Sùlhnu ropui chhiahtu

Lemchan thiam hmingthang Al Pacino hi lemchan khawvêl history-a chawi­mawi hlawh berte zínga mi a ni. “The Triple Crown of Acting” an tih—Academy Award (Oscars), Emmy Award leh Tony Award dawng vek thei a nih piah lamah Golden Globe award pawh hüm häw tawh a ni.

Khawvêl film ropui tia sawi reng leh sawi zêl tawh tùr, “The Godfather” trilogy-tea Michael Corleone-a lema chang Al Pacino hian kum 1992 khán “Scent of a Woman” film vàngin Oscars Best Actor chawimawina a hàwn tawh a; vawi kua lai Oscars dawng thei tùra a hming chhawp chhuah a lo ni tawh bawk. Golden Globe lamah lah tum li lai Best Actor chawimawina dawng tawhin tum 19 zet award dawng thei tùr zíngah a lang tawh bawk a. American mite tána lemchan tuala chawimawina sáng ber—American Film Institute (AFI) Life Achievement Award chu kum 2007 khán hlan a ni a. Hei bâkah hian National Medal of Arts (2011) leh President Barack Obama hnên atangin Kennedy Center Honors (2016) medal a lo awrh tawh bawk a ni.

Mahse…

Heti khawpa hlawhtling Al Pacino hi, hausa saa piang a ni bîk lo. East Harlem, New York-ah kum 1940 khán chhúngkaw rethei tak atanga lo piang chhuakin a nu leh pate chu kum hnih mi a nihin an inthen daih! A nu Rose-i leh a pi leh puten, New York-a mi rethei véng South Bronx-ah an enkawl sei lian a; a pa erawh a bo zui hmak!

New York-a mi retheite retheihna chu nasa tak a ni. Chu khawvêl chu Al Pacino naupan lai khawvêl a ni! Mi retheiin an tawn zawng zawng hi tawngin, an neih loh zawng zawng a nei ngai bîk lo! Kum 20 a’n tling chho a; amah hmangaihtu a nu chuan kum 1962-ah a boralsan a; a pi lahin a kum leh, kum 1963-ah a thihsan ve leh bawk. Hetih laia a khawvêl chu, ‘Ka hring nun khawvêla ka hniam lai ber a ni,’ a ti hial!

Kum 17 mi a nihin lemchan zir duhna rilru lian tak a nei. A nu phal lo chung a zir lui. In a chhuahsan phah hial! High School of Performing Arts-ah a inziak lût ve a. Mahse, sum leh paiah an harsa si. Tin, zirna tak tak kha a tuipui hlawl lo bawk a. A hnuah hnawh chhuah a tâwk zui!

Hna hrang hrang a thawk kual a. Bus conductor-ah te tangin mi in enkawl leh tih faisak hna te a thawk láwr a. Kawtthlëra a riah zàn leh cinema hall leh a thian ngamtlâk deuhte thutthlêng seia a riah zàn chu a inzât thuak ang!

Ruihhlo lamah

Thenawm tha leh thian tha nei ngai lo Al Pacino hian, kum kaw mi a nihin mei a zu tan a; kum 13 mi a chuan zu ngawl a vei titih dêr tawh! Lemchan khawvêla a inlàr tan tirh thleng zú a in a. Kum naupang tê ni chungin thil thleng eng mah hre loa ruih chhum hmak tum a nei fo!

Lemchan tual a dai tan a. Chhúngkaw pangngai loa sei lian ta nâ chu, mi dang laka inkiltawihna te, zahzumna leh mahni insitnain a nun a phuar tup thìn. Chu chuan rilru hahna nasa tak a thlen fo. “A chhâwk nán,” tiin, zú chu a na chhawkna in leh ta mai thìn a!

Mahse, hlimna a hmu chuang lo. Tanpuitu a zawng ruai thìn. A nun ning lutuk chuan, zu ngawlvei dam chhuak lehho páwl—Alcoholic Anonymous a zawm ve hlauh. Chutah chuan thian tha tak mai, Charlie Laughton a chhar fu ta chat mai. A thianpa tanpuina zárah, kum 1977 atangin zu in chu a bànsan thei ta a ni.

Lemchan tualah hlawhtlinna lamtluang

Lemchan a zirna sikul atanga hnawh chhuah a nih hnuah mahniin lemchan a zir leh a. Eng tin tin emaw lemchan zirna sikul thaah te a intât lût thei hlauh. Chu chuan nasa taka puiin New York khawpuia lemchan dawhsàn hmingthang Broadway thleng thlengin a chuan kaitír ta! Hollywood a rah hmain Pacino hi New York lemchan tuala “mi lâr” a ni dêr tawh. Broadway lama a hlawhtlinna chuan lemchan khawvêla mi lian, Martin Bregman—“Al Pacino hmu chhuaktu” tia an sawi hial nên a inchhartír ta hlauh!

Kum 1969-ah “Me, Natalie”-ah role lian lëm loah inlan tanin a changtupa lema a channa hmasa ber chu, kum 1971-a tih chhuah, “The Panic in Needle Park” kha a ni—heroin addict lema a channa kha. Heta tang hian film director-te mit chu Pacino-ah a fu ta thup mai! An zíngah director ropui, Francis Ford Coppola pawh a bäng lo. Pacino-a làr chhuahna, khawvêla film ropui berte zínga mi “The Godfather”-ah a inlan chho ta! A bâk chu kan hriat hnu, history a ni e!

Tanpuitu Reeves-a nèn

Al Pacino-a film hlawhtling ber leh a làr chhuahna “The Godfather” tih chhuah a nih atanga a Silver Jubilee-na a lo thlen chuan Al Pacino chu Hollywood-a a thaw lian ber páwl a ni tawh. Award sem inkhâwmah pawh a hmai hruaitu niin khuangpu a ni lo chauh tawh! Sum hräwm lian vak lo film-a chang tùra sàwm kal pawh a harsa fat tawh.

Kum 1997 a ni. Hollywood studio lian—Warner Bros. te, Regency Enterprises leh Kopelson Entertainment chuan, horror movie, “The Devil’s Advocate” siam tumin hma an la mék a. A chang tùr zíngah actor lâr sa, Al Pacino leh, actor lâr tan tìr, “Speed” leh “ Point Break” tea a changtupa, kum 31 mi Keanu Reeves te chu an biak a. Reeves ang thoin a changtunu tùra an sàwm, actress tuaitìr, kum 21 mi, film panga chauh la chang Charlize Theron pawh vawiin anga lär hi a la ni lo. 

A changtupa ber tùr Al Pacino chu an duhthusàm a ni chiang mai. Mahse, producer-ten vawi duai lo an lèn chilh hnuah pawh Al Pacino chuan an lèn chilh zât a lo hnâwl ziah! A film siamna tùr sum, $ mtd. 57 chuan Pacino hlawh tùr chu a daih ngang lo a tin ni!

Chutah, a film thawnthu te chu an han siam tha leh thùl. Pacino chu an thawn ve zêl a. Film siamtute chu an beidawng hman têp tawh. A aiah Robert Redford leh Sean Connery te pawh chu an melh tan tawh tihah, Al Pacino chuan film chan chu a remti ta hlauh mai! Mahse, awlsam taka “Aw” a ni lo. A chhan leh a vàng zâwka chu, a chanpui tùr Keanu Reeves-a inphah hniam vàng a ni daih!

Reeves hi Al Pacino ngai sáng êm êmtu a ni a. A kianga film chan chu a tán chuan mumang ang mai a ni hial ang! Pacino kianga chan loh chu a hlau zek zek a ni chék ang chu, film producer ten Al Pacino hlawh beisei zât an pe thei dáwn lo tih a hriat chuan, ama hlawh tùr atangin $ mtd. hnih lai mai, Pacino rawih nán producer-te hnênah a lo pe lêt leh chu niin! Hei vàng chauh hian a ni, Pacino-a pawh hian a “Aw” ve chauh ni!  $ mtd. 57 budget atána an ruahman film khân, $ mtd. 153 lai a hmuh chhuah theih phah ta a nih chu!

Hetia a hlawh tùr atanga Reeves-a’n amah rawihna tùra sum a pêk lêt leh avàng hian Al Pacino pawh a ngawi reng bîk lo; Reeves-a rilru thatna chu a zah tak zet. Keanu Reeves-a sum thawh belh zawng hi, mahnia pumbilh tum loin, a naupan laia a retheih thinzia inhriain, mi chanhaite hnênah a bo a bäng awm loin a hlàn lêt ve leh vek a ni!

Mi thil phal Keanu Reeves-a thu hi ngai teh

“The Devil’s Advocate”-a Al Pacino chan theih nána a hlawh tùr sum cut-tír hi, Keanu Reeves-a vawi khat tihna a nih rualin, a tàwpna erawh a ni lo. Kum 2000-a tih chhuah, “The Replacements”-a a changtupaa chang tùr khán Gene Hackman rawihna man kha a to lutuk a. Mahse, Keanu hian, a mi ngaih sàn Hackman-a rawih nán, ama hlawh tùr atanga sàwma pakhat … ni lo! sàwma pakua zu sem then phal a!

Keanu Reeves-a thil phalzia leh a rilru thatzia hi ZALÊN chanchinbu, nikum September 1 chuakah khán ka ziak tawh a. A thian tha ber, a fanu leh a nupui hual chán chunga kawng dik a zawh luih tâng tâng dàn te; a sum leh pai neih ang ang ui loa pe thìntu a nihzia te; naupang damdawi in leh cancer natna veite tána damdawi in a dinsak dàn te; amah ve thung chu vàntláng ban phâka a awm thin dàn leh, New York City sub-way hmang tea a veivah mai thin thute ka ziah tawh kha.

Reeves hian “The Matrix” franchise-a special effects leh costume designer-ho tán sum tam tham tak a theh chhuak a; “The Matrix Reloaded”-a stuntman zawng zawng, Harley-Davidson motorcycles a leisak vek bawk. “John Wick” film hrang hranga stunt team-ho pawh, sana man to, Rolex a present vek tawh bawk. “The Matrix” an chan laiin, an channa tùr hmun siamtu pa pakhat hnênah, Krismas present atán dollar sîng hnih a pêk ngawt tawh bawk kha! Chuti zât zât sum a pe ngawt mai chu mi dangin an lo hria a ni chék ang chu; a chhan an zâwt a. Ani, Reeves chuan, ‘Amah vànga film hi puitlin thei aläwm kan nih,’ a ti thên mai!

‘Sum hi keia tán chuan eng tihna vak mah a ni lo! Tam tak ka thawk chhuak tawh; mahse, kei chuan nun hi hlim taka hman ka duh a. Ka rilru ti hah tùr khawpa ka bank account sawh muk ka duh lo! Sum ka pe chhuak a, kei chu mawlmang takin ka awm mai a, hotel atang paw’n suitcase pakhat nèn ka chhuak mai thìn. He thu hi kan hre vek—rilru leh taksa hrisèlna hi sum tam tak neih aiin a hlu zâwk, tih hi,’ Keanu Reeves chuan a ti tlat. A thua hre mai loin a thawhin a thawk chhuak bawk a ni.

Ni e, Bible-a Lal Isua thu sawi kan hmuh: “… sum ngah hi mihring dam chhan a ni lo ve,” [Luka 12:13 (b)] tih kha a lo dik ngawt mai! A dikzia chu keini sum nei ím ém lo nun atang ngawt ai chuan, nei tak takho nunah hian a chiang zâwk nge nge thìn.