Tunlaiin Zu Khap Burna Dan (MLTP Act,1996) hlih leh a thlakna tur dan thar (MLPC Bill, 2014) siam chungchangin sawi a hlawh hle a. Zu khapna dan chu thu hran ni ta se, zu chungchangah hrim hrim pawh hian mipui ngaihdan a phel phawk ni berin a lang a, hetia ngaihdan nghet tak nei sa kan inhnial luih luih lai hian fim taka ngaihtuahna sen erawh a ngai khawp mai. Kum sawmhnih dawn lai Mizoramah zu khapna dan hi hman a ni tawh a, a tir te atangin he dan hian sawi leh sel a hlawh nghal a, a tak taka dodal ngam leh hlih a nih theihna tura sorkar nawr ngam erawh an vang viau thung. Chuti chung chuan zu in mi leh in lo mi zingah pawh he dan hi chuan inhnialna a thlen tam narawh e. Kan la hre theuh anga 2009 kum tir lam congress sorkar thar a pian hlim khan chief minister-in thuthar lakhawmtute hmaah MLTP Act ennawn chungchang a sawi lang a, chu chuan zu khapna dan hlih hun nghakhlel taka lo thlirtute a tiphur thar a, media lamah nasa taka sawi zui a nih kha. State Law Commission pawh hmalak tumin an intintuah a, kohhran leh NGO-te hnenah he dan siam that chungchanga sawi tur an neihte thehlut turin an ngen a. Chutiang karah chuan kohhran hruaitute pawh an ngawi reng thei ta bik lo a, June 5, 2009 khan MKHC executive committee chuan MLTP Act tha an tih thu leh he dan hman chungchangah hian MKHC chu a dinna ngaiah nghet takin a la ding reng tih resolution siamin an puang a, zu khapna dan hi tidanglam lova a ngai anga kal zel tha an ti thu an sawi chhuak a. Tichuan pawl hrang hrang leh mimal ngaihdan a inbat chho ta zel a, kan hruaitute thuchhuak nghakin kan lo thlir thap a nih kha. June thla (2009) laihawlah khan chief minister a rawn tawng chhuak leh ta a, MLTP Act hman mek hlih tumna awm anga TV leh chanchinbua lang thin chu sorkarin a hriatpui loh thu te, sorkar level a sawihona a awm loh thu leh chutianga lo sawi an awm pawhin an mimal ngaihdan a nih thu a puang leh ta daih mai a. Kohhran nawrna a zu khapna dan chu siam a nih avangin kohhran rawn lo leh remtihna lo chuan a kaihhruai sorkar leh a party chuan zu khapna dan hi tih danglam a tum lo tih a sawi tel nghe nghe. CM ber a tawng chhuah takah chuan zu thlah zalen chungchanga inhnialna pawh chu a tawp titih zui ta mai a nih kha. 1997 a MLTP Act hman tan a nih lai kha han chhui kir ta ila, zuin khawtlang nun a tibuai nasa hle a, ram hruaitu lawkte zingah meuh pawh zu a fihlim lo sawi kai hial an awm nawk a nih kha. Kohhranin zu khapna dan siam tura sorkar a nawr chhan pawh hi zu in mimal nun mai bakah, chhungkua leh khawtlang nun thlenga a tihbuai em vang a ni. Tichuan, zu khap burna dan chu hman a lo ni ta a. Mahse, sorkar nem tak kan neih thin avangin zu khapna dan hi khauh taka lekkawh a ni ngai meuh lo a, dan bawhchhetu an tam tlukin zu pawh a tam reng a ni. Dik tak chuan MLTP Act hman hnuah hian engtik lai mahin Mizoramah zu a rem tak tak ngai lo a, dan azawnga bawhchhiat hlawh ber a tling hial awm asin. He dan sawi mawitu leh sawi chhetute hian dan huaisen lo tak a ni tih an pha ngai lo a, sorkar hi dan siamtu a ni a, a lekkawhna kawngah pawh thuneitu a ni bawk tih pawh hi an pawm tlang vekin a lang. A duhthawh zual thenkhat chuan kohhran hi sorkar kalphunga dan bawhchhiate a hrem thin anga, zu zuar leh zuruite chunga thununna lek ve turin an nawr fo a. Mahse, kohhran kalphung leh sorkar inrelbawl dan hi a inang lo tih erawh hriat a tha ang. MLTP Act hian a tir te atang khan behbawm a nei reng a, tan chhan tur mumal nei lem lo mi thenkhat chuan drugs a hluar chhanah hial an puh a, zu tha lo a tam phah nia ngai tawk lah bo lo. Grep wine lamah mi tam tak, a bikin thalai (tleirawl/rawlthar leh nula-tlangval) an tlan phah nasa viau niin an sawi bawk. Zu chhe in vanga thih phah an awm leh thin pawh hi zu khap burna danin a hrinchhuah ni a ngai an tam viau a. Heng zawng zawng hi uluk taka zirchian chi a ni a, reseach finding mumal tak awm se a duhawm khawp mai. Zu khap burna danin nghawng a neih zinga a lian tham ber nia ka ngaih ve chu Mizo mipuite zau takin min then hrang hlawk mai hi a ni. Society-a ngaihdan hlawm hnih inperhsan tak awm mek hian innghirnghona (social conflict) a thlen mai ang tih pawh hlauhawm tak a ni...tunah hian a thlen mek zawk pawh a ni maithei. Hetia tai pawng pawnga inhnialna a chawh chhuah tam tak em em lai hian dan hnawksak tia phun phun thin, a rang thei ang bera hlih duhte leh zu zawrh phalna siam mai duhtute thawm hi a ring zawk fo nghe nghe. Dik tak chuan TV leh chanchinbu lamah pawh an thu leh hla chhiar tur leh ngaihthlak tur pawh a tam zawk a tih ngam ang. A tlangpuiin zu in thin, zalen taka a tuitling mai lo deuh han thlit sen zuai zuai thlahlel tak takte hian he dan hi hlih an duh a, an hmanhmawh tlangpui bawkin a lang. An dinhmun hi a in ve ngai lo tan hriatthiam a har tlukin he dan hi an tan a hnawksak a ni. Chutihlaiin, zu in ngai reng reng lo zingah pawh an ngaihdan tawmpuitu tam tak an awm tho bawk a, kohhrana rawngbawltute zingah pawh hian 'a hlip duh zawng ban phar tur' ti ta se phar sang zawk fe fe tur an tam ang. Chung zingah chuan ram pum huapa mi hriat hlawh te, Kohhran upate pawh an tel nawk a ni. MLTP Act hlih duhtute hi a thawm na zawk leh a nawrtu zawk chan chang an nih miau avangin an thawm pawh a ring zawk fo bawk. Thil chiang tak mai chu zu chungchang hrim hrimah pawh hian mipui ngaihdan hi a inthlak fo thin tih hi a ni. Tun hnaiah hemi chungchangah hian mipui ngaihdan lak a nih lem loh avangin Mizo mipui za zela eng zat hian nge zu khap zel duh a, eng zatin nge thlah zalen duh tih hriat a ni chiah lo. Mahse, hetia a lan dan maiah hi chuan khuahkhirh lova zu thlah zalen duh lo hi an la tam zawk a rinawm tlat a ni. Kum 2006 tawp lama Pachhunga University College-a Economics zirlaite'n Aizawl mipui ngaihdan an lakah chuan zawhna chhangtu zingah MLTP Act hman mek hi tha ti 58% an awm a, tha ti lo chu 42% an ni. Chutihlaiin, a hlawhtling ti chu 28% chauh an ni a, hlawhtling ti lo 70% an awm thung. MLTP Act hi hlih ni ta se la kan ramin a thatpui zawk ring 41% an awm laiin, a thatpui zawk ring lo 56% an awm a, ngaihdan mumal nei lo tlema zawng an awm bawk. Kum 8 vel a liam leh tawh a, mipui ngaihdan pawh a danglam leh tawh viau thei tho a ni . Tuna kan dinhmun tak hi han chhut ila, zu khapna hlih thut hi kan chhiat phah mai ang em, tih hi ngaihtuah tham tak a ni. Mi thenkhat chuan 'Mizote hian hlauh kan ngah lutuk' tih ang zawngin an sawi a, zu khapna hlih chungchangah pawh hian chutiang tho chuan ngaihtuah a thain a rinawm. Ram hruaitute zingah zalen taka zu tha ber ber chi in thuai thuai chak an lo awm pawh a ni mai thei a, mahse mi tlem te zalen duhna hian mi tam tak tan harsatna a thlen thei tih erawh hriat a tha. Khuahkhirhna hlih reng reng hian nghawng a nei fo thin. Dan khauh tak lo zam tawh hlih thut pawh hian harsatna namen lo a thlen thei a ni. MLTP Act pawh hi mi thenkhat tan chuan dan zuamawm tak ni mah se tam tak tan chuan dan sakei a ni ve tlat a, thangkhat lian zet lekkawh tawh a lo ni bawk si a, pawngpaw hlih mai hi thil tih chi a ni lovin a rinawm tlat a ni. Mipui siam sorkarah chuan eng ang hnehna pawh chang mahse ram hruatute hian democratic principle an kalsan a thiang lo hrim hrim. Hnam pum nghawng tur leh mipui nawlpui kaihhnawih tur thilah phei chuan mipui ngaihdan an zah thiam a pawimawh khawp ang a. Kohhran leh mipui aiawh pawl hrang hrangte biakrawn pawh a fuh a rinawm. Tun hnaia Excise Minister-in MLTP Act hlih chungchanga kohhran rawn an tum lo thu a sawi khan 2009 kuma chief minister-in, kohhran rawn lo leh remtihna lo chuan a kaihhruai sorkar leh a party chuan zu khapna dan hi tih danglam a tum lo tih a sawi kha a hre lo a ni maithei e. Chief minister sawi anga kohhran leh tlawmngai pawlte rawn ngei hi sorkar tan a that zawk pawh a rinawm. Ram hmasawnna tur thil leh ram tana pawimawh tawpkhawk mipui nawlpuiin an hriat thiam loh angah te hi chuan sorkarin hma a lak pawp mai a tul chang a awm thin ngei a. Chu bakah ram leh hnam tana khuarei thleng pawha tha tur thilah chuan dodaltute nek ngam a tul chang a awm bawk. Mahse, Zu khap leh thlah zalen kher hi chu chhungkaw tam tak nghawng nghal theitu a nih avangin mipui mar dek miah lova thutlukna siam pawp chi a nih a rinawm loh. Mipui hmelmaa insiam mai pawh a hlauhawm thei ang. - Lalthlamuana Ralte