Zawhna: Thisen sang leh zunthlum hi a lar ta viau mai a. Engtin nge a lan chhuah dan le?

Chhanna: I rawn sawi ang hian thisen sang (Hypertension) leh Zunthlum (Diabetes Mellitus) natna pahnih hi a common ta hle mai a, a vei pawh kan tam ta hle. Tun hma khan a tlem a ni thei em tih erawh sawi thiam a har viau.

Kan pipute kha hna an thawk nasa a, kein an kal tam a, ei leh in lamah mawm leh thlum lam te kha duh ang tawka ei tur a tam tawk lo va; chuvangin, heng natna pahnih nei hi an tlem a ni thei a. A dang lehah chuan in-check-up nachang hre lo emaw, health facilities la tlem avanga in-check up remchang lo an tam a ni thei a, chutiang vanga hmuh chhuah loh, natna nei si an awmte pawh a ni thei.

Heng natna pahnih hi khawvel a thihna leh damlohna thlentu zingah a sang ber pawl an ni ti ila kan sawi sual tam lo vang. Non-communicable disease an ni a, nunphungin a ken tel natna (Lifestyle Disease) an ti bawk. Ei leh in fimkhur tawk loh vang te, zuk leh hmuam bakah ruihtheihthil tih nasat vang te, taksa sawizawi tlem lutuk vang te a lo awm an ni ber. Heng natna pahnihte hian natna khirh zawk leh mi tam takin an thih phah natna – stroke, heart attack, kidney failure te a thlen thin a ni.

Thisen sang lo lan chhuah dan tlangpui chu – luhai emaw luna, taksa zawi leh chau, khaw hmuh fiah lo, awmna, thawk harsa emaw thawk nuam lo, hnar thi, ha hni thite a ni thin. Thenkhat erawh chuan insawiselna nei miah lovin eng emaw chen BP sang hi an nei thei bawk. 

Zunthlum lo lan chhuah dan tlangpui chu – riltam deuh reng, riltam vanga luhai chau (tamchhawl kan tih ang hi), khaw hmuh fiah lo (tarmit power a inthlak fo thin), zung ngun, tui hal reng, chhan dang awm lova rihna tlahniam, kut leh emaw ke hmawr chawmawlh, mu churh churh te, chau/zawi em em reng mai te, vun ro, taksa pem dam mai thei lo te. Zunthlum pawh hi insawiselna nei lovin rei tak an nei thei bawk. Chuvangin, BP check leh Blood sugar test-tir hi chu kum tin hian neih tum thei hlawm ila a tha hle.