Patling lo haw kawngkhar ri hlaua in chhung atanga ar thlawk chhuak, “A nu nge a pa?” ti khawpa kawpuite laka thikthu chhia an awm an tih thin kha. Awm lo lutuk thlenga nupui pasal leh ngaihzawngte thik an awm thin.

Kawppuite laka thikthu hi a awm tur a ni. Hmangaihte laka thikthu neih ve hi hmangaihna kalpui a ni. Thikna hi rilru dik lo a ni vek lo. Kawppui lerh deuh nei tan phei chuan thik thu hi chhe ve tûk tur a ni tho. Thikthu chhiatna hian min veng tawn ve fo thei.

Mahse, dik lo chin a awm. Thil thleng tak tak sawi fak tur awm miah lo chung pawha thikthu chhe tlat an awm thin. Inlaichinna a tichhe thei. Ngaihtuah dan leh rin dan dik lo, a dik lohzia hrilhfiah pawha dik lohna pawm thei lo, a dik anga hre tlat hi natna a ni. Saptawngin Delusion an ti.

Rin dan leh ngaih dan hrim hrim hi a dik lo thei. Kan ngaihdan apiang hi thudik a ni vek lo. Kan seilenna azir te, kan lehkha zir san zawng azir te, kan sakhua azirtein ngaihdan hi a inang lo thin. Chung zawng zawng chu Delusion an ni kher lo. Ngaihdan dik lo hi a dik lohna hriat hnua ngaihdan thlak leh mai thin kan ni. Chu chu mihring nih phung tur a ni. Rin dan dik lo sahuai thing vawn tlat, a dik loh dan engkim sawi fiah hnu pawha ngaihdan sawh sawn miah lo, pawm nghet tlat, dik nia ngai tlat, dik nia an ngaihin an nunphung nghawng danglamtir tlat hi delusion an tih chu a ni.

Kawppuite laka thikthu chhe uchuak hi Delusion of infidelity (Delusion of jealousy) an ti. Shakespeare a thawnthu behchhanin Othello Syndrome te an ti bawk. An kawppuite chuan rinawm lohsanin, ngaihzawng dang neiin an hria a, an thin a rim a, an enthla a. Nilengin an chhui ru a, kawppuite phone khawih laia lo khawih ve nia an hriat apiang an puh a, tunlai tawngkam takin, ‘an online rual zel alawm’ te an ti a. A then phei chuan kawppuite phone an khawih ru a, tutute hming emaw an zawng a, hmingte an lo thlaksak thul! A then phei chu uire ngeiah an inpuh a, an thawmhnaw an keu a, an hnim a, eng emaw kai hlekte kha ‘tui hnang’ kaiah an puh thul! Rinhlelh zawk nun a chep em em a. Kut lo inthlak tate an awm fo. Chinfel a nih loh phei chuan thil pawi lian, mahni intihhlum leh tualthah thlengin a thleng thei. Innei zui hleithei loa inthen an awm fo a, chhungkua a keh a, a nghawng a thui thei hle.

Thik tur awm ngei, inlerhsan ngei, a finfiahna pawh awm thlap laka thik thu chhia hi Delusion a ni ve lo.

Thik tur awm miah lo thik tlat hi nupa karah kan hmu hnem fu. A thiktu chhe zawk kha enkawl an ngaih laiin a thik thu tuartu zawk an lo kal thin. A thiktu khan a dik lo tih a inpawm si lo a, rilru dik lo pu a nih tih a pawm duh si lo a, rilru daktawr pan duh tul tihek lo le! A thika nun hrehawm leh chep mangang zawk kha an lo kal zawk fo.

Hmangaihnaah hian inrin tawnna a awm tur a ni. Inrintawnna tel lo inlaichinna hi a hahthlak a, a buaithlak a, a manganthlak. Inkawp duhte chu an kawppuite lakah an rinawm ngei bawk tur a ni. Rinawmna tel lo inlaichinna hi a tenawm em em a ni.

Thikthu chhiatna awm tak thil hi chu a awm ve. Dik takah chuan, pating nutlingin tuma hawn ve theih loh turin an phone an kalh a, a hawn theih dan an tidanglam sek a, mi dang khawihsak hlau em ema an vil khur reng mai hi chuan ngaih chu a titha lo ve alawm. Rin em em laia rinawm lozia hmuh tlat chuan thik thu hi a chhe ve tur pawh a ni. Thik thu a chhiat viau hian kawppuite an dik loh vang a nih theih rualin mahni pawh kan dik lo thei ve tih hriat tur. Hmangaih lutuk avang te, chân hlauh lutuk avang te, a tun hma nun avang te, mi dang chanchin hriat avangtea hlauhthawnnain rilru a tihdik loh a ni ve thei. Ruihtheih thil tih vangin rilru dik lo a awm thei bawk.

Inngaihzawn leh inneih nun hi hlimpui tur a ni. Thik thu hian nun a tihbuai ve avangin hemi kawnga tihdan tur tlem tein aw:

I kawppui kha ring phawt teh. Rinawm bawk la. Tlangkam titi leh finfiahna awm lo thil ai chuan hmangaih berte thusawi hi rin phawt tur.

Rinhlelhna deuh neih chuan thinrim miah loa sawi dun tur a ni. Inchhui ruk ai chuan a langa titi a tha zawk. Titi dun thei lo khawpa in inlaichinna a tha lo a nih chuan thik thu chungchangah lo pawh chinfel tur a tam sa.

Tu emaw awm dan leh chet dan chhuiin nileng ringawt suh. |angkai la, hna thawk la, thil dang ti rawh. Phone khawih nilen ngawt loh tur. Ruihtheih thil ti suh.

Thik tur awm ngei finfiahna awm lo chunga i thik thu a chhiat viau chuan, rilru daktawr pan hreh hauh suh ang che u. Hlim tak leh hahdam zawka nun hman zui mai theih tura inpuih theih a awm a nia. Ngaihtuah dan dik lo, delusion hi damdawi nena enkawla reh thei a ni. Thikthu chhe damdawi a awm a nih chu!!