Chhanna: Covid-19 tia kan hriat lar hi, natna inkaichhawn theih (Communicable diseases) chi khat, Coronavirus Disease a ni a, a thlentu hrik hi Severe Acute Respiratory Syndrome Coronavirus-2 (SARS-CoV-2) a ni. He hrik vanga harsatna hi Wuhan, China ah hriat hmasak ber a ni a. Chuta \ang chuan reilote ah khawvel ram hrang hrangah a darh ta a, India ramah ngei pawh mi 83 (India mi 66, Foreigner 17)-ah hmuh chhuah a ni tawh a (ni 14.03.2020 India ram statistics-ah chuan), mi 10 enkawl dam an ni a, 2 an thi tawh bawk. Tun dinhmunah chuan China bakah hian Italy, Iran, South Korea, Spain, Germany, France leh USA-ah te a darh nasa zual bik a, USA phei chuan an ramah emergency a puang rup tawh a, Europe ram lam a\anga lut turte a dang nghal rup bawk.

Covid-19 hi hrik inkai awlsam tak mai a ni a, boruak (air-borne) leh khuh/hahchhiau a\anga rawn chhuak, a tlakna hmun a\anga inkai darh theih a ni bawk (droplet infection). A inkai darh kawngah hian a hrik pai tawhte khuh/hahchhiau emaw a\anga boruak a leng lo kai an awm thei a, a hrik tlakna lai khawih fuh hnua a khawihtuin a hmai a khawih (mit, hnar, ka) a\anga kai leh chhawng a ni thei bawk a. Chutih rualin an kai dan hriat chhuah theih mai loh an awm bawk. Chutiang avang chuan inven kawngah pawh hian hmalak dan thiam a ngai hle mai a, Wuhan, China lam phei chu a khaw pum an khar nghal rup a, luh leh chhuah an khap bur a, chutiang avang chuan a darh zel tur hi an control \an niin mi thiamte chuan an ngai reng a ni.

Virus hrik chi reng reng chu a buaithlakna lai ber chu an insiam danglam hma (mutation, new strain) a; chuvangin, a thahna damdawi pawh hmuh chhuah mai a harsa reng a. HIV-te ngei pawh vawiin thlengin a tihdamna (curative) treatment an la hmu chhuak thei lo reng a ni. Tuna Coronavirus pawh hi mi thiamte chuan chi hnih awm niin an hre tawh a, a thawk muang leh thawk rang chi a awm hrang niin an sawi. Engpawhnise, a veite enkawl kawngah hian a tihdamna damdawi hmuh chhuah a la nih loh avangin an dinhmun azira enkawlna (Symptomatic Treatment) hi kan tih theih chhun chu a ni hrih. A la na zualah chuan thawhah leh thawk harsa te a siam theih avangin Ventilator (khawl hmanga inthawktir) khawl hman te a \ul fo bawk.

A inven kawngah hian thuthang dik lo a tam khawp mai a. Mi ti chiai leh hruai sual zawnga thu theh darh ching an lo awm bawk nen, mipui kan chiai phah a, a buaithlak duh hle. I rawn zawh Zu chungchang pawh hi thuthang dik lo a ni a, zu hian a veng thei lova, amaherawhchu droplet infection lakah hian alcohol-based hand sanitizer (kut silfaina alcohol tel) hian engemaw chen chu a veng ve thei thung. A inven dan \ha ber nia mi thiamte sawi chu: sawhbawn hmang ngeia kut silfai ngun te, hand sanitizer alcohol content 60% aia tlem lo hmanga kut hruk fai ngun te, kut fai lova hmai, mit, hnar leh ka chhung khawih loh te a ni a.

Tin, damlo, a bikin hritlang lam chi, khuh, hahchhiau, khawsik leh thawhah ngei te bul hnaia awm loh a him bawk. A bik takin taksa chak lohna emaw damlohna nei sa, zunthlum, lung/kal/chuap natna nei te, immune system \ha lo te’n an kai hmain an zo lo duh bik hle. Kum upa lamah a zual duh niin a lang bawk. Tin, hritlang awmna khawsik ang chi vanga kan damlo a nih chuan mahni inah tawm ila, mi dang tlawhpawh lo thei ang berin inveng bawk ila, hmaikawr (mask) pawh damlo apiangin hmang thei ila (hrisel \ha pangngai tan a \ul ber lo), khuh/hahchhiau chuan kut lawnga hnar khawih lovin kiu (elbow) chhung lamin hnar hup ila, a nih loh chuan tissue paper emaw hmang mai ila, hman zawh hnu paih zel bawk ila, rawmawl kan hmang a nih pawhin tumah dangin min hman \awm lo se, ni tin a thar hman zel ni bawk se. Droplet infection laka inveng tur hian kuta kan khawih tam dawhkan, kawngkhar hawnna, light switch, phone, computer keyboard, toilet leh wash basin te silfai ngun a pawimawh hle.

Tun dinhmunah hian a test na kan ram bikah kan la nei lova, inrinhlelhna nei te chu an khak emaw hrawk hnang swab te an la a, India sorkarin test na hmun bik a buatsaihah te thawn a ni. Ramri-a kan in check ber hi chu body temperature (khawsik neih leh neih loh) a ni a, hei bakah hian a lan chhuah dan (symptoms) an neih leh neih lohte uluk taka zawhfiah \hin an ni. Amaherawhchu. insawiselna la nei lo chunga a hrik lo kai an awm theih avang hian a rintlak reng loh. Chutiang avang chuan tun dinhmunah hi chuan zin chhuah loh te, mipui kalkhawm tamna ang chi te buatsaih lo thei ila, biak in inkhawmte em chu han khap theih a ni lo chungin insawiselna nei leh damsamlote chu inkhawm insum nachang hriatte pawh a hun hle awm e. Kan sorkarin inkaihhruaina a siam tawh ang khan thuthang reng reng chu Principal Director, Health & Family Welfare Dept a\anga chhuak anih loh chuan rin loh nise. Kan hriat belh duh a nih pawhin WHO leh CDC website ah te in update a him ber zel e.