Sap tawng thumalah chuan Magistrate tih thumal hi Mizoten kan hriat tlanglawn pawl tak a ni awm e. Mi nawlpuiin a awmzia nia kan hriat dan chu court-a thubuai remtu lal tak tih a ni. Magistrate First Class chin ngat phei chu, an huat zawng apiang lung ina khung thei nia lo ngai tawk pawh an awm thin. 

Magistrate hi chi hnih, Judicial Magistrate leh Executive Magistrate an awm a. CrPC-in a sawi dan chuan, an pahnih hian criminal court ve ve an ni. An danglamna leh an hnathawhte tlemtein han umzui ila. Mizoramah chuan, Judicial Magistrate atan hian Mizoram Judicial Service mi leh sate chauh ruat theih a ni a. District tina Judicial Magistrate-te hotu leh khaikhawmtu ber chu Chief Judicial Magistrate a ni. Criminal Court a nih avangin criminal case chauh an khawih thin. Criminal case-ah chuan dan bawhchhia nia puhte chungchang ngaihtuah a ni a. Thubuai siam sak chu a sualna finfiah a nih loh chuan chhuah zalen a ni thin a. A sualna finfiah a nih erawh chuan hremna pek a ni thin. A tlangpuiin pawisa chawi tir emaw, lung in tan tir emaw, a pahnih emaw hmanga hrem thin a ni. Heng thubuai dang, ba inthinna, fa inchuh, rokhawmtu nemnghehna ang chi hi chu civil case a nih avangin Magistrate-ten an khawih ngai lo.

Mizoramah chuan Executive Magistrate atan hian IAS leh MCS mi leh sate hi ruat an ni ber thin a. District khata Executive Magistrate zinga lal ber chu District Magistrate an ti. Dan leh thupek chhuaha kengkawhtu leh tual­chhunga muanna a awm theih nana hmalatute hi Executive Ma­gistrate an ni.  

Judicial Magistrate leh Executive Magistrate te hi hna thawk dun, an hna thawh inang si lo a ni. Executive Magistrate-in halpuah hal leh zawrh khap ta se, thupek bawhchhia an awm leh awm loh a vil zui ang a, bawhchhe lui nia a hriatte chu thubuai a siam sak ang. Thubuai siam sakte chungthu erawh Judicial Magistrate chauhin a rel thei thung. Executive Magistrate te hi state sawrkar ruat an ni a. Anmahni viltu leh a tul anga thununtu pawh state sawrkar bawk a ni. Chutih laiin Judicial Magistrate te ruattu leh an hnathawh dan vila thununtu chu High Court a ni thung.

Judicial Magistrate leh Exe­cutive Magistrate te hian inanna tam tak an nei a, a thente chauh han sawi ila. Magistrate-te chu dan ang chauha rorel tur an ni. Danin an sawi ang ni loa ro an rel chuan, an rorel chu thutling a ni lo a, a reltu pawhin a tuar phah hial thei a ni. Solomona’n nu pahnih fa inchuh ro a rel sak dante kha finthlak viau mah se, khati anga rel theihna kha India dan buah a chuang ve lo a, hman theih a ni ve lo.  

An inanna dang leh chu, Magistrate chi hnihte hi sawrkar hnathawk an ni ve ve. Mipuite tana dan hmanga thawk tura ruat leh mipui rawngbawl saktu tur an ni. Sawrkar hnathawkte bakah sawrkar pisa luaha hlawh neite hi public/government servant tia sawi an ni. Bible-ah hian servant chu chhiahhlawh emaw rawngbawltu emaw tiin dah a ni. Servant theuh theuh, sawrkar hnuaia thawk leh kohhran hnuaia thawkte kan en dan leh ngaihdan danglam daih hi siam that a hun ta viau mai. Sawrkar hnathawkte chu eng anga lal pawh ni se, servant tho an la ni a, mipui pawhin nel takin, neitu takin kan pan ngam tur a ni ang. 

Magistrate te hi public/ government servant an nih avangin, hlawhbi nghet nei, thla tina hlawh la thin an ni a. Chumi bakah chuan mawhphurhna dang an chelh avanga lawmman an dawn theih dan a awm bawk. Chumi bak chu engmah an la thiang lo.  

Magistrate tan hlauh zawng leh zah zawng neih a thiang lo a, duhsak bik neih lah a thiang hek lo. An hmaa thubuai an ngaihtuah reng reng chu, a thu azira (on merit) thutlukna siam mai tur a ni. Magistrate-in court case bak thil dang ngaihtuah leh beisei tel an neih chuan rorel a lai thei lo a, a dik thei ngai lo. 

Court-in thutlukna a siam dawn hian a fimkhur em em mai a, a duhdanin thutlukna a siam ngawt thei lo. An mi puhin an puhna an pawm a nih ngawt lo chuan, finfiahna (evidence) hmang chauha thurem tur a ni. 

Magistrate chi hnihte hnathawh dan leh inanna lai kan sawi ta nual a, Magistrate tih awmzia chu engnge ni ta le? J. F. Laldailova dictionary-ah chuan ‘bawrhsap’ tia lehlin a ni a. Cr.PC leh dan bu tam berah chuan, dan bawhchhiatna eng pawh kum sarih pela lung in tan tir hmanga hrem theih chi chu magistrate-in a khawih ngai lo a, Court of Session-in a khawih thin. Tawngkam danga sawi chuan, hremna lian tham hmanga hrem tur chi, heng – tualthat case, pawngsual case te ang hi Magistrate-ten an khawih meuh lo. Remkunga dictionary-ah chuan ‘rorelna (court) hniam bera roreltu’ tia lehlin a ni a, hei hi English dictionary-in a hrilhfiah dan pawh a ni e.