Zawhna: Kum 61 na ka hmang mek a, engmah insawiselna ka nei lo. Marawh chu ka serh bawr/lik bawr hi a var tuarh reng mai a, han lip ila a berhin a rim chhe si a. Kan nu hi a insiam hnuah phei chuan sex kan hmang lo tluk a ni a, kum upat avang nge khumah mu dun mah ila sex kan hmang lo, phurna/tulna a awm lo a ni ber ang. Lik awr hi pilh thip vet changte hi awm thin bawk a, VD nei inti dawn ila, tumah sex ka hmanpui a ni bawk si lo, engtianga inenkawl tur nge? Doctor rawn dawnin a zahthlak deuh roh bawk sia, kan nu pawh ka hrilh ngam lo; thil ni lo lo hian inpuhnate a awm ang tih ka hlau bawk si a. 2016-ah CABG ka ni a, engmah insawiselna ka nei lo. Dr Loncy min advice angin half yearly checkup ka nei thin. Rosumac ASP leh Starpress xl 50 ka ei mek. Tuna ka harsatna hi 2020 atang ka nei chauh a ni.

Chhanna: Mipa sazu hi a hmawr lam, a lik laiah hian silfai nachang hriat loh chuan tuihnang khal hian a bawh var duh khawp mai a. He tuihnang, smegma kan tih mai hi mipaah chuan a awm vek a, serh tinaltute pawh a tih theih ang. Smegma-ah hian mipa baw-in a pawlh fo bawk. Chutiang chu a nih vangin zun zawh te, inbual laite hian a vun hi lik a, sahbawn phuan emaw, tuia silfai fo emaw a tul thin a ni. Chuti a nih loh chuan a rim a chhe hma duh viau.

Chhan dang awm leh thei chu zunthlum neiah hian a awm duh zual viau. Blood sugar a lo san khan zunah thlum a lo awm tel a, chu chuan hmuar (fungus) a siam fo a, sazu hmawr hi a bawh var fo thin a ni. I heart lam problem neih leh damdawi i eite hi chuan serh hmawr var hi a thlen a rinawm loh a; mahse, Starpress (Metoprolol) hi BP control-na damdawi a ni a, tisa chakna a ti hniam ve thei thung (decreased libido-side effect). Rosumac (Rosuvastatin) hi cholesterol sang tur control-na a ni a, hei hi chuan i insawiselna hi a thlen hmel loh. Engpawhnise, blood sugar check a pawimawh a, fasting leh PP lo test-tir la, a san chuan i doctor hi i rawn nawn leh dawn nia.

Tisa châkna, sex hman châkna (libido) hrim hrim hi kum a lo tamin a tlahniam ve fo mai. Mipa ai mahin hmeichhiaah a common a, a chhan pawh an thi a lo hul hian an reproductive hormones level a lo tlahniam a, an serh tinaltu tuihnang insiam a lo tlem zual fo bawk. Mipa erawh kan danglam deuh a, kum 80 pelh tawh hnua fa nei lehte pawh an awm. Chuvangin, nupa kara sex hman kawngah chuan inhriatthiam tawn a ngai hle. Serh chungchang nupa han inhrilh hi thil awlai a ni hauh lo vang; mahse, inpawhna thuk nei tan chuan thil harsa a ni hran lo. I harsatna hi in nu hrilh hre ve thei la chu a tha hle mai. Fungal infection i lo nei a nih chuan hreh lovin skin doctor inentir la, an pui thei ngei ang che.