Dr Ka Zawhna

THI NEIH BUAI LEH NAUPAI CHUNGCHANG

Dr. Chawnglungmuana - Jul 31, 2022

Hre si lova nau lo pai ru reng, pum nawm loh vanga endoscopy te an tih emaw, zun kawng lam insawi-selna vanga UTI treatment la te hi an awm fo mai. Thenkhat phei chu naupai lan chhuah dan hre miah lo, sex lo hmang si, an thi a hul pawha inrinhlelhna chang hre lo hi kei ngei pawhin ka tawng fo mai.

Tun tum chu zawhna chhang lovin hmeichhe lam chungchang i han sawi leh dawn teh ang. Hman kumah khan hetiang lam hawi hian ka ziak nual tawh a, tun hnaiah hian hmeichhia la naupang deuh deuh rai, rai tih inhre si lo ka en leh nawlh nawlh ta a. Nau ti tla pawh hi an tam thar riau main ka hria a, invenna hman nachang hre lo an tam leh ta te pawh a ni thei ang. A chhiar tura ten an lo chhiar lo anih pawhin nu leh pa (a bikin nu mawhphurhna a ni zual awm e) ten fanu te kan hrilhhriat atan tal kan ziak nawn leh a ni. 

Hmeichhia in thlabi a thi an neih dan hi a in ang lo thei viau mai. Thenkhat chu regular tak, a hunbi pawh an chhut lawk ang thlap zelin an nei a, a thi chhuah hun chhung pawh ni 3-5 vel te a ni bawk. A dang leh thung ah chuan hunbi inthlak reng mai, a chang phei chuan thla hnih dawn lai nei lo te an awm bawk. Check-up tih pawha a chhan hriat loh, an tana normal anga ngaih sak mai hi an awm nuk bawk a ni. Thenkhat chu nei deuh reuh, ni 2 emaw vel leka reh leh mai, thi chhuak pawh tlem ang reng tak (spotting ti te pawhin an sawi) te an awm bawk a. A tlangpui chuan kum 14-18 inkar te hi an thi neih a mumal lo chawk a ni.

Thi neih dan mumal lo hian nau an pai leh pai loh hriat kawngah a delay fo thei a ni. Hmeichhe tleirawl, sex lo hmang ve tawh si, an thi neih mumal loh vanga inrinhlelhna nei miah lova nau lo pai ru reng hi an awm fo mai a. An naupai vang hian pum lam insawiselna luak chhuak, pum nuam lo, zun lama insawiselna te thlengin an nei fo a. Nau an pai tih inrinhlelhna an neih loh avang hian hetiang insawiselna nen hian doctor an pan thin a, a entu doctor te'n rinhlelh nachang an lo hre lo palh thei a, anmahni lam lahin sex an hman thu doctor han hrilh kha a nuam lem lo bawk nen; damdawi chak deuh chawh chang te a awm palh thei a. A bikin antibiotic thenkhat te hi nau insiam tir tan an hlauhawm thei a, chuvang chuan fimkhur a tha hle a ni.

Hetiang ang hunah hian pawi mawh ta chu hmeichhia in invenna tel lova sex an hman chuan, a hnuah thi nei leh ang te pawhin awm mahse nau an lo pai ru reng thei ani tih hriat hi a ni. A then chuan insawiselna hranpa pawh an nei hran lem chuang lova, an nawmsam loh a doctor te an pan a, ultrasound te emaw an tih hian thla 3-4 lai nau an lo pai fo mai. Chuvangin invenna tel lova sex hmang reng reng chuan an hman atanga thla khat, khat leh a chanve emaw velah Pregnancy test ti ngei thei se, confirm nan ultrasound ti bawk se (a chhan pawh preg test hi nau pai chung pawhin a negative zauh theih vang a ni) a tha hle. Hei tak hi nu leh pa ten fanu te hrilh hriat a pawimawh chu a ni.

Nau an lo pai lo anih chuan an doctor tan enkawlna pek dan a fimkhur theih dawn a, harsatna dang an lo nei anih pawhin (entirnan naupai chunga zunkawng infection UTI) a damdawi chawh tur dik tak, naute insiam lai tana pawi lo tur a hriat theih dawn a ni. Hre si lova nau lo pai ru reng, pum nawm loh vanga endoscopy te an tih emaw, zun kawng lam insawiselna vanga UTI treatment la te hi an awm fo mai. Thenkhat phei chu naupai lan chhuah dan hre miah lo, sex lo hmang si, an thi a hul pawha inrinhlelhna chang hre lo hi kei ngei pawhin ka tawng fo mai. 

Chuvangin fimkhur a tha hle a, naupai rual an nih a, hetiang insawiselna an neih chuan nu leh pa te hian preg test leh ultrasound tih tir thei se duhawm hle a ni. Hemi paha ngaihtuah ngai chu invenna tel lova sex an lo hman chuan HIV, Hepatitis B leh C lakah an derthawng a, chuvangin heng test pathum te hi ti tel ngei thei bawk se a tha hle. Heng hi nu leh pa ten kan fate kan zirtir a kan hrilh hriat a tha hle. An thian te atanga information an dawn hi chu a kim lovin a him lo fo thin. Kan fate sex hmang rual an nih chuan (a bik takin kum 14 chin chung lam) hetiang sawipui hi nu leh pate mawhphurhna liau liau a ni.

Share now