Luangliam

Tu nge mi fel kan tihte chu?

Zirsangkima - Apr 18, 2021

Inhmang peih lo leh mi dazât kan tam ta lutuk | Mahni zâwna tih tûr tlak, tha taka ti thinte hi an tilangsâr ta luah | ‘an ti fel’ ta êm êm mai ni pawhin a lang |

‘Ani chu a hun takah pisa a rawn thleng chat chat zêl a; tlai bân hun hmain a hâw ngai lo, a fel tak tak a ni,’ kan tih te hi mi fela kan ruat vek zêl a nih ngai chuan kan thil thlîr dân, kan rilru chhung ril (kan moral) a tawih tawh hle tihna a ni ang!

‘Ani chu ruihtheih thil a ti lo a, a KTP khawp mai a, inkhâwm a pelh ngai lo; a fel tak tak a ni aw…’ te hi kan han inti a; chu chu thalai mi piangthar, Kohhrana inhmang tih tûr rêng a ni—a va fel ta lua e, tihna a ni hran dâwn em ni? Inhmang peih lo leh mi dazât kan tam ta lutuk hian, mahni zâwna tih tûr tla, tha taka ti thinte hi a tilangsâr ta luah a; ‘a ti fel’ ta êm êm mai ni paw’n a lang.

‘A zir lai a zir nasa a; phone pawh a khawih tlêm a nia aw… a fel tak tak,’ te kan inti a! Zirlai a nih chuan a zir lai, taima taka zir kha a tih tûr ve rêng a ni. Taima taka lehkha a zir avanga mi fel a nihna chhan a awm dâwn chuang em ni? Hei pawh, zirlai thatchhe tak tak kan tam tâk avanga ‘lang fel’ niin a ngaih loh theih loh leh bawk. 

Tin, phone khawih tlèm hi felna a nih chiamna chhan ka hre hran hauh lo. Duh duh huna biak hman leh message chhâng reng hmanho hi, an hnaah an tangkai hman reng ang em? Lehkha chhiar nân pawha hun pe hman lo, in lam sekrek khawih nân pawha hun hman hman lo lêka social media lama fawr kual fawr kual thin mi zahawm tak ka la hmuh ve loh vang pawh a ni mahna le!

A nih chuan fel chu a va har âwm ta lo ve! Zu in loha zûk leh hmuam tih loha, Kohhrana inhmana class kal thata pisa-a tlai loha bân huna bân chat chat emaw, eirûk loh emaw mahni thawh tûr ni hauh lo contract lo thawh ve ngawt ngam loh emaw, phone khawih tam aia lehkhabu chhiar tam emaw kha, ‘mi fel’ chu a ni ta mai em ni? Minister emaw MLA emaw ka nih avanga ka thawh tûr ka thawh, chanchinthara puan zâr chiam zêl hi em ni politician tha, ‘politician fel’ ka nihna chu?

A nih leh, tunge mi fel chu ni ta le? Mahni hna thawh tûr tlin taka thawh bâka a aia tha zâwka thawh belh tum tlat mi te; hun âwl hmang tha te; mi hriat tûl ti miah loa mi dangte tana malsâwmna thlentu te; mite bula tlak duah loa nun leh hnaa Pathian \ih tlat mite hi an ni zâwk dâwn lo’m ni mi fel chu?

PL Liandinga lehkhabu lehlin, ‘Hei Le Vawiin’-a thawnthu pakhat, tha ka tih êm êm, zirlaite hnên pawha ka sawi fo thin hian hmâwr i’n bâwk dâwn teh ang (a kaihtawi nân a ziak ang dik diakin ziak chhâwng lo mai ila).

Hmeichhe unau pahnih, company pakhata hna inang, hlawh pawh inang hlawha thawk dûn hi an awm a. Tum khat chu a nau zâwk hlawh chu a rawn pung bîk ta tlat mai. A chhan an hre lo hle mai a. An pa an hrilh chuan pa ber chuan a tûkah an pu chu a va hmu ta a.

An pa chuan, ‘Sir, ka fate pahnih hi an hnâ leh an hlawh a inang reng thin a; mahse, eng vangin nge a nau zâwk hlawh hi a pun bîk?’ tiin a zâwt a. A fate boss chuan, ‘Ka pu, saw lai parda phênah sâwn lo va biru la, rei lo teah i fanu naupang zâwk hlawh pun bîkna chhan hi i hre mai ang,’ a ti a; chu putar pawh chu parda phênah chuan a va biru ta a.

An boss chuan a û zâwk chu a ko lût a. ‘Naktûka meeting ka koh kha a tel tûrte in hriattîr vek tawh em?’ a ti a. ‘Aw, an hre vek tawh e, Sir,’ tiin a chhâng mai a. An pû chuan, ‘A that chu, a lâwmawm e, a tâwk e, Sir,’ a ti a. A chhuak ta a.

An boss vêk chuan a nau zâwk chu a ko lût leh a. Zawhna ngai chiah: ‘Naktûka meeting ka koh kha a tel tûrte in hriattîr vek tawh em?’ a ti leh a.

A nau zâwk chuan, ‘Sir, an hre vek tawh e. Thu rêl tûr zawng zawng pawh ka print chhuak vek a; an dawhkân theuhah ka dah tawh a. Conference room lam pawh ka bia a, naktûkah i hoin meeting a awm dawn tih ka hrilh vek a; tihfai pawh an tifai vek tawh e,’ a rawn ti ta thung a.

A nau zâwk chhuah hnu chuan parda phêna biru an pa chu a ko chhuak a. ‘Ka pu, an hlawh a inthlauh tâkna chhan chu i hre thiam tawh em?’ a ti a. An pa chuan, ‘Zawh leh tûr dang rêng ka nei tawh lo che Sir. Ka lâwm e,’ a ti ta a.

Keini Mizo chu ni ila, ‘inla fel’ nihna (title) kan pe leh mai lo’ng maw? 

CNN âu-hla (slogan/tagline) pakhat, ‘Go Beyond Borders’ tih thu hian thu tam a pai a nia! Kan hmaa tih tûr, kan koa tla hlen satliah mai loa, a pangngai aia tha zâwka ti thin emaw tih tuma bei thin emaw te hi, kei chuan, ‘intifel’ ti loin, ‘mi fel’ ka ti zâwk thin.