Zawhna: Kum 28 ka ni a, kg.71 lai ka ni a, engtinnge ka cher theih ang? Tlan vel dawnin hun awl ka nei si lo, nau ka pawm si a, ei tlem a theih si loh, zun tlem na ei in a cher deuh thei ang em? Ke sa ka nei bawk a, kum 16 lai ka tuar tawh, thau a ti zual si, a sain min awi a mut a ti chhuak a, ka mangang khawp mai. Min pui thei em? 

CHHANNA : I kum zat leh rih zat i rawn ti lang a, i san zawng (height) rawn sawi tel la chuan i tana rih zawng dik leh tha (ideal weight for height) ka hrilh thei tur che ania. Engpawhnise, chart ka rawn tarlan atang hian i ideal weight chu a hriat theih ang. Chuan, Body Mass Index (BMI) hi teh nana an hman common ber chu a ni a. A chhut dan chu: Weight (in Kg) divided by square of your height (in meters). I san zawng hi 5 feet 3 inches (1.6 meters) lo ni ta se i BMI tur chu: 71÷ (1.6 x 1.6) equal to 27. I BMI chu 27 tihna a lo ni ta ani. BMI hmanga an teh danah chuan 18.5 aia hniam chu Underweight, 18.5 - 25 hi Ideal, 25-30 hi Overweight, 30 chunglam hi Obese (thau over lutuk) an ti thin a ni. 

Nau i pawm a, hnute pe lai i nih a rinawm a, chuvangin in diet chiam kha thil tha ber a ni lo (naute khan chaw tha a mamawh vangin). I rawn sawi ang hian naupawm tan chuan exercise lak hi thil harsa tak ani bawk. Pawimawh ta chu ina i awm laiin physical activities chi hrang hrang hmangin exercise hi a lak theih a ni. Internet i en theih chuan mahni inchhunga awlsam tak taka exercise lak dan en tur a tam a. Puan suk, chhuat nawh, puan pho te ang hi exercise tha tak an ni hlawm a. Chubakah chuan mu chunga dul thuar exercise te (crunch exercise), step thui lem lo pawh kal sek te, Yoga exercise thenkhat te pawh a tih theih a ni. 

Ei leh in lamah hian chaw pangngai tak ei hi thauna ani hran lova, pawimawh zawk chu Balanced diet ei hi a ni. Rice hi calorie a san avangin Oats te hi zan lamah ei thung la, emaw Atta siam sa (frozen) lei tur te pawh a awm tawh a, chung te chu ei ta la. Tukthuan ei tam hi chu a pawi hran lova, zanriah erawh a zang thei ang ber ei thung la, thlai hnah hring ei tam la, dal chhum han te pawh hi a tha khawp mai. Junk foods (fast food-chow, fried rice, rolls etc) te hi thau a awl duh viau bawk a, kan taksa tan a tangkai lo khawp bawk. 

Mawm lam pawh insum theih a tha viau. Intih cherna atana damdawi ei hi chu chin loh tawp a tha ber. Zun tamna te hi ei loh tawp tur; thil dang a khawih pawi thei. A then chuan ek tamna te an tia, an ei fo bawk. Heng ai chuan a theih dan anga balanced diet ei leh, exercise lak (ka rawn tarlan tak ang te) te hi a tha ber zawk chu a ni. Ke sa i neih nasat chuan Thyroid Function Test lo ti thei la, thyroid lam fel lo hian (a bikin Hypothyroidism) mi a ti thau duh viau bawk. Nau hnute pe lai i nih bawk chuan Hb pawh test tel thei la a tha hle; Hb hniam hian ke sa an nei duh viau bawk a ni.