Zawhna: Ka pu, ka zawhna che hi khawngaih takin mi lo chhan sak ang che aw. Kum 49 ka ni a, engtik lai mai pawn ka mut a chhuak reng mai hi engtia tih chi nge?

Chhanna: Mut (sleep) hi kan taksa hun hman zinga pawimawh em em mai, kan taksa peng hrang hrang hahchawlh hun, hliam emaw pem (lang lem lo te, taksa chhung lam thlengin) a in tuamdam hun, kan taksa in chakna atana energy a senral hnawhkhahna hun pawimawh tak mai a ni. Pathian min siam danah hian kan taksa hi darkar 24 chhunga hahchawlhna hun min pe a, he mut hahchawlh hun hi mithiamte sawi dan chuan darkar 7-8 tal ni thei se an ti bawk.

Hrisel tha pangngai ah chuan mut hun a lo thlen hian kan taksa khan mutchhuak a rawn thlen mai thin a. Tunhma lam hun, TV leh technology vak a la awm loh lai kha chuan zing atanga tlai thlengin hna rim takin an thawk a, zanriah an ei kham hnu rei vak lovah an mut a chhuak nghal mai thin a, an mu hma a, zing pawh an tho leh hma thin reng a ni. Tun hnuah erawh chuan mobile phone, TV, computer etc te hian kan hun a luah tam ta hle a, chumi chuan kan thluak kha a ti chawl nep ta hle thin a, mut harsat emaw buai (sleep disorder) nei pawh kan pung tial tial niin a hriat.

Taksa a lo hah khan mut hunah mut chhuak a thlen mai thin a, mahse taksa a hah lutuk te, rilru ah vei ngah lutuk vang te in mut chhuak thei lo a awm thei thung. Tin, muhil chunga taksa hahchawl tawk lo, quality sleep nei lovin a awm theih bawk. I zawhna lai tak hi a kim tawk lo ta deuh a, i mut hunbi pangngai ah i mu tha tho nge mu tha thei lo tih i sawi tel lova, i mut thah loh vanga mut chhuak reng i nih chuan i mut hunbi pangngai a quality sleep i neih a pawimawh tihna a ni dawn a, i mut that theih loh chhan hriat tum a, chumi chu enkawl a ngai dawn a ni.

I zawhna zawh dan en hian i mut hunbi pangngai ah i mu tha tho chungin engtik lai pawhin i mut a chhuak reng niin a lang a. Chuti anih chuan sleep disorder chi khat Narcolepsy an tih mai hi i nei a ni thei ang. Chutiang ah chuan maimizial tia kan sawi ang te hi an nei tel duh viau bawk. Tin, a dang leh chu obstructive sleep apnoea an tih mai hi a ni a, thau/rit lutuk ah te, zu in nasa ah te, hnar dik lohna nei ah te leh, eng damdawi emaw ei vang te in a awm thei a ni.

Natna benvawn pahnih – zunthlum leh thisen sang nei te ah hian mut harsat a awm duh viau mai bawk a. Chuvangin i bp leh blood sugar check a pawimawh hle ang. Thau/rit chi i nih chuan i weight paih tura exercise leh diet control i mamawh ngei anga, thyroid lam fel lo Hypothyroidism hian a thlen theih bawk avangin Thyroid function test te pawh tih a tul mai thei bawk. Engpawhnise Medicine specialist te lo inentir phawt mai la, a tul leh Psychiatrist lamah an lo refer thei che anga, i harsatna an puih theih ngei che ka ring.