Governance (Inrelbawlna/inawpna) han tih hian sorkarin hmalakna tura ruahmanna a siam leh chumi a bawhzui dan chu a kawk a. Ram kaihhruainaah sorkar hi thu tawp siamtu a nih avangin engkim a rel a, a ruahman a, hma a la thin a. Chung hmalakna te chu dik leh fel fai taka kalpui a nih chuan ‘governance’ tha a awm tihna a ni a, dik lo taka kalpui a nih a, corruption a tam hle chuan sorkar tha lo tak a ni tihna a ni thung. 

Sorkar inrelbawlna tha ‘Good Governance’ hian ken tel, ze pawimawh tak tak a nei nual a, chungte chu han tarlang ila - 

1. Mipui mimir tha thawh (Participation): Hmasawnna hnathawh leh sorkar hmalakna tinreng mipui mimirin an hriatpui tur a ni a, chumai bakah tha an thawhin, a tul angin an tel ve ngei ngei tur a ni tih hi. Hei hi good governance nihphung pawimawh ber pakhat a ni nghe nghe. Mipui vantlang hamthatna atan sorkarin rua-hmanna hrang hrang siamin hma a la a, sum tam tak a seng thin a ni.

Hetianga hmasawnna hnathawh leh sorkar hmalakna chi hrang hrang (e.g., kawngpui sial, tuikhuah, etc.)-ah hian a kaih-hnawih khua/veng leh a hnua chhawrbawk tur mipui mimir ngaih pawimawh a, sum hman dan te, hna an thawh dan te leh engkim mai hrilh hriat hi a pawimawh tak zet a ni. Participation chu ‘mipui van-tlangin a tul ang zelin tha an thawh ve ang a, rilru an seng ang a, an tel ve tur a ni’ tihna a ni ber. 

Hmasawnna hna-thawhna a mipui an tel ve theihna atan hian mi thahnemngai inhlawmkhawm (civil society) leh tlawmngai pawl (NGO) hrang hrang an pawimawh hle a, NGO kaltlang hian hian sorkar hmalaknain a kaihhnawih mipuiten tha an thawh ve thei a, hnathawh dan chipchiarin an hre thei bawk a ni. Tlawmngai pawlte bakah mi mal thahnemngaite hmalakna chi hrang hrang heng - chanchinbua thuziak te, radio leh TV-a thusawi/sawiho thin te hi thil tangkai tak a ni bawk. 

2. Langtlang Sorkar (Transparency): Langtlang sorkar a awm loh chuan puan hnuai thil a tam a, mi dik lo an pung duh a, suahsualna chhui chhuah a harsat phah thin. Transparency (Langtlang sorkar)-in a kawh ber chu ruahmanna siam sa ang thlap a hmasawnna hnathawh hi a ni. Chumai bakah, mipui vantlang hnena an hriat duh apiang hrilh hriat vat zel hi langtlang sorkar tih-hlawhtlinna a ni. 

Ram changkang apiangte an inhawng zau a, an sorkar a langtlang zel a; ram hnufual leh corruption a hluarna apiangah zep ruk leh thil thup a tam thin. Langtlang sorkar pawimawhzia hriain India sorkar pawhin kum 2005 atanga hman tur khan Right to Information Act a siam a. He dan hmang hian sorkar file awlsam taka a haichhuah theih tak avangin corruption dona atan ralthuam tha tawpkhawk a ngaih a ni nghe nghe. Right to Information Act hian sorkarah duh duh zawh min phalsak mai a ni lo a, duh duh hriat hi mipui chanvo (right) liau liau a ni tih a kawk zawk mah a ni.     

3. Dan Rorelna (Rule of Law/Predictability): Sorkar inrelbawlna tha nei tura pawimawh tak pakhat chu khua leh tuite venhimna tur dan leh hrai tha tak neih a, chung dante chu dik taka lekkawh hi a ni. Thlei bik neia rorelna chuan hlemhletna a hring thin. Mi lian leh mi te, hausa leh rethei te ang khat renga dan hmanga venhim a tul a, mihring dikna/chanvo (human rights) humhalh a tul hle bawk.

Thleibik nei lo rorelna a awm theihna atan independent judiciary neih a pawimawh rualin mipui venghimtu (Police force) huaisen, thudik tan ngam, hlemhletna laka fihlim leh politician-te zar buai loh tur neih a pawimawh tak zet a ni. 

4. Mawhphurhna la ngam/Mawhphuh-tirtheih sorkar (Accountability): Mawhphurhtir theihna (accountability) hi sorkar tha nei tura thil pawimawh elkhen a ni. Sorkar hnathawkten sorkar kalphung chungchanga zawhna awm apiang an chhang thei tur a ni a, an tihsual leh tihthatah mawh an phur ngei tur a ni tihna a ni. Sorkar hnuaia thawk (sorkar hnathawk, supplier, contractor, etc.) te hnathawh that leh that loh endik thin tur tihna a ni bawk. Sorkarin ram hmasawnna policy/programme hrang hrang a kalpui danah tha takin a thawk anga, endik a ngam ang a, hrechiang duh an awm chuan dik takin a hrilhfiah tur a ni ang. 

5. Sorkar tha thawhna (Res-ponsiveness): Sorkar hian mipui mamawh phuhru turin a thawk tur a ni. Mipui mamawh hlamchhiah hi sorkar tha zia a ni lo a, mipuiin lungawi lohna leh harsatna an neihin a tuam dam hna a thawk tur a ni. Ram hmasawnna leh inrelbawlna a tangkaina nei leh mawhphurtu hrang hrang (Sorkar hnathawk, sumdawng, NGOs, kohhran, political party, banks & financial institutions, etc.) a tha thei ang bera hman tangkai a tul bawk. 

6. Inlungruala hmalakho (Concensus oriented): Ram hmasawnna atana mawhphurtu tam tak an awm a, chung zinga langsar zualte chu - sorkar hnathawk te, tlawmngai pawl te, mi thiam rual awmna zirna in te, loneitu pawl te, kohhran hruaitu te, political party te, banks & financial institution te, chanchin thehdarhtu te, etc. an ni. Mawhphurtuho hian mipui hamthatna tura an chanpual theuh an thawhna kawngah insu buai lo a an tan tlan a pawimawh hle a, a tul hun a thawhho thiam leh inlungrual hi a pawimawh hle bawk. 

7. Thlei bik awm lo, Mitin huapzo (Equity and inclusiveness): Vantlang hmasawnna atan hian mitinin tihtur leh chanvo an nei vek tih an inhriat a pawimawh hle a, khawtlang leh ram tan tangkaina nei loah tumah an inngai tur a ni reng reng lo. Ram hmasawnna hian mitin a huapzo tur a ni a, dinhmun harsa zawk a awm mekte leh mi hnuaihnung zawkte pawhin hmasawnna atana an thawh ve theih dan ngaihtuahpui a tul hle. Mahni hma zawn theuhah phak ang tawk zela kan thawh chuan ramin hma a sawn anga, mipui dinhmun a inkhai rual thei ang. 

8. Tangkaina zawn (Effectiveness): Ram leilung hausakna mil tawk hmalak leh a tha thei ang bera hman tangkai te, khua leh tuite thiamna chhawr thiam te hi hmasawnna atan a pawi-mawh hle a. Chu chu Good Governance ziarang pawimawh tak a ni bawk. Hengte hi sorkar inrelbawlna tha ziarang pawimawh zualte chu an ni a, han ngaihtuah chiang ila kan tana tih theih loh tur thil a awm lem loin a lang a, good governance hi kan ban phak maia hnaiah a awm a ni zawk. Kan hruaitute duh leh duh lohah a innghat chauh ti zawng pawhin a sawi theih ang. Kan ram dinchhuahna tur bulpui a nih avang hian mipui nawlpui pawh hian kan vei thar a tul khawp mai.