Taksa hrisel leh inenkawl uluk kawngah hian thalaite an harh thar nasa hle a, thil lawmawm tak a ni. Gym leh Fitness lama ei zawn kawngah pawh kan harh thar nasa a, thil lawmawm tak a ni. Tunlai thalai, mipa leh hmeichhia tam zawkte hian an intihhmuh nasa sawt hle a, fashion lama intlansiak ngawt ai chuan a duhawm a (keima ngaihdan), intihhmuh zual deuh deuh se, nu leh pate pawhin kan fate heti lam hawi zawng hian fuih ching ila, thangthar hrisel kan ngah poh leh kan hnam a hrisel a ni mai dawn a ni.

Fitness chungchang hi erawh kan hmuh dan leh hriat dan kan her danglam hret a tha hle. Taksa hrisel tur chuan ei leh in uluk a pawimawh em em a, chutiang bawkin taksa sawizawi tam a pawimawh hle bawk. Sek hi fit emaw tih a awl khawp mai a; mahse, a ni ngawt lo. Sek deuh; mahse, in-fit si lo a awm theih. Chutihrualin taksa rawn sek mawi tur chuan fit a ngai hle thung. Tleirawl leh thalai Gym kal tam tak hian (a bikin mipa) an rilruah an tinzawn ber chu sek mawi tak nih hi a ni.

Sek tur chuan hun a duh a, chumi nghak hman lo chuan Gym kal tam tak hian an sek thuai theih nan supplements ei nghal mai an ching a, a bik takin steroids khawih tel an ching a, hei hi a him lo hle a ni. Steroids lam chi reng reng hi kan hormones tibuai thei thil a ni a, an hman hian an sek ran phah tehmeuh mai a; mahse, an lung (heart) lamah harsatna a siam thei a, heart attack a thih thutte pawh thleng thei a ni. Hei bakah hian thin hnathawh buai a thlen thei a, mipa chi a titlem thei bawk. Hman loh a him ber.

Nu leh pate tana kan fapate kan fimkhurpui tur chu a hun hmain intihsek an tum ang tih hi a ni. A tlangpui chuan mipa hi kum 18 vel thleng an thang a, kum 20-30 inkarah hian an tihrawl a rawn insiam tam theih hun lai a ni bawk. Chutiang avang chuan kum 18 an tlin hmaa body building exercise an tih nasat lutuk chuan an ruh insiam a fuh lo thei a, an than chin tur an thleng pha lo thei bawk a ni. Mipa tleirawl gym kal thar hi chu a tam berin sek an châk nghal lo thei lo nen, fimkhur a ngai hle. Chutiang avang chuan Gym hian trainer an neih that a pawimawh hle.

Kum 18 an tlin hma hi chuan strength training lam hi a pawimawh hle a. Chumi tur atan chuan cardio workout-te pawh an tihtam a tha bawk. Cardio exercise lama an in-fit na na na chuan a hnu lamah weights training-ah pawh a pui nge nge thin. Chuvangin, kan fate an phur viau a, sek an hmanhmawh viau pawhin an kumin a la phak loh chuan a chin tawk kan hriatpui a tha. Chaw an ei that pangngai chuan supplements tih vel pawh an mamawh belh reng reng lo.

Hmeichhe lam hian weights training (ritchawi lam chite) hi sekna emaw an ti mai bawk thin a. Strength (chakleh fit) nei tura exercise tangkai tak a ni thung. Chutiangin lâm (dance) chite hi exercise tha tak a ni bawk. Thau duh bik hi an awm a; mahse, ei leh in uluk a (in-diet vak vak ni lovin), chumi mil tura exercise uluk taka lak hi thau lutuk (overweight) laka inven nan chuan a tha ber a ni. Diet chungchangah hian cher duh vanga inhrek vak ching an awm thin. Kan taksa mamawh zat kan lak luh ngei a tul avangin inhrek lutuk hian malnutrition a thlen thei a ni.

Gym a kal hi intihsek emaw, in lak fit ngawt emaw a ni lo va, natna neite tana enkawlna tha tak a ni bawk. Thisen sang, zunthlum leh thau lutuk natnate tan enkawlna tha tak a ni a, hei bakah hian ruh lam fel lo te, hnungzang natna nei te, cher lutuk te thleng pawhin an tangkaipui thei a. Nau pai thei lote tan pawh gym an kal hnua nau pai leh ta maite pawh an awm bawk. Chuvangin, intihhmuh zel ila, hnam hrisel nih i tum tlat ang u.