Mizoram chungchang hi zir chiana mak deuh deuh, mi thiam zawkte sawi dan leh an ngaihdan letling chiah a awm nual a. Taimak hi hlawhtlinna bul a ni a, mi taima chhungkua chu ding chhuak tura ngaih an ni. Mahse, he ramah hian mi taimate an rethei em em reng thung hi a mak hle a ni. Tuten emaw hnam thatchhia tia min puh lai hian thawkrim em em mai, kawla ni chhuak chhiar a, vangvat leh thosi kara thawk thin te, fur ruahpui sur leh ni sen sa hnuaia rim taka thawk thin loneitute leh kut hnathawktute hi an rethei em em reng a ni. Mi depde, eiruk hmangte an lian thur thur a, an chanai an ei ruksakte erawh an retheih tial tial thung. Economist-te hian ram changkang leh changkang lo thliarna chi hrang hrang leh ramin hma a sawn dan tehfung hrang hrang an nei a. Chutianga ram hmasawnna tehna atan chuan ziak leh chhiar thiam tam dan te, mihring dam rei zawng te, nausen thi zat te, khawpuia cheng tam lam te, sum lak luh tam dan te, hna hmu lo tam dan atang te, hriselna lam te, zirna lam dinhmun te, nitin mamawh (basic huma needs) te leh a dangte an hmang thin a. Mahse, chutiang tehfung tam tak chu Mizoram dinhmun tehna atan hian a tlak loh tlat thung. Entirnan, ram changkang apiangah khawpuia cheng an tam thin a. Kum 2011 census-a India rama state zinga thingtlang aia khawpuia cheng tam zual 10 zingah Mizoram pawh a tel a. Mihring zat ve aia tam (52.11%) hi khawpuia cheng kan nih lai hian India rama state pachhe pawl tak kan ni lawi si. Ziak leh chhiar thiam tam lam hi ram changkang tehna rintlak tak a ni a, Mizoram hi India rama ziak leh chhiar tam ber dawttu ni kumhlun kan ni bawk. State thenkhat aia kawngpui kan neih that thu te, electric power kan hnianghnar bik thu te, vai ram atanga sum lo luan luh hnem thu te kan ram hruaituten min hrilh ngun hle a, hma kan sawn lo tih rual a ni lo ang. Mahse, hengte hi hmasawnna a ni chiah em? In kan sak hian a a ban leh ruhrel tha tak siam hnuah a chhuat leh a bang leh a chung a siam theih chauh a. A ruhrel tha tak a awm phawt loh chuan in mawi tak leh nghet tak a sak theih lo. Chutiang chiah chuan mithiamte chuan hmasawnna thlen tur hian a innghah chhan tur, a ruhrel tha tak a ngai hmasa an ti a. Chutianga hmasawnna ruhrel chu ‘economic infrastructure’ tiin an sawi thin (‘social overhead capital’ emaw ‘economic overhead facilities’ emaw an ti bawk). Hmasawnna ruhrelte hi hmasawnna a thlen theihna atana neih ngei ngei ngai a nih avangin sorkar tha chuan a ngai pawimawh tur a ni ang. Kawngpui tha neih te, mipui tana tui thianghlim pek te, hriselna lam leh zirna lam ngaih pawimawh te, a nei lo tana chenna siamsak te, vantlang himna ngaihtuah te hi ram hmasawnna bul tanna a nih bakah rethei zawkte dinhmun chawikanna tur a ni bawk. Hmasawnna kan sawi hian mi tlemte hlawkpui tur leh tute emaw din chhuahna tur ringawt a ni lo a. Mi rethei ber ber ten a zar an zo ve tur a ni a, hmun hrang hranga chengte pawh a hrut pha tur a ni. Chumai bakah tunlaiah chuan 'Hmasawnna tlo' (Sustainable development) hi an ngai pawimawh hle a. Tuna la dam laiten hmasawnna zar kan zo tam tak hi nakina lo la piang turte tawrhna thlen thei a ni ang em, tih hi ngaihtuah tur a ni. Entirnan kan ram lui zawng zawng hi khuap ta vek mai ila, compensation leh thil dangah mi thenkhatin an hlawkpui viau anga, kalphetha siamchhuah pawh kan tangkaipui ang a, thil dangah pawh a hlawkna sawi tur a awm ang. Mahse, kum 50 hnu lamah hian harsatna min thlen thei a, nungchaten an tuar thei a, a khuahna a nghet lo thei a, tuikhuah reng reng hi kum hlun tur a awm lo a, kum eng emaw zat hnua hluihlawn tur vek a ni hrim hrim bawk. Tunlaia sorkar hmalaknaa Oil Palm leh hmunphiah kan buaipui vak pawh hian ngaihtuah a tithui khawp mai, ram danga an chin duh loh a ni tih sawi thin mah se a hlawkna chauh kan ngaihtuah mek a nih hi. Reilo teah kan ramhmul leh nungchate hian an tuar ngei dawnin a lang si a. Hman deuha mihausaten kan ram tha lai zau tak taka teak an chin vak vanga ram leilung chhiat tak zia te hi chhui chian tham ania, a bul vel boruak a tihlum zia pawh hai rual a ni lo. Chutiang zelin hmasawnna hna (development project) kan buaipui hian nakina harsatna thlen thei a nih dawn leh dawn loh zir chian phawt a ngai. Hmasawnna hian a thupui ber chu mi retheite chawikan hi a ni. Chutiang zawnga chhut chuan sorkarin hmasawnna hmingpua hma a lakna zawng zawng hi kan rama mi retheite hian an tangkaipui em, din chhuah phah engzat nge awm, tih te hi zawhna awm thei a ni. Retheihna hi hmanrua atan hmang an awm thin hi a pawi khawp mai. Mi retheite hmanga thuneihna changtu chuan mi retheite lakah mawhphurhna a insiam tih a hre tur a ni ang. Retheite khaichhuak tur chuan an retheih chhan atanga chhui chian a ngai anga, tih tak taka hmalak tur a ni ang. India mi economist ropui tak, Amartya Sen chuan tam tlak chhan leh retheih luat vanga riltam an awm chhan a chhui chiang a, tam tlak chhan leh retheihna lo awm chhan lian tak chu miin an chanpual/chanvo an chan loh (entitlement and deprivation) vang a nih thu a sawi. Rethei riltam an tam laiin an kiang lawkah ei sen loh nei an tam a, mi tam takin an mamawh ngawih ngawih an chan loh laiin thuneitute nuamsa em emin an awm lawi si. Kan rama rethei an tam chhan pawh hi an chanpual/chanvo tur tuten emaw an chhuhsak thin vang (deprivation) a nih a rinawm. Thingtlang kawngpui tha siamna tur sum an ei ru zo vek a nih chuan a tuartu chu thingtlang mite an ni a, lo neitute hamthatna tur an hmang dik lo a, an ei ru a nih chuan lo neitute chanvo chhuhsakna a ni. Chutiang zelin sorkar laipui atanga mipui hamthatna tur te, retheite dinhmun chawikanna tur te, thingtlang hmasawnna tur a sum lokal zozai hi a dik taka hman a ni lo thin a, an chanvo tur chhuhsaktu an awm thin avangin hmasawnna tak tak a awm lo a ni ber. Hnam tlemte kalphung tha taka inhruai chuan reilo tea ding chhuak mai thei kan nih avangin beiseina sang tak nen kan din chhuah hun i thlir zel ang u.