Zawlnei Isaia’n, ‘Kan tan naupang a lo piang ta, Fapa pekin kan awm ta; tih leh, Nula thianghlim pakhat a rai anga, fapa a hring anga, a hming ah Immanuela a sa ang.” Thuin kan hria, hla in kan sa fo thin a. Lal Isua pianna hmun Bethlehem-ka mit ngei in kan kan hmu ve ta – ka beisei phak ngai reng reng lo a ni.

November 3-ah Mango Tour and Travel neitu Pi Manuni leh tour guide upa Dr.PC Biaksiama ten min hruai a, Ram thianghlim ka zin ve a. Mizoram atangin 77 kan ni a, South India lam mi nen 91 lai kan ni. Mizo te kawt chhuah – Lengpui Airport atangin dar 11:30-ah Kolkata kan pan – dar 12;30 kan thleng thei a. Kolkata Airport ah kan awm rei – tlai lam dar 6:35 ah Delhi pan in kan thlawk leh a, zan dar 8:45 ah kan thleng a. Terminal 3-pan in Bus in kan kal leh a a ropui in a zau ngei mai, keini ang duang tan chuan hmuh nuam hlir a ni.

November 4 zing dar 5:00 ah Delhi chhuah sanin – Gulf Air ah darkar 5 chuang  kan thlawh hnuin Bahrain khawpui kan thleng ta. India ram sana aiin darkar 3:30 in a tlai zawk a ni. Bahrain atangin Jordan khawpui Amann panin kan thlawk leh a, darkar 2:00 vel kan thlawh hnu ah dar 1:20 ah kan thleng leh a ni. Hetah hian kan thiante Delhi atangin Arab Airline a kal te an lo thleng hmasa – kan in hmu khawm vek tawh a ni. 

Kan hotunu Pi Manuni remruatna fel tak hnuai ah – kan chuan na tur Bus changkang tak pahnih ah chuan kan chuang a, kalkawng ah Restaurant Terrace-ah lunch tui hnai tak changkang tak kan ei – Lengpui kan chhuah san hnua chaw kan ei vawikhat na a ni-kan puar tlang hle!

Nebo tlang bul a lo ni a, kan lawn nghal, hruaitu Mosian – RAMTIAM KANAN – Pathian in a thlir tirna tlang kha a ni. Nebo tlang chhip atanga Kanan ­­­­ ram leh Jordan phai ruam chu kan thlir ve ta mai chu a nia – ka mumang chu a ni si lo, Lalpa ka lawm e tih mai loh chu!! Pu Patea’n – Hmanah Mosian Kanan ram a thlir a, tih hla te chu rilru-ah lo langin – Aw kei pawh Kanan Ram chu ka thlir – in chhung ah ka tawngtai thla te kan la, hmuh nawm hlir a ni. Ka zinpuite chu – an inkawp ve kei chu tumah ka kawp ve lo a ni. Khawl hmun dang atanga Hollyland fang ve tho te nen kan in sul zut zut tawh mai a ni. Tichuan, Amann khawpui ah kan kir leh a Hotel ah kan riak a changkang hle mai!.

November 5 Saturday ah Israel ram dar 9:30 ah kan lut fel thei, Pathian hnam thlan, Abrahama thlah te ram lei lung han rah chu – kan sa chek kal deuh ngat ngat tawh mai a ni. Israel ram Bus – Sial-em em mai ah kan thu vang mai a – kawng nuam rulngan pa ang zuar mai ah – kan tlan par par mai a ni. Hmun dang kan tlawh chu kan sawi hrih lo mai a nge.

Berampute ram tuanna lam ah–Bethlehem dai lam ah, Beramputen an beram te venga phul an riah chilhna ram–ah. Lalpa vantirhkoh an kiang ah a lo ding a, Lalpa ropuina in an vel a rawn chhun eng a. “Hlau suh ulang ngai rawh u, mitin ta tur chanchintha lawm awm em em ka rawn thlen che u ani. Vawiin ah in tan Davida khua ah Chhandamtu a piang ta, Lal Krista” chu tiin. Chu ve leh van mipui hoten Van hlamawi ropui tak an rawn sa – a van ropui tehlul em! Chumi bul vel ah chuan puk tha deuh deuh a lo awm upa Biaksiama’n a sawifiah zela , a bengvar thlak thei em em a ni. Bethlehem lam panin kan kal zel a, Isua pianna hmun nen a inkar hi km 2 – vel a ni ange. 

Lal Isua pianna hmunah hian Biakin ropui tak mai “Church of The Nativity” an tih mai chu a ding luah mai a. Thlawhtu an tam thei em em mai a ni. Lal Isua pianna hmun Biakin leh a kawt zawl hi hectre (30000 sq m) lai a zau a ni a. A hmun hi Manger Square an vuah a. Awle Biakin chhung lut tur hian kun chunga pakhat te te-a luh a ni a. Kawngka zim te kaltlang zelin hei hi ‘Door of Humility – Tlawmna kawngkhar tihna a ni.’ Tlawmna nun nen chauh Isua Krista hnen kan thleng thei tih a entir a ni. Kawngka zim kan luh hnu-ah Biakin ropui tak mai kan pawh phei leh a, Biakin chhung hi Block 5 ah then a ni. Milem tar awmze nei hmuh tur a tam hle. Lal Isua pianna lai tak hi Biakin hmun thianghlim hnuaiah a awm a, Biakin luhna atangin kawngkhar dinglam ah kan phei a, Hmun thianghlim sir dinglam kawnglam kawgka zim tak “Door of Humility” a lo awm leh a, thui lote step ah kan chhuk leh a Lal Isua pianna hmun kan thleng ta a.Isua pian hunlai ranchaw pekna thleng hi feet hnih bialin a khuar a a hual velin thir phek 14 lai an kilh bet a. Arsi ban 14 nei ang siamin a lai takah nausen Isua mut na tiin an lo chei thlap mai a ni. Kan han khawih a thla te kan lak pui a, kan tawngtai a, thinlung leh rilru a kal thui thei em em, kan hlim hle mai, tlawhtu te an tam em mai a rei a awm theih loh.

Kum 2000 liam ta daih tawh a Nazareth khua nula thianghlim Mary hnen ah Gabriela a inlar a. Chu Juda nula hnen ah chuan Khawvel Chhandamtu tur Pathian fapa a pai tur thu a rawn hrilh a, a hming ah Isua a sa ang tiin a hrilh a. Tin a pasal hual pawh a mang lam ah Gabriela bawkin a nupui hual chu nupuia neih hlau lo turin a hrilh a, Mary chu a nei ta a.

Bethlehem a nau lo piang Immanuela lawmna – Masi hlim taka kan hman puite khawiah tuan che maw, lengkhawmna pawh hlim takin “U, AMA i lo fak ang an ti tlut tlut tawh mai!” Keini male voice ho pawh mawi tak maiin “Leng zawng thinlai damten lawm kim tak ang maw? Rual duh kal ta suihlung rualpui te zawng kha, Ngai mah ila, kohkir leh theih awm silo; Remlal piang chuan thinlai hnem rawh.” tih hla te chuan mittui nen lusun khawhar chhungkua te chu zaiin kan lo awi ve lawm lawm a.

Kum 1979 ah Krismas kan hmuah mek lai khan Hlimen Kohhran Male Voice - tia mite hriat kan ni. Aizawl Khawpui ah pawisa khawn lova lusun leh kan rawngbawl puite inah Carol turin kan in buatsaih a. Aizawl hmar lam ah – Ramhlun ah, Electric veng ah, Chanmari ah, Zarkawt ah, Dawrpui ah te kan zai a, a bik taka sawi lan loh theih loh chu Civil Hospital ah zaia rawngbawlna kan nei a ni. Damlo mahni in lama haw thei lo te khawhar tak tak te a an ni a, a kawtzawl ah kan han zai a, damlo an lo chhuak a mittui nen min rawn chibai a - Masi hla an han thlang zui a, phur tak maiin kan sa a. Pathian thlarauvin min awmpui a, kan hlim tlang hle! Tawngtaina leh thusawina tawi te kan nei bawk a, hun hlimawm tak kan hmang a ni. Zan hnih Carol kan nei a. Aizawl chhim lamah Kulikawn te, Mission veng te, Tuikhuahtlang te, Republic veng te leh Venghlui leh College veng ah te kan zai a. College veng a kan zai na pakhat ah chuan an bula hnam dang ringlo mi College a thawk te thinlung a hneh hle mai a, J. Zothansanga tuna Upa ni ta chu sap tawng in thu tlem kan sawi tir a, an lawm hle., hetiang hi kan vawikhat hriat na a ni an ti nghe nghe a ni. 

Kan hla sak tam deuh te :
1.  Kumsul liam hnu.
2.  Aw han thlir teh Bethlehem dai hmun saw.
3. Haleluia! Haleluia! Lal Krista chu a lo piang ta.
4.  Zan tlai khawthiang karah.
5. Hmanah Kaisar Lal lian rengpui.
6.  Lal pian hun lawmawm tak.
7.  Khawvel lawm nan a lo kal.
8.  Kan chatuan pa lenna run ah.

Bethlehem khua - Khawvel Chhandamtu lo pianna hmun kan hmuh meuh chuan, thilnlai mu hnu lunglen a kai tho chiang khawp mai le, fam chang ta Rev. R. Lianbuanga te, Rev. R. Lalchhana te, kan thianpa Pu Sangbera leh tlangval P.C Lalnunzira te ka hrechhuak uai uai mai a ni.

Upa Vawmphunga - Hlimen upa khan a lo sawi hmasa ber mai a, mizote hi khawchhak Israel kan ni a lo ti tlat mai pek a. Ni e – Mizote tluk a “U! AMA – Masi hla te leh Kalvari lam hla te – chunglam Jerusalem lam hla te khawvel ah keini aia nei tha an awm lo.” A rama awm te aiin an sawifiah zawk daih, Lalpan – thlarauva a hmuhtir te an nih avangin an chiang em em mai a ni. R.L.Kamlala’n – “khawvel ah hian Lal tam tak an lo piang ta a – mahse Lal Krista ang hi an la piang ngai lo,” a tih te hi a va sawi dik em! Chang nga chhung ah hian fiah takin min hrilh. Patea – ve thung chuan “Ram Thianghlima Lal lo piang chu chung lam arsi chuan a pan zel a; mifing amah zawngtu te pawh khan, arsi chu an en a,” arsi hian Isua pianna Bethlehem tlang a rawn hruai thleng a. Ralngama ve thung chuan: Lal pian hun lawmawm tak kan thleng leh ta – hlim taka lawmin zai i vawr ang – a hmuna awmte aiin an sawifiah thiam zawk daih mai a ni. Pu Rokunga’n ‘Bawngin runpui a bel’ a tih te, hla sak nuam thluk mawi si – “Kan Chatuan Pa lenna run ah,” sawi tur a tam duhtawk mai teh ang.

Rev. Taisena’n – “Tunhma tunhnu vanhnuai mi hming sak zingah, Chhandamtu dang reng an piang tawh lo’ang;” tih leh “Israel ten an hnawla an paih hnu kha, Vanlal reng ro – pialral lunghlu ka chhar ta.” 
    
Masi hman nuam vek ule!