Mihring kan in an loh avangin a then thau chak ngawih ngawih an awm a, chutih laiin thenkhat thung chu cher chak ngawih ngawih an awm ve leh bawk. Taksa rih zawng hi kum a zir te, san zawng a zir te, khawsak phung a zir te pawhin duhthusam ti a han sawi theih a awm hran lova, mi thiam te'n tehna an hman common tak, "Body Mass Index - BMI" pawh hi a tha ber "ideal BMI" an tih hi mipa leh hmeichhia leh kum a zir te pawhin a dang thei viau bawk. Engpawhnise, thau hrisel lo chu mahni in a hriat ber an ti thin. Chumi teh nan chuan kawng chho leh step kal te, chet vel hrim hrim ah kan inthazo em tih hmang hian a inteh theih a ni. Chhhan hrang hrang avangin rihna hi a rawn sang thei a, i ei leh in bakah, i nitin khawsak phung danglam chuang silova i rihna a san zel chuan a chhan hrang hrang ni thei te chu: 1. Zan mut that loh - Zan meng rei chi i nih chuan chaw ei tawh hnu si, zan lamah i ril a tam fo anga, snacks/chips ei mai a awl bawk. Mut that loh hrim hrim hian thau a ti zual duh viau bawk. Chuvangin i mut theih loh chhan hi hriat a, enkawl i ngai thei ang. 2. Taksa/rilru hah lutuk hian stress a siam nasa a, chu chuan taksa rih zawng a ti sang thei. Hahchawlh dan i thiam a ngai hle tihna a ni. 3. Damdawi thenkhat - thisen sang, zunthlum leh rilru lam enkawlna (antidepressant) thenkhat te hian taksa rih zawng a ti sang thei a. Hetiang i ei hnua i rih zawng a rawn sang anih chuan i doctor rawn ngei ang che. 4. Steroids - heng damdawi hi a tangkai em em a, chutih rualin fimkhur taka ei a ngai thung. Burma lam chhuak damdawi thenkhat ah hian a awm niin a lang a, a composition hriat theih loh phei chu ei reng reng loh tur a ni. Chaw ei a ti tui a, taksa ah tui a khawl duh bawk a, vawi leh khata tawp san thut phei chuan harsatna a thlen fo a ni. Doctor chawh anih loh chuan heng damdawi hi ei reng reng loh tur a ni. 5. Hmeichhia bikah hian naupai venna damdawi Oral Contraceptive Pills thenkhat hian taksa rihna a ti belhchhah thei bawk a. Tin, thi hul chhoh hun lai hian thau a insiam belh fo bawk. Amaherawhchu a rei lo thung. Ei leh in lam insum hret chuan a reh ve leh mai bawk; exercise a pawimawh hle a ni. A dang leh ah chuan Polycystic Ovarian Disease an tih, chi bawm bawk insiam pung hian a thlen fo bawk a ni. 6. Thyroid natna "Hypothyroidism" hian weight gain hi a thlen duh hle a. Ke vung te pawh a awm tel fo bawk. Cushing's Syndrome an tih mai natna nei te ah a awm duh viau. Asthma, ruhseh leh lupus (SLE ang chi te) vanga steroid damdawi ei lai te hian he syndrome hi an nei fo bawk a ni. Inenkawlna lamah chuan a hnuaia kan tarlan te hi hriat a tha hle: 1. Damdawi ei lai i neih a. chu chu i rih belh chhan nia i hriat chuan nangma thuin ei lo ngawt suh. Doctor rawn hmasa la, a dose tih hniam emaw, a tlukpui damdawi danga thlak te pawh a lo chawh thei ang che. 2. Ei leh in insum vak hi a tha ber lo. Insum rau rau ah chuan mawm, leh thau tam, sa leh chi insum hi a pawimawh. Balanced diet ei a pawimawh hle a, fimkhur loh chuan malnutrition leh vitamin tlakchham te a thleng thei a ni. Fast food leh snacks/chips lam erawh insum tluk a awm lo thung. 3. Exercise lak chungchangah fimkhur a tha. Over taka tih thut hian taksa in a zo duh lova, kum 35 chunglamah phei chuan infiamna (badminton ang te) hmanga exercise tih thut loh hi a tha hle. Kawng nat phah an tam a ni. A tawk te a exer lak thiam a pawimawh a ni.