K Lalrinchhana hi Neihthangmawii leh K Zonghinga te fa upa ber niin kum 1980, August 4 ah Samthang khua, Champhai district-ah a lo piang a, nau mipa pakhat leh hmeichhia pahnih a nei a ni.Zirna lam: Samthang Primary School-ah zirna bul tanin, kum 1997 khan Samthang High School atangin matric a pass a. Government Mizo Higher Secondary School, Aizawl-ah zir chhun zawmin, kum 1999 khan pawl 12 (HSSLC) a pass a, Mizoram-ah pahnihna a ni. Government Aizawl College atangin B.A. (History) a zo leh a, kum 2005 khan Mizoram University atangin M.A. (History) a pass leh a, an batch-ah pakhatna niin Gold medalist a ni. Hemi kum vekhian UGC NET exam chu a through nghal bawk.

Eizawnna: Kum 2007 ah Government Serchhip College-ah Lecturer hna a zawm a, tunah hian Assistant Professor (Stage-3) ni mekin History department-ah Head of Department a ni mek bawk. Government Serchhip College-ah hian MCTA (Mizoram College Teachers Association) branch-ah kum 2014 atang khan Secretary hna a chelh bawk.

Chhungkaw dinhmun: Kum 2008 October 8 ah Lalvurzeli d/o Thangchungnunga, Dinthar Vengthlang nen an innei a. An inneih atanga kum 6 naah an fa hmasaber Isak Vanlalpeka chu kum 2014, October 21 khan a lo piang a. An fa pahnihna K Vanlalmawizuala chu kum 2019, November 21 khan an neileh a, tunah hian New Serchhip, College raod-ah an chhungkuain an khawsa mek a ni.

Thu lehhla lama a sulhnu: K Lalrinchhana hian thu leh hlalamah sulhnu chhuan tham a nei lo a, kum 2013 leh 2014 khan New Serchhip Bazar Branch YMA Chanchinbu ‘Chhemdam’-ah Editor a ni a, Vanglaini chanchinbu ah leh magazine-ah te article a ziak zauh zauh bawk. Kum 2018 atang khan Facebook-a a wall-ah kar tin, Thawhtan tuk apiangin article a ziak thin a, kum 2019 August thla atangin Zalen chanchinbu-ah columnist a ni tan a, a column hming chu ‘Kamchhuak’ tih a ni. Tunah hian UGC referred journal-ah publication pathum a nei tawh bawk.

A thu ziak ziarang: K Lalrinchhana hian a phak ang tawkin mihring nun siamthatna lam hi a ngaipawimawh hlea, mizo thalaite hian ngaihsan tur dik ngaisang ila, ngaihhlut tur dik ngaihlu ila, entawn tur dik entawn ila, kan nuam tih vanga kan hmalam hun atana tangkaina nei lo Kohhran leh khawtlang thila kan inhmanna puarpawleng tam zawk hi ban san ila, hnam changkang leh hmasawn zawk te tih dan thalaite chu i entawn zawk ang u tih hi a duh dan a ni.

Mitin zikchhuahna chhungkaw nun a dah pawimawh hle bawk. Nupa inkungkaihna leh seilenna chhungkaw boruakin a tha lamin emaw a chhe zawng pawh a mihring nun a nghawng nasat theih dante, naupang seilenna tlak chhungkaw boruak hrisel nei tura nu leh pa pawimawhna te a thu ziakah hian hmuh tur a awm nual bawk. Tin, ram inrelbawlna tha duh mi a ni a, politics tha loin mihring chhungril nun (morality) a tih chhiat theih dan te, mihring inkungkaihna leh ram leh hnam inpumkhatna hial pawh a khawih pawi theih dan te, politics tha lo chu ram leh hnam tlukchhiatna hmahruaitu a nih theih dante pawh a ziak lang thin bawk.

Tuna kan lehkha zir dan phung, zirna bul tan phat atanga naupangte sap tawng (English) a kan zirtir nghal mai te,mahni pianpui tawng (mother tongue) kan mausam ta lutuk te, naupang school kan luh hma tir lutuk te, a tir phat atanga zirna pangngai (formal education) kan pe nghal mai hi a ngaimawh hle a,zirna in a tum bulpui ber chu mihringa pianpui theihna (inborn/innate capacity) hai chhuah a, hman tangkai a, rilru themthiamna (creative mind) nei tura inkaihhruai leh mihring hman tlaka inchherchhuah te a nih laia exam oriented a kan inzirtir nasa lutuk te, exam result chu zirna tha tehfung pawimawh bera kan hmang te, a bulfuma zirlai hriatthiamna tak (conceptual clarity) nei sil oa by-heart system kan uar lutuk te hi a ngaimawh hle a, helam hawi hi a article-ah hmuh tur a awm nual bawk.