Zawhna: Ka pu, kum 60 ral ka kai ve ta a, nupui neih lehte ka rilruk a. Blood Sugar hi kum 10 chuang zet ka nei tawh a, sex lamah hian ka sugar hian min tithuanawp hle mai a, engtia hmalak chi nge ni ang? Tin, fate hi ka la nei thei tho ang em?

Chhanna: Kum 60 i pel ta a, nupui neih leh i rilruk chungchangah hian in inthen nge in nu a boral tawh i sawi lem lo va, chu lam chu a pawimawh hranpa chuang lo va; mahse, ngaihtuahnaa awm chu kum 50 I pelh chhoh hnu khan zunthlum chu i nei tan tawh tihna a nih hmel a. I nupui neih lai, zunthlum I neih tawh hnu si khan sex lamah hian I tlahniam tial tial em, nge tlahniam chuang lo tih hriat a chakawm viau mai. Sex lamah chak lohna hi chhan hrang hrang a awm thei a, chutihrual chuan a chhan hriat lohte pawh a awm tho bawk. Sex hi nupa nun tihlimtu, a phuarkhawmtu, inpawhna thuk zawk siamtu a ni a, nupa karah chuan a pawimawh tak zet mai.

Sex hman kawngah hian tisa châkna neih a pawimawh hle mai. Chumi nei tur chuan taksa leh rilru hrisel a pawimawh em em a ni. Kan sex drive hi kan hormones-ah a innghat lian em em mai a, kum a lo tam hian heng kan hormones-te hi a lo hniam ve tial tial a, that lai leh chak lai hun kha chu kan pha lo tial tial dawn tih chu a chiang reng a ni. Mahse, chutichung chuan chak that lai huna sex drive hniam tlat hi an awm fo mai bawk. Mipa aiin hmeichhia hi sex drive lamah an hniam hma zawk a, a chhan lian ber pawh an thi a hul hian an hormones a lo tlakhniam vang a ni. Sex chu mipa leh hmeichhe inkar a nih miau avangin init tawn tur leh sex hman dun châk tur chuan intihphur tawn a pawimawh hle.

Zunthlum natna hi kan lo ziak fo tawh a, taksa peng hrang hrang a tihbuai theih avang leh, a bik takin nerve conduction (kan thazam hriatna zungzam) a tihbuai fo avangin harsatna hrang hrang a thlen thei a. Mipa sazu fuk kawngah hian nerve hnathawh a pawimawh hle a, chu bakah chuan zunthlum hian thisen zam lamah thlenga harsatna a thlen avangin mipa sazu fuk tura thisen supply rawn tam turte a tibuai thei bawk a ni. Chuvang tak chuan sex lam harsatna thlentu natna zingah chuan zunthlum hi a common ber zinga mi a ni. Chutihrual chuan zunthlum hi control that phawt chuan sex lam harsatna hi an nei kher lo bawk. Chuvang tak chuan zunthlum kan nei a nih chuan control tura theihtawp chhuah a ngai a ni. Damdawi ei/inchiu piah lamah hian taksa sawizawi regular leh ei leh in uluk taka inenkawl a pawimawh em em a ni.

I zawhna hi han chhang thuk dawn ta ila. Zawhna zawh tur pawimawh tak tak a awm dawn a, chung zingah chuan sex lama i chak lo i tih hian i sazu a fuk tha thei lo em ni? Nangmahah hian tisa châkna a awm ngai em? Hmeichhe it zawng i nei ngai/thei em? Tisa châkna hmang turin I suangtuah thei em? A hmaa ka zawhna che khi han tar lang nawn leh ila, nupui i neih lai khan sex hman i châk lo sa hrim hrim em? Nupa nun inhman dawnin sazu fuk thei lovin i awm thin em? I nupui hi itna i nei lo thin nge amah hian tisa châkna a nei lo va, sex hmanpui a theih loh? Heng zawhna ka han tar lanna chhan chu tuna sex lam chak lova i insawi hi engtik atanga awm tawh nge tih te, nangmah i chak lo ni lovin i it zawng takin i kawppui a awm ngai lo zawk tihte hriat a pawimawh vang a ni. Rilru lam a pawimawhzia ka sawi tawhkhi!

Engpawhnise, kum 60 i pelh tawh avang ngawtin sex lamah i hniam phah ngawt dawn lo va, i zunthlum zawk hi i control tha em tih kha a pawimawh hle bawk a ni. Zunthlun nei, damdawi ei emaw inchiu hmanga inenkawlte tana pawimawh chu an damdawi ei lai hian an blood sugar a control tha em tih hi a ni. Chumi monitor nan chuan HbA1c test an tihtir thin a, chungte chu i lo ti taw hem? I la in-test lo a nih chuan lo in test ve phawt la, control a tha lo a nih chuan i damdawi eite tihdanglam emaw, ei leh in lam hmanga in-control tum te, taksa sawizawi ulukte a pawimawh hle dawn a ni. Fa neih chungchangah erawh chuan i chi a tlem emaw, chak lo emaw a nih loh chuan i nei thei em em ang. Kum 80 dawnah pawh fa nei an la awm a nia, thlaphang lo phawt rawh.