Kum tawp lama MLA inthlan lo awm tur atan political party hrang hrang an phi buai ta hle a, tum dang ang lo takin an candidate turte pawh hma takah kan hre deuh thup mai. Kan ram dinhmun kan hria a, India ram kalphung inher danglam sawt zia kan hre bawk a, chutiang karah chuan sorkar tha kan mamawh tak zet a ni. State kan nih hma - district council leh UT kan nih lai te kha chuan Assam ram bung khat mai leh sorkar laipui enkawlna hnuaia awm mai kan nih avangin hmalak a harsa viau a.   Mahse, state kan lo nih tak hnu hi chuan sorkar thuneihna a sang tawh a, hruaituten an zir phawt chuan hmasawnna pawh a chak viau thei. Kum 30 kal ta chhunga sorkar kan hrawn tawhte min hruai dan han thlir let hian, a tawi zawngin, chief minister tha - taima, rinawm, fing, tumruh, ram leh hnam hmangaihtu tak tak kan mamawh hle tih a chiang viau a, chutihrualin a thuihhruaite (minister rual) bakah democacy ram kan nih angin eptu lam pawh an pawimawh hle bawk.   Kum nga chhunga kan ram hruai tur thlan chhuah hi thil namen a ni lo. Kan thlan chhuahte azirin kan ding chhuakin kan tlahniam thei a, hma kan sawnin kan hnungtawlh thei a, mipui mimir kan lungawiin kan phun leh nuaih nuaih thei bawk. MLA inthlan a hnai zel anga, party hrang hrangin an hmalakna tur 'Manifesto' pawh an siam leh ngeiin a rinawm a, mipui hip tuma inziah that siak ngawt tawh lo a, a tak taka an ngaihpawimawh leh an tihhlawhtlin tur ngei an ziah beisei ila. Chutianga, sorkar thar lo piang turin a ngaihpawimawh tura rawtna thenkhatte han tarlang zui ila.   1. Hmasawnna rualkhai: Kan ramin harsatna a tawh mek, kan buaina langsar tak chu hmasawnna kal rual lo lutuk hi a ni. Zep thu a cheng lo Aizawlah sum leng vak a tam a, mihring pawh kan tam a, sorkar hmunpui a ni a, kohhran leh pawl hrang hrang hmunpui a nih bakah sumdawnna hmunpui ber a ni bawk. Mizoram hi Aizawlah hian kan innghat tawp a tih theih. Tawng thu chhe loah Aizawlah hian chhiat rupna thleng palh ta se Mizoram pumin kan tuar nghal dawn. Chuvangin, ngaihtuahna thar sen a ngai, chhim leh hmar, chhak leh thlangah khawpui dang innghahna thama khawpa cheibawl a ngai.   Aizawl hlat apiang an dinhmun a harsa a, hmasawnnain a thlen phak loh an tam. Thangkhat lian kal ta chhung khan thingtlang khaw tam tak hian hmasawn sawi tham an nei lo maithei. Anmahni buaipui tur bik Rural Development department kan nei reng chung hian thingtlang dinhmun hi a inthlak danglam tak tak lo. NLUP hmanga hmalak hnuah pawh hian eizawnna ngelnghet nei lo an la tam hle a, kum sawm kal ta a rethei kha ding chhuak ta an vang pharh tho a ni. Kum tina thingtlang mite hmasawnna tura sum ruahman te hi dik taka hman ni thin ta se, a bet ngaia te hi an bet reng lo anga, khaw thlaler leh thengreng lutuk a awm lo ang maw le.   Tunhma atanga ruling MLA bial leh opposition MLA bial inthlau lutuk te, ruling VC/LC leh opposition VC/LC awmna khua/veng inthlau thin lutuk te hi a zia lo ngawt mai. Hleih nei taka NLUP, MIP, etc., an sem thin te, party mi leh sa induhsak bikna te hian kan rilru put hmang (moral) a tichhe nasa tawh. Heng induhsak bikna te, hmasawnna hnathawh rualkhai lo lutuk te hian retheihna a tizual a, mipui dinhmun a inthlauh phah a, lungawi lo an pun phah. Hetia district an nawr ta vak vak mai pawh hi hmasawnna kairual lo lutuk nghawng chhuah a ni ber. Ruahmanna (plan) fel tak siam a, dik taka hmalak chuan sorkar nawr chiam chiam pawh hi a ngai lo ang maw le.   2. Ram Neih Dan Phung Siam that (Land Reform): Mi thiamte inlungrualna pakhat chu ram hmasawnna atan leh retheihna tihbona atan Land reform a pawimawh tih hi a ni. Land reform tih chu ram neih dan phung mumal leh tha zawka siamthat hi a ni a. Chumi atan chuan sorkarin dan a siam thin. India ramah hian Land Reform hi state sorkar thuneihna hnuaia awm a ni a. Chuvang chuan independence hnu lawk atang khan state thenkhat chuan dan siamin ram neih dan phung an siamtha a, mimalin ram an neih theih zat an bituk a, mi hausa ram zau tak sorkarin a chhuhsak a, ram nei lote hnenah an pe a. Mi hausa lo/leilet nei, thawk tak tak lo a mi dang chhawrte pawh an ram an chhuhsak a, lo neih/leileta eizawng tak takte hnenah an pe a. Chutianga hmalakna avang chuan ‘Green Revolution’ pawh kha a thleng thei chauh a ni.   Land reforms hian ram neih dan phung siamthat mai bakah ram/leilung hman dan tur ruahmanna a kengtel bawk. Thlai chinna hmun tur te, industry dinna hmun tur te, mihring chenna hmun tur te, ramngaw zuah tur chin te leh leilung hman tangkaina tur dangte thliar fel a, ruahmanna tha tak neih hi a tul tak zet a. Kum zabi 20-na laihawl vel khan Asia khawmualpui chhak lam ramte (Abikin China, South Korea, Taiwan, Japan te) hian Land Reforms an hlawhtlinpui hle a. Chung hun lai atanga tun thlengin economy thang chak ber ber an ni zui ta a ni. India rama state hausa leh hmasawn chakho pawh hi ram neih dan phung siamtha a, ruahmanna felfai tak nena ram/leilung hmang tangkai an ni hlawm.   Tuna kan ram dinhmun ngaihtuah hian Land Reforms hi a tulin a tul tak zet a ni. Aizawl khawpuia hmunhma tha lai zawng zawng mihausaten an nei zel a, ram hlut zawng mumal taka thliar a ni si lo. Aizawl khawpui mai a ni lo, ram chhunga hmun tha lai apiang mi hausate ram a ni zel mai a. Khaw tinah hian Aizawl pain hmun tha lai leh rem lai deuh an lo nei fur zel. Hetiang zela kan kal chuan Mizoram hi mi hausate ram vek a la ni thei hial ang. Kan ram hmunhma leh leilung hman tangkai dan tur te hi ruahmanna siam a hun tawh khawp mai. Thlai chinna hmun tur te, thilsiamna hmun tur te, mipui vantlang ram tur chin te, zirna leh sumdawnna hmun tur te leh a dangte ruahmanna mumal tak a awm loh chuan nakinah kan buai ang.   NLUP an bul an tan dawn lai kum 2009 khan an hotute kiangah thahnemngaih vangin Land record neih phawt a tul thu te, Land reform a tul hmasak thu te, chumi atan chuan dan siam phawt a tul thu te ka sawi ve a. Mi hausaten an enkawl theih loh tur ram an ngah lutuk hi a veiawm a, kut tling loa sum an lak luh chheprelhna atan ram hi an lei an lei te pawh a ni maithei. Kalphung mumal tak leh sorkar inrelbawlna tha tak nei ila chuan kan ram hi insem rual tham a ni a, a mamawh tak tak chuan ram an nei thei vek anga, eizawnna peng hrang hrang atan mumal taka then theih a ni bawk ang.   Mahse, tuna sorkar tum party zawng zawng deuhthaw hi chuan ‘Land Reforms’ hi an ti ngam tak takin rinawm loh, an hruaitute an hausa a, mamawh aia tam fe ram nei, hmun hrang hranga invalh thluah an ni hlawm tlat. Land Ceiling (Mimal ram neih theih zat bithliah) te hi kan politician-te hian an duh tak tak lo chu a nih hi, hmanah YMA in an nawr tawh a, kohhran pawhin an lo rel tawh kha.   Tunlai hian South Africa sorkarin Land reform an kalpui mek a. An ram pumpuia lo neihna ram za zela 72 (72%) chu mingoho ram a ni a, mihangten za zela 4 (4%) chauh an nei thung. Mingo ho ram tam tak (a neitute enkawl ni lo) chhuhsak a, lo neitu ram mamawh tak takte hnena pek mai chu thil hautak leh harsa tak mai a ni a. Tunhma deuh (kum 25 vel kal ta) khan Zimbabwe-ah pawh Land Reform an kalpui a, dan hmang vek nimahse ram inchhuhsak a, han sem leh chu thil awlai a lo ni lo a, sorkar thiltih dan a dik tawk lo bawk a, mi tam takin an thih phah a ni.   Kan ramah pawh hian khua kan tlai hmain, tun hi a hun lai tak a ni a, nakinah chuan thisen a luang ve mai ang tih a hlauhawm. Ram hmasawnna leh land reform hi a inzawm tlat a, ram hmasawnna hna thawh tak tak dawn chuan ram neih dan phung siam that a ngai, retheite khai chhuahna atan thil tul ber pakhat a ni bawk. Chumai a ni lo, environment venhimna leh nungcha te humhalhna atan a tul hle bawk. Kum tawp lamah hian sorkar tha tak kan nei a nih chuan Land Reform an buaipui ngei ngei turah ngai ang.