Zawhna: Ka pu, khawngaih takin ka zawhna min chhansak theih chuan ka lawm khawp ang. Mipa ka ni a, zu in ve zeuh zeuh ka ching bawk. Thina thau awm (fatty liver) ka nei a, engtia inenkawl tur nge ni ang? Thil dam har a ni em? Ei emaw, ei loh turte emaw khawngaihin min hrilh theih chuan ka lawm khawp ang.

Chhanna: Thau thin bawh tia kan sawi mai, Fatty Liver hi a awmziaah chuan thinah a normal aia tam thau (fats) a inkhawlkhawm tihna a ni mai a. Hetianga awm tam zawk hi chuan insawiselna an nei lem lo. Kan thin hi kan taksa khawl lian ber dawttu a ni a, kan ei leh in zawng zawng (chaw lam chi, damdawi, thil tuiril lam chi hrim hrim pawh) lo thlifim a, a tangkai chin kan taksaa sem darh a, a tangkai lo leh hlauhawm thei te lo chawk darh a, taksa atanga paih chhuah tura sem darhtu pawimawh em em a ni.

Kan thinah hian thau awm zat tur aia tam a lo awm chuan a timurte hnathawh a tibuai thei a. Insawiselna an lo neih lem si loh avangin hre lovin rei tak chutiang chuan an awm thei a. Thau siam tamtu ei leh in lam te, thau titlem tur zawnga taksa sawizawite an tih bawk si loh chuan a lo tam tial tial a, a rei hnuah chuan thinah ser a rawn thlen a, reilo te-ah thin sawng (Cirrhosis)-in a zui nghal mai thin. Chuvang tak chuan in-check-up nachang hriat a tha a, taksa rih tur aia rit/thau lutukte (obese), ei leh in lama sa leh mawm lam ei nasa te, zu in regular ah te chuan in check-up fo a pawimawh hle.

Fatty Liver thlentu: Kan tarlan tak ang khan ei leh in lama insum lo, a bik takin thau leh mawm lam ei nasaah te, zu in nasaah te a awm duh hle a. Chi hnihin an then a, zu in vanga awm hi Alcoholic Fatty Liver Disease an ti a, zu in ve loah a awm chuan Non-Alcoholic Fatty Liver Disease an ti bawk. Chuta tang chuan zu in nasat vangin Fatty Liver hi a awm duh hle tih kan hre thei ang. A dang lehah chuan zunthlum (Diabetes) neite hian an nei duh hle; a bikin control that lohah hian a awm duh zual. Thau lutuk te, thisena thau tam, a bikin Triglycerides tamah te hian a awm duh hle bawk. A chhan dang lehte chu nu naupaiahte a awm duh a; tin, rihna tlahniam thut (intihcher duh vanga ei leh in inhrek vak)-ah te a awm thei a. Hepatitis B leh C neite hian an nei fo bawk.

Inenkawl chungchangah chuan test thenkhat tih a tul thei ang. Chung zingah chuan Liver Function Test (a bikin ALT/AST), Lipid Profile (he test-ah hian Triglyceride pawh a tel nghal), blood sugar leh Ultrasound te tih theih a tha hle. Tam zawk chuan insawiselna an neih loh avangin ngaihthah a awl phian. Chuvangin, Fatty Liver nei tawhte hi chuan a chunga test kan tar lan takte hi kum khatah vawi hnih emaw tal lo ti thei se a tha hle. Inenkawlna chungchangah chuan ei leh in uluk, mawm leh thau insum, sa ei tlem, zu in thin tan ni khata in zat tih tlem, thau lutuk tan rihna ti hniam tura taksa sawizawi te hi a pawimawh hle. 

Kan tarlan tak angin kan thin hi kan taksa khawl pawimawh em em a ni a, a hnathawh a buai chuan kan taksa ah kan mamawh loh te, kan taksa tana hlauhawm thei thil (toxins) a inchhekkhawl thin a, chung toxins te chu a tam lutuk palh chuan taksa peng dangah kal darhin kan khawl pawimawh dang, a bikin thluakte a tibuai thei a. Chuvangin, kan thin hi enkawl uluk a pawimawh a, Fatty Liver nei tan chuan ei leh in lamah pawh thin hnathawh pui theitu te ei tam a tha hle. Chung zingah chuan coffee hi a tha an tih zinga mi a ni a, hei bakah hian thlai hring leh thei ei tam te, sa lamah chuan sangha hi a tha hle bawk. Buhfai (Rice) aiah hian Oats te hi thin chak lo pui tur atan a tha viau bawk.