Zawhna: Ka pu, Covid-19 chungchanga, Rapid Antigen Test leh Rapid Antibody Test hi enge a danglamna? A khawi zawk nge rintlak zawk?

Chhanna: Antigen kan tih chuan kan taksa peng zinga mi ni lo, kantaksain natural-a a siam ni lo, pawn lam thil engpawh (foreign substance) tihna a ni ber a. He term kan hmanna ber chu hrik emaw, hrikin a siam kan taksa tana pawi thlen thei toxin sawina a ni ber. Chutiang antigen chu kantaksa a lo luh khan a lo do turin kan timur leh taksa vengtu immune system-te khan Antibodies an lo siam ve ta a, chu chuan antigen chu an do a, taksa tana pawi thlen thei lo turin an lo tukzal (neutralize) thin a ni.

Covid-19 thlentu hi virus (Coronavirus) a ni a, kan taksa peng zinga mi a nih loh avangin kan lo kai khan kan taksain a do turin antibodies chu a rawn siam ngei dawn a, a tlangpui chuan an kai atanga ni 10-21 chhungin antibodies hi insiam a, detect theih turah ngaih a ni (Antibody response). Mahse, heng antibodies-te hi coronavirus tan an specific kher lo va, hri leng dang vang pawha an insiam theih avangin Rapid Antibody Test (RAT) hi a lo positive a nih chuan engtik hun kalta emaw khan Covid hri hi an lo hma chhawn tawh (exposed) tihna a ni ber. Chuvang tak chuan Antibody Test hi chu Covid-19 natna an vei mek a nih tih confirm nan a rintlak loh.

Rapid Antigen Test (RAgT) erawh hi chu a specific em em mai a, Virus particle kha a hmu thei a (a peng pawh), a positive a nih chuanCovid confirm anga ngaih a ni nghal. Mahse, a sensitivity (Covid kai tawh reng reng hmu nalh nalh thei ti zawngin sawi ta ila) a hniam thung a, chuvang chuan Covid hri kai chung siin negative result a pe fo thei (False Negative). Chuvang chuan ICMR chuan he test negative-te hi RtPCR hmanga confirm leh kher nise tiin guidelines a siam a ni (Guidelines ang thlap thlapa kal erawh a har fo). RAgT hi Hotspot te, Containment area/zone-ah te hman atan ICMR chuan a recommend bawk.