamte (Ram neitu dik tak ni si, sorkar lian awpna hnuaia hnam tenau zawk anga awm, 'indigenous people' ang chi) hi 'fourth world' ti a sawi an ni a. United Nations pawhin 'indigenous people' te hi venhim ngai an nih hriain a buaipui hle thin a. Keini pawh hi tunhma zawnga la inawmpawlh ngai lo leh hnam hrang hlakte nen ram khatah kan awm khawm a, hnam lian zawkte karcheh a awm, sorkar lian tak awpna hnuaia thuneihna sang tak nei lem lo kan nih avangin hnam derthawng tak kan ni mek tih hi hre reng ila. Chutihlaiin, kan zinga mi thenkhat chuan hmasawnna hmingpu thil chi hrang hrang an tuipui vang leh chumi behbawm sum leh pai leh therhlo ringawt an ngaihtuah avangin ILP/ILR hlih hial te an sawi mawi tan tawh a, inhawn zau huau a hnam dangte nena inchiahpiah ve tak tak tawh an chak thu pawh an sawi thin. Chutiang aia hnam himna ngaipawimawh zawkte chu hlauh ngah leh 'Thliarkar rilru pu' ah an chhuah fo thin bawk. Anih loh leh ram hmasawnna thlen theitu apiang mai hi lawm takin dawngsawng zel ta ila, kan ram leilung hausakna te hi phur em emin hai chhuahtir chur chur ta ila, hnam dang sumdawngte leh hnathawktute lo lut ruih ruih ta mai se he hnam hian a daih rei ngut ang em? Kan zinga mi tlemte hian an hlawkpui anga, a rah tel tawkte chu an nuamsa viau ngei ang. Mahse, mipui nawlpui hi chuan hlawkpui a hnekin kan tuar mai long maw? Kan chhehvela mite dinhmun atang mai pawh hian inchimral hlauhawm zia te, hnam dang nena inchiahpiah a la him loh zia te hi hai rual a ni lo ang. Bangladeshi (vai) pem lut tam vangin Assamese te, Tripuri te, Cachari te, Bodo hote leh a dangte hi anmahni rama chimral leh nekchep an hlawh tawh a nih hi. Chutihlaiin, hmasawnna hrim hrim dodal erawh a dik lo ang. Nungchate tichereu zawnga hmalakna a nih loh a, hnam tana pawi thei tur a nih loh a, mirethei zawkte thleng phak tura hmalakna a nih chuan bawh huam huam zawk tur a ni ang. Chutianga hmasawnna him leh tlo chu kan mamawh tak zet a, thuneitute pawhin an buaipui ber tur pawh a ni ang. Mipui pawh hian chak zawka hmasawnna thlentir turin ram hruaitute lakah beiseina kan nei thin a nih hi. Chumi hre reng chuan ram leilung hausakna haichhuahnaah te, hmasawnna kipui leh a ruhrel dinnaah te, loneitute dinhmun siamthatna kawngah te, eizawnna thar siam tura hmalaknaah te hian ruahmanna (development policy) tha tak siam a tul hle a ni. Ram hmasawnna thlenna atan hian mipui aiin ruahmanna siamtu (policy maker) te hi an pawimawh zawk nghe nghe.