Khawvelah hian hrileng avangin ram leh hnam kan lo buai fo tawh thin a. Hrileng thenkhat Smallpox leh Polio te chu um bo anga ngaih tawh an ni a. Hri thenkhat erawhchu a rem tan dawn emaw tih laiin a aia hlauhawm zawk leh enkawl harsa zawkah rawn changin kan buaipui leh bawk thin (entirnan TB leh Multi Drug Resistant TB). HIV hri pawh kum 1983 ah hmuh chhuah niin India ramah kum 1986 ah a lo lut tan a, keini ram kilkhawr ah a lo thlen ve theih pawh kan rin loh laiin kum 1990 ah Mizoram a HIV+ case hmasa ber kan hmu chhuak a, tun dinhmunah chuan India ramah mipui tam zawnga chhutin HIV case tamna ber (highest prevalence) kan ni leh ta reng mai. 

Tun hnai lawkah Covid-19 hrileng, China atanga darh chu hun reilote chhungin kan ramah a rawn lut a, a inkai darh a awl bawk nen, kan buai hle tawh bawk anih kha. Covid-19 hrileng atang hian zir tur kan ngah hle awm e. Hri inkai awl, boruak atanga inkai theih (airborne disease) anih vangin kan inkai darh nasa hman hle anih kha. Chutih laiin HIV erawh thisen leh taksa tuihnang atanga inkai anih vang leh, inkai darh awlsam lo tak ani chungin a inkai dan erawh control har tak, nungchang tha lo ruihhlo inchiuna hmanrua intawm atang te, invenna tel lova sex hman atang te anih vangin kan inkai darh ta viau bawk a ni. 

Viral Hepatitis, thin khawihtu hrik virus vanga natna hi kan hmelhriatna chu a rei ve ta hle chungin mipui nawlpui hian kan la hre chiang lo hle a. Tunhma deuh khan he hri vei enkawl ngai te chu a enkawl man a tam tham em avangin kan han hlau deuh a, mahse kan inkai darh nasa lo nia kan hriat avang te pawh ani anga. Tin, tun hnaiah a enkawl man te a lo tlahniam a, sorkar program kal tlangin a thlawna enkawl theih te a lo nih tak zel avangin kan ngaihven chhunzawm lem lo te pawh niin a lang.

He thin khawihtu hrik, hi chi nga – A, B, C, D leh E a awm a. Hepatitis A hi ei leh in atanga kai theih a ni a. Hepatitis B leh C te hi thisen leh taksa tuihnang atanga inkai a ni thung. Tin, a thawm a zawih avang leh, a natna a lan chhuah mai loh avang hian inrinhlelh nachang hre lo kan tam niin a lang. Heng hri kai te hi a tam zawk chu a lo tlai tawh hnuah leh enkawl a harsat tawh hnuah an inhre chhuak chauh thin a. Chutiang hunah chuan thin hnathawk tha thei tawh lo, thin thlak (liver transplant) ngai an lo ni fo tawh thin a, enkawl a hautak em em a, thin thlak man phei chu a to hle a, sorkar sum pawh heng atan hian kan seng hnem hle.

Hepatitis B hi a invenna vaccine tha tak a awm avangin leh, he vaccine lo la tawh hi kan awm nual avangin a kai hi an tam hran lo niin a lang a. Hepatitis C zawk erawh hi chu a invenna vaccine a awm loh avangin leh, inkai a awl bawk avangin hri kai kan tam ta hle mai a. India ramah tun dinhmunah chuan Mizoram hi Hepatitis C kai tamna ber zinga mi (high prevalence) kan lo ni leh ta a ni. 

Kan state ah Viral Hepatitis, a bikin Hepatitis C kan tam em em mai hi a chhan lian tak pakhat chu a inkaichhawnna kawng lian ber, inchiuna thianghlim lo inhman tawm atangin anih vang kan ti thei ang. Kan ram hian ruihhlo a buaipui rei ta hle a, ruihhlo inchiu thin kan tam a, an inchiuna hmanrua an intawm fo avangin Hepatitis C pawh hi an vei nasa hle a. Zirchianna lo awm neuh neuh tawh atanga a lan dan phei chuan drugs inchiu thin te zingah hian 70-80% (a ai pawhin a sang hial thei ang) lai mai chua Hepatitis C hrik pai an ni tawh a ni.

Vawiin hian khawvel hmun hrang hrangah World Hepatitis Day an hmang thin a. He hrileng vanga thin natna um bo tur hian World Health Organization (WHO) chuan hemi ni hi a serh thin a. India sorkar hnuaia National Viral Hepatitis Control Program (NVHCP) pawhin hemi ni hi urhsun takin a hmang thin a ni. Hepatitis B leh C te hi khawvel ah kumtin hri kai thar maktaduai 2 chuang an awm a, maktaduai 1 chuangin an thihpui thin bawk. India ramah pawh Hepatitis B vanga thin natna benvawn nei hi maktaduai 40 chuang an awm tawh a. Hepatitis C vanga thin natna benvawn nei hi maktaduai 12 chuang an awm bawk. 

Hepatitis B leh C te hi hri inkai awl tak mai a ni a. Thisen dawn fo ngai te, dialysis hmanga enkawl lai te, ruihhlo inchiu thin te an derthawng zual hle. Tin, hospital a damlo enkawl hna thawk te pawh an derthawng bawk a ni. Chuvang chuan a invenna lama hma kan lak nasat a ngai hle. Hepatitis B bik hi a invenna vaccine tha tak mai a awm a, a thei apiang chuan he vaccine hi lak nise, healthcare lama thawkte phei chu vaccine hi lak ngei a pawimawh.

Invenna lama kan hmalakna atana pawimawh hmasa chu a hrik hi kan la kai leh kai loh hriat a ni a. Kan dinhmun hriat nan thisen test ti ngei thei ila, duhthusam ah phei chuan kumtin in test thei ila a tha hle. Tin, a inkaina kawng common tak chu tattoo chhut te, beng leh taksa hmun dang verh te hi a ni. Tattoo chhut hi kan intihhmuh ta viau mai a, chhut loh hi a tha ber chungin kan chhut tir duh tlat anih pawhin a hmanrua a thianghlim ngei a pawimawh. Tin, kan lo kai tawh anih a, enkawl ngai kan nih chuan regular takin a damdawi hi ei tur ani a. |ha taka ei chuan a dam leh theih a ni.

He hrileng hi khawvel chuan kum 2030 ah umbo (eradicate) a tum a. Chumi target thleng tur chuan kalkawng a la thui hle mai. Helama thawktu te tha ti chakin, sorkar bakah civil society te, ruihhlo enkawl kawnga hmalatu te nena thawhhona tha tak neih a pawimawh a. Mahni dinhmun inhria ila, kan lo kai tawh anih pawhin midang kan kai loh nan fimkhur ila, a enkawlna damdawi tha takin la bawk ang u. Tin, sorkar program kaltlangin heng a enkawlna damdawi te hi a thlawnin Civil Hospital/District Hospital ah a lak theih reng a ni.