E-Media than chak zia kan hmuin kan hriaa, tunlai khawvel thiamna sâng zel karah hian thil tak tak duh leh thil ho lam buaipui a phar var mai mai an inbuk tawn zak zak a, a ding chang zawk tur chu thil nihna dik tak hi a ni. Reels hmang­in kan in awi tlei a, Real-ah erawh hmai kawr hmangin kan inhliah bo thung lawi si. Thingpui dawra inhnangfâk ai chuan Cafe-ah ngat lo chuan kan ti deuh tan tlat tawh. Secondhand aiin Thrift a changkan hmel zawk a, Puakzo aiin Popcorn a tui hmel zawk. Arsa leh Pa a in hal an ti thin a, Chicken Mushroom chu a inhal leh chuang lo. Arsa kan ngaina lo, KFC erawh ei thei kan pung tual tual. Tleirawl rual aiin Chicks an hmuhnawm kan ti daih zawk! Hei hi kan nihna dik tak a ni. 

Tumah indem thei kan awm chuang lo, changkanna in min luh chilh a, kan tawngah saptawng a tel loh chuan awm dan kan thiam tawh lo. Hei erawh mi nawlpuiin kan hriaa kan pawm chu loh theih loha hman ngai chu a awm. Kan nun leh kan chetziaah erawh zawi zawiin zo zia kan kal san zel tih erawh hi chu mi pangngai tawh phawt chuan kan hai lovang. Kum bul lamah khân Pawl X  zirlaite exam zingah Mizo zirlai chhanna endiktu chuan zirlaiten Mizo tawng an thiam loh zia a rawn ziak chhuak a, a darh chiam a nih kha. Central YMA pawhin Zirna In-a Mizo Zirlai zir lo an awm leh awm loh zir chiang turin Branch hrang hrangte hnenah thuchhuah a siam hial. Kan tawng thang zel tur chhawm nun zel nân keini ho hi kan pawimawh hle a, hman uar zel hi kan tum tur a ni. 

Artificial Intelligence hian nasa takin khawvel a ti danglam mêk a, thiamna a pung zel a, thil lem leh a tak thliar hran har khawp­in thil a duan chhuah theih tawh. Changkanna hmang tangkai leh inzirmi te tan dinchhuah puina tham a tling. Mizo thalaite zingah thil lem buaipui a, ho lam mai mai buaipui, a phawvuaka phur satliah, Social Media-a nun lem hmanga mi diriam leh nuihzat ching kan pung tial tial. Fake Account hmanga mi diriam a, nuihsawh thinah hian an khawtlang leh kohhrana a kul ataia inhmang, mi lâk tlâk an van pharh a rinawm. Social Media tukverhah han dâk ila, a tawng tam tam Mipa kan ni a, a lem hmanga nung kan pung zel ni berin a lang. Intlansiakna khawvelah hian lem takin a khawsak theih a, lem taka nung te phenah thil tak tak duh thalai, dikna leh rinawmna vawng tlat an awm ve thung. Khawvel thlirna atang chuan thil lem hi ding chang angin lang thin mahse dikna hi a tlo a, a par chhhuah hun  a nei thin.

Mi thiltih apiang lo sel tum te, ber emaw eng emaw ta riauva in ngaihna rauin min man bet thin a, thil lem kan buaipui a, lem kan chang a, hmai hnih nei chungin nun lem kan chang thin châwk. A lem leh a tak a awm a, thil tak chu a lan chhuah hunah a lo tlo nge nge. Lang lo tura thuhruk engmah a awm lo tih ziak ang khân dikna leh takna phenah hian thil lemin hmun a luah zau zawk zel a, dikna in hmun a chang lo fo. Nang erawh chuan thil dik leh thil tak chauh buaipui la, a lem ai chuan a tak chauh hi thlang zawk fo ang che. Lemchanna khawvelah hian thil thiang lo a ngaih pawh pawm dan kan thiam thung em em lawi si a, thil tak leh dika ngaih chu kan hnar thiam em em thung bawk si!

A tak taka pawr ngam si lo hian a lemah kan pawr ngam em em thung a, mi dawih nih kan duh loh luatah lem chang chung­in mahni nihna kan pawm ngam lo va, thil lem mai maiah kan in theh dere thin. Khawvel hian mahni nihna anga lang ngam a mamawh a, a ngaisangin a dah sâng zel bawk ang. Kan nihna tak tak ang hian lang mai ila, thil tak tak chauh buaipui ila, tlin lo chung chunga nun ai chuan mahni nihna ang taka lan mai hi a hlu ber mai. Khawvel changkan zelna karah hian thil tak chauh duh mi, a lem a buai lo, nihna anga lang ngam, mi tak hi kan ramin a mamawh zel dâwn. Kan dinhmun leh neihin a zir loh chuan tih ve zel, neih ve zel,  a nei leh a theite anga awm châkna hian kan nun kaihruai lo se, awhna sualah lut lo turin i infuih sauh sauh ang u. Thil tak chauh hi thlang ila, kan nunah a lem ai chuan a tak hi thlan i tum zawk ang u. A lem nge a tak i thlan dâwn le?