Zawhna: Ka pu, thau chhia ngah ve tak ka ni a, zan mut dawnah hian tui lum leh sunhlu tui pawlh ka in thin a, chutiang bawkin zing lamah kaw ruah laiin ka in ni tin tuk tin bawk. Hei hian thau chhia a paiha a hrisel an tih vanga in ka ni a, taksa lamah effect a nei thei em? Khawngaiha min hrilhfiah theih chuan ka lawm ngawt ang.

Chhanna: Thau chhia i ngah i tih chuan i san zawng atanga chhutin i rit lutuk emaw, thau lutuk emaw a nih a rinawm a. Dulthuarah te, mal leh ban puam, nghawng lam thlengin heng thaute hi a tam duh bawk a, chumi avang thau chhia ngah anga insawi i nih a rinawm. Taksaah thau a tam chhan hi eng nge? Ei leh in atanga kan taksa mamawh kan lak luh hi taksain energy atan a hmang chak tawk lo va, thau chuang (excess fat) kha kan sawina hmunahte hian a lo inchhek khawm ta mai thin a ni.

Ei leh in lamah i insum tawk lo a ni thei a, taksa sawizawi lam i tinep deuh pawh a ni thei bawk. Engpawhnise, thau chhia paih nan hian damdawi emaw, i rawn sawi ang chi hrang hrangte emaw hi an fak fo thin. Natural lam chi a nih avangin a him turah ngaih a ni a; mahse, thau chhia i paih duh tak tak a nih chuan ei leh in lam in-control a, mawm leh hmuihmer ei tlem te, fastfood lam chi ei tlem te, tui leh tuiril lam chi in tam te, taksa sawizawi emaw, chet tam te emaw a pawimawh ber ang.

Thau zualah hian a nghawng buai fo chu thin (liver) hi a ni a, thau thin bawh (Fatty Liver) hi an nei duh hle. Fatty Liver hi inven a pawimawh a, control loh a a awm rei chuan hun eng emaw chen hnuah thin tha lo, thin sawng te a thlen fo thei a ni. Tin, taksaa thau tam lutuk hian thisen zam a tichhah thei a, chu chuan BP sang te, zunthlum te a thlen fo bawk. Chuvangin, ei leh in ulukte leh taksa sawizawi tam hi hriselna atan a pawimawh hle.