Chhanna: I zawhna hi i rem fuh chiah lo deuh anih hmel a, Engpawhnise thi neih buai harsatna i nei tih a chiang a. Enge a chhan hriat a har viau mai thei. Doctor i la inentir lo tihna nge ni a, i inentir tawh a, an treatment pek che ah hma i sawn phah lo tih hriat hran a har viau mai. Thi neih chungchang hi ka rawn ziak zauh zauh tawh a, i lo la chhiar lo palh a ni thei a, kan ziak nawn hrim hrim ang e. I zawhna chhanna tak a awm loh pawhin information pawimawh atan ka han ziah belh hrim hrim dawn a ni.

Hmeichhia in thi an neih (menstruation) hian an chhul in naupai tura a inbuatsaihna a ni a. Chibawm in hormones a siam te chuan hnathawkin chhul chhung bang (endometrium) kha a rawn chhah tial tial a, nau an pai tak loh chuan chumi bang chhah tak chu a rawn tril ta thin a, chumi chuan thi (menstrual blood) kha a rawn siam a, tichuan thi an nei ta mai thin a ni. Heta tang hian chibawm in hormones a siam (estrogen leh progesterone) te hi hmeichhe thi neih atan an pawi-mawh zia a hriat. Heng hormones pahnih hi thluak lama inseam hormones ten an control leh bawk a, chu bakah chuan thyroid hormones te an inrawlh bawk.

Thi neih pangngai tak nia kan sawi theih chu thla tin a hunbi thlap thlap a thi neih leh, a rei chhung in ang tlangpui hi a ni mai a. Menstrual cycle hi a normal chin a kan ngaih chu ni 21-40 inkar a ni tlangpui. Chumi aia rei lo emaw rei lutuk chu engemaw fel lo awm anga ngaih theih a ni. Tin, thi chhuah hun chhung hi ni 2-7 inkar hi pangngai anga ngaih a ni bawk. Thenkhat chu cycle khat chhunga thi han nei nawn zauh te pawh an awm a, mahse a reng anih loh chuan fel lo angah kan ngai hran lo; insawiselna dang an nei te a nih loh chuan.

Thi neih buai hi a chhan common ber ber te chu – taksa rih zawng tla hniam thut emaw sang thut (overweight/obsesity) te, ei leh in inthlak danglam (hunbi mumal lo lutuk a ei in) te, mawm leh thau lam chi (fast food ang te hi a ni duh zual) ei nasat lutuk vang te, ei in insum vak vang te, zan men rei ngun vang te, taksa sawizawi leh chet tlem lutuk vang te, rilru hah vanga te, zin nasa ah te, damlohna emaw bawrhsawmna avang te, damdawi thenkhat avang te a ni hlawm a. Hmeichhe lam fel lohna engemaw ber vangin a awm duh viau bawk. Chung zingah chuan chibawm lam fel lohna te hian thi neih buai a thlen duh hle.

Tuna i buaina rawn sawi hi engtia rei i neih tawh i sawi lova. I thi neih tirh atang awm nge tun hnaia i neih a hriat loh bawk a, a chunga a chhan ni thei ka han tarlan atang hian nangmah lamah lo inchik la, inthlak danglam ngai a awm anih chuan chumi chu insiamthat han tum la. Chu bakah chuan checkup neih ve hrim hrim pawh a pawimawh hle awm e. A bik takin i chhul leh chibawm te enfel nan ultrasound lo ti thei la chu a tha hle mai. Fel lo a awm emaw a awm lo anih pawhin hmeichhe doctor thiam tak tak an tam a, anni hi pan la, an lo pui thei ngei ang che.