Kum 1970 khân a ni—a tuah tawh ngang a ni ang—Eric Clapton-a insúm zo tawh loin a thian tha ber, Beatle George Harrison-a kianga zawi sapa, ‘Thiana, i nupui hi … ka hmangaih tak zet a ni!’ a tih phawng tum kha!

Kum li an innei tawh a—kum li chè chè chauh. An khatih laia khawvêl déng chhuaka lär The Beatles tingtangpu George Harrison leh model chhe lo Pattie Boyd te khân an vàng lai an chèn mék a ni a. Chutih mék lai chuan, Harrison-a thianpa, a thian satliah pawh ni lo, a tui záwng leh hmel tha tih záwng chena a rilru ang pu mi, Eric Clapton pawh, khawvêla tingtang tum thiam làra a làr tan chhoh lai a ni ve bawk. Chûng mi pathumte chuan, mi pahnihin an insem thin hmangaihna chu an inchuh ti tih a nih chu maw le! An va hahthlâk e aw …

Amah Pattie Boyd avàng hian aläwm, The Beatles hla lär, “Something” tih te, Eric Clapton-a hla chuai tawh lo tùr, “Layla” te leh “Wonderful Tonight” te hi, rimawi khawvêla lal lèna léng tùra puan chhuaha an awm ni! Tin, Boyd leh Harrison inneih that hle hle laia Boyd-i hnêna Eric-a’n love letter a lo va thawn (rûk) te, George-a’n ’68 Krismas card a thawn te leh thlalâk thenkhat leh lem ziakte pawh, kumin March thla khán Pattie hian London-a lilàmna hmunpui, Christie’s Auctions-ah a zuar hmiah mai a nih kha!

Thawnthu bul

He hmangaihna thawnthu chingchivêt nuai mai hi kum 1964,March ni 2-a intan a ni. Hemi ní hian The Beatles member-te leh film siamtute chu an film hmasa ber tùr, an hla chuam pakhat,  “A Hard Day’s Night” hming an puttír buaipuiin an buai hle a. Chû film-a inlan ve zuai tùr nula pakhat, Pattie Boyd chuan Beatles tingtangpu, an zínga ngawichawi ber leh zakzum ber mai, George Harrison-a mit chu a là ni satliah loin a lunglai a kuai vawng vawng a nih chu! Chutih lai chuan Pattie chuan “tawih” a nei—thla la thiam Eric Swain. Mahse, amah duh ngawih ngawihtu, George-a mitmei chu a hre thiam “mah mah’ a ni ang, a chhai lai Swain chu a then zui hmak!

Kár khat a liam a, film director chuan thla la tùrin a ko leh. Chumi tuma George nèna an inkawm dàn chu Pattie chuan heti hian a sawi: ‘… a sawi hmasak ber chu, “I bialpa eng nge a an?” tih a ni a. Kei chuan bialpa ka neih loh thuin ka chháng!’ tiin. A hnuah Beatles’ manager, Brian Epstein-a club, “the Garrick Club” ah zanriah an kîl dùn zui.

1964-a inzui tan kha a kum leh Krismas ní-ah an inhual a; kum 1966, January ni 21-ah, a rûk theihtàwpin an innei. Nupa tuak tharte chu, hlim deuhin an inawi ta a. An tlei ang, an tlai dun hle pawh ka ring.

Eric + George

George leh Pattie te intawn kum vëk, 1964 hian English band làr tan mék, The Yardbirds te chuan London-a The Marquee Club-ah concert an nei a; an tingtangpu chu Eric Clapton a ni. George Harrison paw’n concert hi chhim vein concert zawhah an inkàwm. Hemi tuma an inkawm tanna hi, dam chhúnga thian tha nihnaah an chantír zui ta a ni.

Eric Clapton leh George Harrison te chuan tingtang tum dùnin hla eng emaw zât an phuah dùn a, an record dùn bawk thìn. The Beatles hla hit, “While My Guitar Gently Weeps”-a guitar solo pawh, Clapton-a kuthnu a nih nghe nghe kha.

Hmangaihna Ching-chi-vêt!

Indian classical musician Ravi Shankar sàwm angin George leh Pattie te chu kum 1968-ah  Bombay, India-ah an zin a. Shankar-a hnuaiah George chuan Sitar zirin Boyd Pattie paw’n Dilruba tum a zir ve bawk. Heta tang hian George chu meditation lamah a inkhurbing ta tlat mai a; Hindu-hoin pathian anga an biak, nulahoin an hual hut hut thin Lord Krishna anga awm ve chu a châk ta tlat. A tawi záwngin—George chu a phun bùl bùl reng mai a; Pattie tán chuan a pasal khawsa zia chu ninawmah a chang chho tan—a hnuah an inkárah khì a siam ta hial! Tin, George hi ruihhlo lamah a tlän chho nasa ta hle a; tin, a thiante nupui leh ngaihzáwngte a rûka lo kawp a chíng bawk nèn! An boruak chu a fuh hleithei ta meuh lo.

Kum 1967-a The Beatles manager Brian Epstein a thih atangin, band member-ten harsatna neuh neuh an nei chho a. Chhan hrang hrang avàngin kum 1970 April thlaah an keh darh ta nge nge a. Hetih lai hian George chuan Pattie hi a hlat hle tawh. Pattie pawh chuan a pasal chu enkawl zui duhin la awmpui duh hle mah se, kum 1974 July thlaah, fa pawh neihsak loin a chhuahsan ta a ni.

Eric + Pattie

Hemi hma pawh hian George Harrison-a thianpa, an nupa “regular in léng” ni bawk, Eric Clapton chu a rûkin Pattie Boyd zùnah a lo uai tawh a. A hmain Eric hian Pattie Boyt laizáwn Paula Boyd a lo “nihpui” tawh a; a rilru hmintu zâwk Pattie-ah a tuan leh a ni ber.

A tìr berah chuan Pattie a duh thu hi lehkha thawn hmangin Eric hian a hrilh a; “Express” tih leh “Urgent” tih chu lehkha thawn káwmah a ziak kalh mai. A chhúngah chuan, ‘Kan inkár chungchánga i rilru put hriat duha he lehkha hi rawn thawn che ka ni e … I pasal hi i la hmangaih reng em? Ka tán hmun min kian thei a nih ngai chuan, min hrilh thuai ang che aw…’ tih lampang a ziak a ni.

Chumi zàn là lâ chuan Eric chuan Pattie chu telephone hmangin a be zui zat a; a lehkha thawn a hmuh leh hmuh loh a zâwt a ni. Pattie chuan Eric-a lehkha thawn chu a ûksak lëm lo a, a dera amah lém kual vêl tùrah a ngai a ni. Chutih rual chuan, a pasal chu hmangaih hleih theih a ni tawh tlat bawk si lo a; lehlamah Eric chuan a hmangaihna a tlángaupui dum dum mai bawk si! A hnua Boyd-i’n, ‘George nèn chuan kan la innei a; mahse kan inhlat tak zet si! Din hmun harsa takah ka ding a ni,’ a ti pawh hi a demawm bîk miah loh.

A rûkin an inzui chhuak zeuh zeuh a. Tum khat chu Eric hian jeans kekawr tláng arh a leiskak a; “Bell Bottom Blues” hla a phuah chhan kha a ni nghe nghe. A hnuah Clapton chuan Boyd chu a thiante inah lènpuiin Boyd tána a hla phuah, “Layla” chu a ngaihthlâktír a. ‘Ka hla ngaihthlâk tawhah chuan min la hneh ber ang … Mahse, ka hlauthäwng  tak zet—ka pasal hian ka tána a thianpa phuah a ni tih hre ta se … ’ tiin hetih hun laia a rilru buaizia Pattie Boyt chuan a sawi.

The Love Triangle!

Hemi zàn vëk hian George, Eric leh Pattie te pathum chu party-naah an kal ho—George-a’n a nupui a rinhlelh tan zàn a thleng ta! Clapton leh Pattie te pahnih chu, huana “sè sè thu-di” inhlàn tawn ni àwm taka an thu dùn lai chu George chuan a hmu ta! Chutah chuan a ni, a tìra kan sawi, ‘Thiana, i nupui hi, ka hmangaih tak zet a ni!’ Eric-a’n a tih tâk phawng ni!

Harrison chu a sa phat mai! A nupui hnênah chuan, nèlawm loh fahran mai hian, ‘Ani (Eric Clapton) kiangah nge i kal dáwn ka kiangah?’ a ti ta phiar phiar mai! Pattie chuan a pasal kianga kal chu a thlang ta “rih” a—phawtin a!

Mahse, Clapton chuan Byod chu a pasal kalsan tùrin a rûkin a sáwm reng a; a cháng phei chuan, ‘George i kalsan duh loh chuan, herion ka rui mai ang,’ ti te’n a vau hial thìn! Sawi tawh angin kum 1974-ah Pattie Boyd chuan Harrison chhuahsanin Eric Clapton chu a pan ta nge nge a ni.

Inthenna leh Inneihna!

Hetia a nupuiin a thianpa a pansan tâkah hian George-a’n thîkna rilru emaw rilru tha lo emaw a put loh thu Pattie hian a sawi a, ‘George chuan, “Mi dang thlang loa Eric i thlang hi ka lawmpui tak zet che,” min ti a. Fiamthu-in Clapton chu “ka husband-in-law” a ti thek mai!’ tiin. Hemi kum hian an pathumin Krismas pawh an hmang ho nghe nghe a ni.

Pattie Boyd leh Eric Clapton te chu kum 1979, March ni 27-ah an inkutsuih ta a. An inneih lawmpuitu zíngah hian George Harrison pawh a tel ve a ni mai lo a, an thian dang Paul McCartney leh Ringo Starr nèn inneih lawmpuina hla an sa ho nghe nghe!

Hlim takin innei mah se, Eric Clapton hi nula dang leh zu leh ruihtheih thila a buai chhoh êm avàngin kum 1989 khân, fa nei loin an inthen a. Tum eng emaw zât Boyd hian nau a chhiat a ni. Thian anga inenin an inkàwm zui ta zâwk a. George Harrison pawh hrawk, lung leh thluak cancer avàngtea November 29, 2001-a a thih  hma zawng khân thian tha tak an ni zui reng bawk.