Ka sîr chiaha thu, nula ni ngei tûra ka ngaih chuan hnuai lam a bih ngar reng a—nichin atang tawh khan. A vodka no chu a thlîr leh ringawt thin. A sip leh zeuh zeuh bawk thin. Hnuai lam a bih zui leh daih zêl. A no chhûnga tui satliah ni lo tling kiau leh chhuat ringawt chu a hmu thin—a thlîr chhâwk a ni zâwk mah. A kianga thu ve chu tunge ka nih tih lam a ngaihtuah hlek lo.

New Delhi-a ka bar ngainat ber leh ka luh chhuah tam bernaah chuan zanin tlai pawn ka tei lût leh a ni. Chevas peg khat ka tlâk tawh; peg khat dang ka dawm leh mêk.

‘Zawhna ngai hlîr dawn hi ka ning!’ a rawn ti chhuak hlawl mai—nula-i chuan. Tunge a biak pawh chu ka hre lo … ti ila, kei lo chu amah hnaihtu mi dang an awm si lo.

Ka chhân hma hauhin, ‘A ngai tê bawkin, “Eng nge i harsatna? Engati nge i buai reng?” tih hlîr zawhna dawn reng hi ka ning ve! Ka chhâng peih hlawm lo! Min ngaihsaka ka harsatna min hriat thiampuitu tak tak an nih pawh ka ring hlawm nek lo e!’ a rawn ti chhuak nuah nuah ringawt a. Ka la ngawi reng. Ani pawn chhuat chu Brad Pitt-a thlîr takin a thlîr châwl chuang lo.

‘Ka ning hlawm mang e—ka buainaa buai ve tum phetho hi!’ a rawn ti leh hlawl a.

Ka tawng ve ta a: ‘Thiannu, pâwnah sâwn chhuahsan che ila pawi i ti em?’ tiin.

A vawi khat nân ka mitah tak min rawn melh chho hâ a, ‘Aih! ih…’ a ti a, ‘Pâwn thlifîm va dawn ka duh zâwk a. Ka chhuahsan zâwk ang che… Mahse, pawi i tih loh chuan, pâwn khaw vâwta thutpui tûr chu ka duh khawp mai…’

Bar kawta thut hah chawlhna thutthleng seiah chuan kan thu dûn ta a.

‘Awiiii! A va vâwt ve… zanin chu!’ tia a kut nuai sawk sawk chungin hnuai lam bawk chu a bih leh a. Rei lo te hnuah a rawn hawi chhuak. Vân lam thlîr chungin a rawn thaw khu halh halh a. Thianpa, min lo hrilh teh…’ a ti ringawt a.

A lam ka hawi. Ka lam a rawn hawi ve duh chuang lo! A Marlboro Lights cigarette chu a tan khu pap a. Hnuai lam bih ngur chung bawkin, ‘Engati nge hetiang zân khaw vâwta pâwna min zui chhuah duh... tih hi?’ a ti zui.

Chutia min zawh tâk thut avâng chuan, ka ho chungin, ‘A! Pâwna awm hi ka duh zâwk a. En teh … ahh! Delhi-ah ka la awm reng hi… ka normal a ni chiah tawh lo a... Chu vâng chu a ni ve tho. Ihh ... ka hna thawhnaa kai sàna Dubai lam pan chu a hun ve tawh lutuk maw le! Huiii… Mahse, ahh… nang pawh… i sneakers bun lai hi … Adidas tree leaves logo chuang a nih ve tho hi… 90s tîr lama mi ang kha…’ ti buh nuai chungin, amah chu ka nuih tlawn pah a—za lo zetin.

Chutah, min rawn melh ta siah mai le! A mit meng chu ka vawi khat hmuhna a ni! A thaw halh. A thâwk chhuah boruak rit tak chu, vâna kaitîr ang hrimin chung lam a thlîr chho zui vawng vawng a. A thaw nawn leh—thla êng thlîr zui chungin.

A vawi hnih nân ka mitah tak min melh leh; chutah ka kutzungtang vei lama ka zungbunah.

‘Nupui i nei tawh a ni maw?’

‘Nei tawh e. Amah ka nghâk mêk. Zanriah kîl chhuah kan tum a,’ tiin ka chhâng a.

‘A rawn thlen hma chu keima thawnthu min ngaihthlâksak hman dâwn a ni maw?’

‘Teh rêng mai. Ka ngaithla nghâl e.’

A thawnthu chu a sawi ta a. A hringnun thawnthu—ngaihnawm leh lungchhiatthlâk tak chu. A sawi pah chuan kan mit leh mit chu a intawng leh siah thin. A ngampa ta fû. A sawi pah chuan chhuat leh chung lama thla êng a en kawp sek bawk. Vawi khat pawh a tawng lai chu ka ti buai aih lo. A sawi zêl. A tawngkam tin mai chu by-heart tum niâwm hrima ulukin ka ngaihthlâksak vek a nih chu.

A sawi tâwp lamah chuan a thawnthu chuan a mittui a ti tla ta a. A kut lâwng chuan a mit chu a nuia hul a. A sawi zawh rual chuan, ‘Khaw lo min ti em?’ a ti ta mai!

‘I kut ding lam kha, i âwmah han dah teh,’ ka ti ngawt a. A dah. ‘Eng emaw i feel em?’ka ti a.

‘Ka lungphû ka hre thei.’

‘I mit han chhîng leh teh,’ tia ka hrilh leh hnuah a kut pahnih chu a hmai chûl tûrin ka ti leh a. A ti leh. ‘Eng nge i feel leh?’ ka ti leh a.

‘Ka mit, ka hnâr leh ka kâte ka hre thei…’

‘A that chu,’ ka ti mai a, ‘…mahse, nangmah ang lo deuhin thawnthu chuan lungphûte hian, mit, hnâr emaw hmai emaw an nei ve lo asin. A chhan chu, thawnthû chuan keini angin nunna an nei ve tlat lo a—mihring an ni ve lo—thawnthu mai an ni a!’

Ka mitah tak min rawn en leh sak a. Kan inkawm chhûnga a vawi khat nân a nui ta! ‘Thawnthu… a taka ka tâwn tlang tawhte kha maw?’ tiin min en hâw chungin min zâwt leh a.

Nula-i chu nuih lêt sak pahin, ‘Ni e … inzir nâna i tangkaipui ber tûr leh i zirtirtu ropui ber, khâng i thawnthute kha,’ ka ti ta a.