Hun eng emaw ti thleng khan Mizo khawtlang nunah hian pa hi chhungkaw chawmtu niin nu hi in lamah fate kilkawitu an ni thin. Chuvang chuan, nupa an lo inthen hian, fate hian nute hi an zui tlangpui a, harsa takin an khawsa naw naw thin. Tam tak phei chu, rethei bakberin, chhuanchham dawn dawnin an awm fo. 

Mahse, dan hriatna lamah kan thangharh ta zel a, court kaltlangin chawmna hmuh theih a nih­zia te kan hre chho ta zel a. Tunah chuan court-a kan mi hmuh tam tak hi, rukrua puh nih avang te, zu zuara puh nih avang te leh dan bawhchhiatna dang avanga court-a inlan tur an ni lo a. Court kaltlanga chawmna hmuh tuma bei mekte an ni zawk.  

A duh apiang tan court kal tlangin chawmna hi hmuh theih ni ta se, piputen pialral an thlakhlelh chhan, engmah thawk loa faisa ringa khawsak theihna a ni dawn a, a va tha dawn em! Mahse, a ni lo a, chawmna hi court pek pawh a ni hek lo. 

Chuti chu tute nge chawmna dawng thei a, tute nge chawmna pawisa theh chhuak thin tih i hre chakin ka ring a, ka han sawi ang e. A mihring zawng ni loin, an dinhmun zawnga sawi dawn chuan, chawmna dawng thei chu mahni inchawm zo lote an ni a, chawmna pawisa theh chhuak thin chu mi dang chawm zo khawp thawhchhuah neite an ni. A la fiah chuang lo, a mihring zawngin sawi chhunzawm law law teh ang. 

A hmasa berah chuan, nupuiin a pasal lakah chawmna a dawng thei. Nupui tih hian a pasalin a then tawh hnu pawh a huam. Mahse, nupa an ni ngei em tih emaw an lo ni ngei tawh em tih emaw erawh finfiah a tul hmasa fo. Nupa nih mek laia pasalin a nupui a chawm duh tlat loh hi chu thil vang tak a ni a, hei hi chu um zui loin, inthen tawhte chungchang hi um zui zawk ila. Mipain a nupui hlui a nih vang ngawtin chawmna hi a pek ngei ngei a ba em? Ba lo e. An inthen chhan chu - uire vang a ni emaw, nu berin chhan tha tak vang ni loa a pasal bula a khawsak duh loh vang a ni emaw, remtih dunna avang emaw a nih chuan, pasalin a nupui tan chawmna pek a ba kher lo. 

Rila rah fate hian an nu emaw an pa emaw, a tu emaw zawk zawk hnen atangin chawmna an dawng thei bawk. Fa tih hian, dan ang taka a fa chauh ni loin, dan ang chiah ni lo, heng - sawn leh khawlai fa kan tihte pawh hi a huam a ni. Tin, dawng thei tur kum zat hi bithliah a awm. Thawhchhuah an neih theih hma, kum 18 la tling lote chauhin chawmna hi an dilin an dawng thei. Chutih laiin, mihring kumin kum 18 pel tawh pawh ni se, taksa emaw rilru emaw fel lohna avanga mahni inchawm thei lo an awm, anni erawh chuan an dawng reng thei, kum bithliah a awm chuang lo. Fate hi danin a duhsak khawp mai a, an fanuin pasal nei tawh pawh ni se, a hringtu pa hnen atangin chawmna an la dawng thei fan zu nia! 

Mizoram court hrang hranga chawmna dilna lut, court-in a chinfel thinte hi faten an nu leh pa lakah chawmna an dil leh nupuiin a pasal hlui laka chawmna an dil thubuai a ni deuh zel.  Midangin chawmna an dil thei ve lo tihna erawh a ni lo. 

Nu leh pate hian an fate hnen atangin chawmna an dilin an dawng thei bawk a nia. Sawi tur tingin, tum khat chu nupa tar dun tawh tak hian an fapa kamding lakah chawmna an dil a, court-in an fapa chu chawmna a pek tir nghe nghe. Supreme Court chuan, nu, fa nei lo chu a pasalin chawm thei lo ta se, a fahrawn (stepson) lak atangin chawmna a dil thei ang tiin a sawi a. Falak (adopt)-te hi dan hmaah fa dik tak an nih avangin, an lakah an nu leh pa thar (adoptive parents)ten chawmna an dil thei bawk. Nu leh pate hian anmahni chawm zo fa pakhat aia tam an nei a nih chuan, an duh ber lakah an dil thei ang.

Tuna kan thu khel laiin Cr.PC chang 125-na thu a ni a. He dan hnuaiah hi chuan nupuiin a pasal a chawm ve dan tur chungchang hi engmah a inziak ve lo.

Kan sawi tawh angin, chawmna hi court-in a pek a ni lo a, a pek tir a ni zawk. Pek zat tur hi inziak sa engmah a awm lo a. Chawmtu tur leh chawm tur dinhmun mil tawka siam a ni thin. Kan thuziak meka chawmna tih hi sap tawng chuan maintenance an ti. 

Chawmna pe tura thupek chhuahtu chu court a nih thu kan sawi ta a. Eng court ber nge kan pan tak ang? State-in High Court hran la nei chiah lo mah ila, Aizawl Bench chhuanawm tak kan nei a, chu chu em ni kan pan tur, nge state level-ah chuan High Court tih loa Court sang ber an tih District and Sessions Judge zawk pan tur? He dan bung leh changin court a tih hi chu Judicial Magistrate First Class a ni a nia aw.  

Court meuh kal tlanga chawmna hi pek tur a nih avangin, tha te te leh inngaihsak tawn taka awmho laiin court-ah dilna thlen tur a ni lo. Chawmtu tura danin a phut, chawmna pawh nei zoin a mawhphurhna hre reng chunga a mi chawm tur a chawm duh tlat loh chauhin court kawngkhar kik hawn tur a ni e. 

Petera’n “Ka ziak kha ka ziak zo tawh” a tih ang mai khan, court-in ro a rel fel tawh hi chuan a tawp chiang thei em em mai a, court sang zawkin a thiat emaw a tihdanglam emaw a nih loh chuan a ding reng tawh mai thin. Mahse, chawmna chungchang bikah hi chuan chawmna pek tawh hi sut leh a ni fo a, chawmna zat pawisa pawh tihdanglam leh a ni fo thin. Chungte chu remchangah rawn ziah leh kan tum dawn nia.