Zawhna: Ka pu, kan fapa kum 3 mi hi zanah thawhah vak vak a ching a, a tap vak zel bawk a, vitamin tlakchham vang ani thei em? Enge a chhan ni ang?

Chhanna: Thawhah kan tih hian a awm dan hriat chian a tha khawp mai a. Thaw kham lo anga awm te, thawk zawnga hrawk hnawk ri ang awm te, an infiam hah laia rawn awm thin anih leh nih loh te, emaw a awm hahdam laia rawn thawhah thut a ni em tih te, a thawk zawngin a awm (chest) a sep dawrh dawrh thin em tih te hriat chian theih nise a tha hle mai. I rawn sawi dan atang hian zanah i ti kher a, zing emaw chhun lamah te hetiang hian a awm ngai em nge zanah chauh tih te pawh hriat theih se.

A dang leh ah chuan a tap vak vak zel tih i sawi a. A thawhah hnuah a tap thin nge a tah hnuah thawhah hian a zui thin tih hriat tel theih ta bawk se. A chhan chu naupang hetiang rual chhan awm lem silova an tah hian engemaw rilru lama kaptu an nei ani thei a, an naupan vangin an sawi chhuak thiam dawn lova. Chuvangin hetiang a awm lai emaw a awm hma lawk hian amah ah danglamna a awm ngai em? Entirnan, a TV en emaw computer khawih lai te in a awm duh bik em? tih te pawh hriat theih nise a tha hle. Thawhah hian trigger tu a nei fo thin.

Thawhah hrim hrim hi check chian hmasak ngai chu a ni a. Lung lam fel lo (cardiovascular disease) vang te, lung lam fel lo, a bik takin asthma lam chi te avangin thawhah hi a awm thei a. Pum lam fel lo, gas tam lutuk te hian thawhah a siam duh viau a, a chaw ei kham hnu lawka thleng thin te a lo nih palh phei chuan a pum lam fel lo emaw, a thil ei huat vang te pawh a ni thei bawk. Asthma hi allergy chi khat anga ngaih a ni a, trigger tu a awm fo thin; entirnan thawmhnaw hmuar vang te in.

Tin, vitamin tlakchham vang ani thei em i rawn tih lai hi han sawi belh ta ila. Vitamin engemaw ber tlakchham vang te chuan thawhah hi a awm ve thei teh meuh mai a. An taksa mamawh nutrition tlakchham vangin an Hb a hniam thei a, chu chuan thawhah hi a thlen fo bawk. Hb (Hemoglobin) hi kan thisen timur Red blood cells a awm ani a, kan taksa a oygen sem darhtu ani a, a tlem chuan kan taksa peng te khan oxygen an mamawh zat an dawng lo thin a ni.

Engpawhnise, check chian a tha khawp mai a. Thisen test, chuap enchian, lung lam check te thlengin a tul a rinawm. Naupang doctor thiam tak tak an awm a, anmahni hi entir ve hrim hrim ta la, a chhan an hriat chhuah a, an enkawl dam theih a rinawm hle. Asthma intan te a lo nih phei chuan enkawl hma a pawimawh hle. Inchhung ah meizu mi an awm phei chuan chung mei khu te chuan thawhah hi a trigger thei a, fimkhur pawh a ngai ngei ang.