Sorkar hrang hrangte hian an khua leh tuite himna tur hi an ngai pawimawh viau a, a bikin ram changkangho phei chuan an buaipui zual bik a, an zinga retheite an chhawmdawl a, hna hmu lote an buaipui a, damlo leh tarte an tanpui a, suahsualna leh pawikhawihna chi hrang hrang lakah mipui an him theihna’n nasa takin hma an la thin. Hetianga khua leh tuite venhimna, chhanchhuahna leh chhawmdawlna hmanraw hrang hrangte hi ‘Social Safety Nets’ an tih chu a ni. India ram pawh hi ram thang lai zingah chuan social safety nets hrim hrim chu nei tha pawl tak a ni a. Retheite chawikanna tur ruahmanna chi hrang hrang (Poverty alleviation programmes) tam tak sorkarin a duang a, mipui vantlang tan damdawi inte a din a, tui in tur a sem a, khua leh tuite hamthatna tur thil tam tak a buaipui a. Chhungkaw harsa zawkte leh hnam hnuaihnungte tan zirna a buatsaih a, tanpuina a pe a, a mamawh tan chaw tha a sem a, chenna in nei lo te a siamsak bawk a, chhawmdawlna leh tanpuia chi hrang hrang a siam thin a ni. Safety nets tha chuan mipui rilru a tihuaisen a, tanpuina leh chhawmdawlna thil tam tak avangin mahni kutkawih a eizawnna beitu tan hlawhchham hlauhna a tinep a, huaisen taka hmala ngam tan safety net hi a tangkai hle a ni. A tawi zawngin sawi ta ila rethei leh harsate dinhmun chawikanna atan 'safety net programme' hrang hrangte hi a pawimawh tak zet a ni. Ram hmasawnna kan tih fo hian a kawh ber chu a mi chengte tihhmasawn a ni. Ram hnu fualho tan chuan mi retheite dinhmun chawikan hi hmasawnnain a tum ber pakhat a ni nghe nghe. Pawn lam lang thei china hmasawnna hi ram hmasawnna tak tak a tling zo lo fo. In leh lo tha tak tak dinin, kawngpui tha nei thluahin, chungah chuan lirthei changkang tak tak tlan dul dul mahse kan zinga tam takte rethei taka an awm chhung chuan hmasawnna tak tak kan pawh pha chuang lo a ni. Mipui nawlpui dinhmun chawikan a, kut hnathawkten an thawh hlawh an chan a, mi retheite an dinchhuah chauhin hmasawnna a kai rual anga, hmasawnna tak tak a thleng dawn a ni. Engpawhnise, retheihna hi sual ni lo mahse ram hmasawnna atana hmelma lian tak a ni a, tihreh phawt loh chuan hma a sawn theih loh a ni. A lehlamah chuan hmasawnna kai rual lo lutuk hian retheihna a thlen a, mi harsate chhawmdawlna tur liau liau a pawisa lokal pawh an hnen an thleng pha lo a nih chuan an bet reng mai dawn tihna a ni. Tunhma atang tawhin India sorkar hian retheihna tibo turin kawng hrang hrangin hma a la thin a - hriselna lam leh damlo enkawlna te, mi harsate chhawmdawlna te, sorkar hnathawk pension scheme te, tar leh hmeithaite chhawmdawlna te, lo neitute tanpuina te leh a dang tam tak a siam a, a kalpui mek a ni. Hengte hi Mizoramah pawh kan lo hmu ve thin a ni. Mahse, thil lungchhiatthlak tak mai chu heng ruahmanna tha tak takte hi a nih dan tur ang taka hman tangkai a ni lo leh thin hi a ni. Retheite an bet reng a, kut hnathawk leh lo neitute tan din chhuah a har em em rih a, hna nei lo an pung tual tual a, rethei leh hausa kar a zau sawt hle bawk. Heng zawng zawng hi mita hmutu tan hai rual a ni lo a, a tuar mektu tan lungawina chi lah a ni hek lo. Ram ralmuang ber pawla awm nia kan inngaih lai hian mipui vantlang nun a him lo hle a. Tualthah, ruk ruk, inrawk, tha rum thawhna, pawngsual leh dan bawhchhiatna chi hrang hrang a hluar sawt hle a. Chanchin rapthlak pui puiin min deng reng a, ngaiah kan nei tawh zawk niin pawhin a lang ta hial mai. Pawi khawihtu man chhuah loh an awm tam viau chuan mi sual an zalen zel ang tih pawh hlauhawm tak a ni. Suahsualna leh dan bawhchhiatna a pun chuan a tuar nasa bertu chu mi rethei leh harsa te an ni a; corruption pawh hi mi rethei zawkte chanai chhuhsakna chi khat a ni bawk. Heng zawng zawng ngaihtuah a, tuna kan ram dinhmun han en chuan mi hnuaihnung zawk te, rethei pachhia te, mahni hamthatna tur pawh chang pha lote tan hian social safety nets tha kan mamawh tih hai rual a ni lo. Social safety net a ngaihpawimawh hlawh ber (target group) te chu puih ngai, mahni a ding chhuak zo lo tur - mirethei te, vohbik te, ei leh in tur tha hmu pha lo te, chenna in nei lo te, mahni chanvo chang pha lo te leh a dangte an ni a. Social safety net programme reng rengin a tum ber pawh chung mite chawikan chungchang chu a ni. Naupang tana hri danna a thlawna pek te, nu leh raipuar te tana chaw tha pek te, retheite in sak sak te, zirlai harsa chhawmdawlna te, leh a dang kan hriat ve phakte pawh hi chutiang atana sorkar hmalakna chu a ni. Chutiang rilru pu chuan thuneitute hian thahnemngai taka an thawh zel a tha awm e, chuti a nih loh chuan hmasawnna huapzo (Inclusive growth) a thleng thei lo ang. Hlemhletna hi hnam tichhetu lian ber a ni a, mi tam tak retheihna bawiha hnuk luttu pawh a ni bawk. Zep thu a cheng lo, kan ram hian hlemhletna vangin nasa takin a tuar mek a, a kum telin kan chhe hret hret zel ni pawhin a lang. Heti tak mai a corruption a lo hluar ta hian a entir chu safety nets kan nei tha tawk lo tih hi a ni. Insiam that ngaihna awm lo khawpa kan chhiat zawh hma hian tih tak zeta kan do a hun ta khawp mai. Mi thiamte sawi dan chuan hlemhletna hi mipui rilrua a intuhnghet tawh (moral corruption) a nih chuan hnam a eichhe thuai thin a ni. Hmelmate ralthuam emaw leilunga chhiat rupna lo thleng emaw hnam lian zawkte chimral emaw ai chuan moral corruption hi hnam pum ralna thlen theitu a ni zawk, an lo ti hial reng a ni. Kan hnam tana pawimawh em em mi tam takte inhumhimna leh an dinchhuahna tura hmanraw hrang hrang ‘social safety nets’ kan neihte hi kan ram hruaitute kutah a awm a, kan hnam pawimawh a ni tih hriaa an hman tangkai thiam hi a tul tak zet a ni. —LALTHLAMUANA RALTE