Dr Ka Zawhna

Ring ka herh nge ni dawn? thil dang vang?

Dr. Chawnglungmuana - Jun 06, 2022

Nghawngherh kan tih hian tihrawl (muscle) emaw tha (ligament) inpawt tawm ani deuh ber a. Kan taksa a peng hrang hrang, a bikin ruhchuktuah lai te hi intihpalh laka veng tur hian a tuamtu emaw paltlangtu tihrawl leh tha te hian an veng thin a, an tang sek ta thin a, chumi tang tihrawl/tha tawm chu a inthlahzal leh maithin lova, chu chuan herh kan tih kha a rawn siam thin a ni ber.

Zawhna: Ka pu, mipa kum 30 mi thau lampang ka ni a. Tukin ka tho hi ka nghawng dinglam hi a na riau mai a, ka hawi tha thei der lo mai. A na lai han hmeh hian a na riau mai a, vung leh bawk engmah a awm lo. ka ring ka herh nge ni dawn? Nge thil dang vang ani thei ang em?

CHHANNA: I kum ngaihtuah leh thau lampang i ni tih i sawi atang chuan nghawngherh anih duh hmel viau mai. Nghawngherh kan tih hian tihrawl (muscle) emaw tha (ligament) inpawt tawm ani deuh ber a. Kan taksa a peng hrang hrang, a bikin ruhchuktuah lai te hi intihpalh laka veng tur hian a tuamtu emaw paltlangtu tihrawl leh tha te hian an veng thin a, an tang sek ta thin a, chumi tang tihrawl/tha tawm chu a inthlahzal leh maithin lova, chu chuan herh kan tih kha a rawn siam thin a ni ber. Chumi enkawl nan chuan heng tihrawl/tha tawm te hi an zal theih nan nuai te, thil lum/sa a deh (heat therapy) te, physiotherapy hmanga tihzal te an hmang thin. Vung a awm erawh chuan a reh nan vawt hmangin an dep thin (cold therapy).

Nghawng leh dar zawn hi hetiang herh avang hian a sil awng rei duh phian a. A chhan pawh tihrawl lian leh chak tak takin kan nghawng leh dar te hi a ven vang a ni pakhat. Nghawng ruh fel lo te, a inzawmna laia tham tu tisa hlui leh thler vang te in a chhunga thazam spinal cord a nghawng loh nan heng tihrawl leh tha te hi an tang fo thin. Chuvangin nghawngherh reh hlei thei lo kan neih chuan a chhan hriat nan MRI emaw CT Scan tal tih theih nise. A chhan a zirin enkawl dan pawh a dang thei hle. A chhan hre chuang lova mahni thu a lo nuai vak vak te hian a ti zual duh hle bawk.

Rih lutuk emaw thau hian intihpalh a awl zual a. Kan ruh chuktuah in a dawl zawh loh khawpa kan rihna a san chuan inherh lam chi hrim hrim hi neih a awl khawp mai. Rit emaw thau kher lovah pawh taksa sawizawi ngai lo te hian inherh an awlsam duh phian bawk. Chutiang avang chuan kan hrisel that nan ei leh in uluk te, taksa sawizawi leh chet tam te hi a pawimawh hle a ni. Hei bakah hian nghawng leh dar na te hi mut dan dik lo, sofa a mut mai chin te, khum dup lutuk a mut te, lukham sang lutuk kham chin te hian a awm thei bawk. Taksa posture a pawimawh tihna a ni a, TV en chunga sofa a mut mai mai te hi chin loh a duhawm hle bawk a ni. Mobile phone kan khawih hian kan kun nasa ta hle mai a, hei pawh hian kan nghawng ruh lamah harsatna a thlen thei bawk ang. 

Share now