Thil tha leh tha lo a awm a, sual leh fel a awm ang hian hringnunah hian pakhat chauh hi a kim thei lo a, pahnih a nih chiah hian a kim thin. Thil khaikhin nân pawh chi hnih kan hmang tlângpui ang hian lirthei nei chunga tlai reng an awm a, lirthei nei lo tlai ngai miah lo an awm bawk. Chanvo neih loh avanga lungawilo an awm laiin chanvo neih duh miah lo an awm. Second hand-a lungawi tawk an awm laiin branded ngat lo chu ti tawk an awm. Mi thenkhat chu an chan tawkah an lungawi laiin lungawilohna zawng reng reng a khawsa an awm ve bawk. 

Mize in ang lo thah a min siamtu hi a them thiam ngawt mai! I tlin lohna khei ngar ngar tu an awm laiin i thatna zawng ngar ngar tu an awm ve bawk. Hei hi a ni hringnun chu. Thatna hian mi a hneh thin. In hriatthiam tawnna hian hringnun a ti nuam mai thin a lo ni. Hringnunah hian ngaidamtu, hrethiamtu, dawmthiamtu, ngaithlatu, khawngaihtu kan mamawh thin. In mamawh tawnna khawvela chengte hian kan mihringpuite kan hliam fo a, kan in ti vui vai fo thin. Mihringin hahchawlhna kan zawng thin a, min hrethiam a, min dawmtu te bul tluka awm hi nuam tih leh thlakhlelh chuang kan nei lo.

Mi harsatna tawh, mi chetsualna tawh te sawi sep sep nuam kan ti a, kil khat atangin kan lo teh fo thin. A beng dai tu nih tum lo va, a fuih khawlo tu nih nuam ti zawk kan nih chuan mahni kan in enfiah a tul viau. Kan chungah a thleng ve thei ta lo emaw tih turin mi sel leh dem lamah tan kan khawh fo thin. Zir tur kan neih chu kan hringnunah hian ni a sâ reng thei lo, chhum a zing reng thei lo. Heng thil a lo thlen châng hian kan ngaihtuahna kawm hman meuh lo va, rilrua a thawh dân ang ang a chet rum rum emaw rik phur phur kan ching thin hi kan insum a tul viau. 

Hringnunah hian hlimna, lungngaih, mangan, mualpho, chetsualte hi kan tawh rêng tura khuanu duan a ni a, tuma dan theih a ni lo. Kan chunga thleng ve thei vek a ni a, thuhnuairawlhna leh in hriatthiam tawnna nen hringnun hi kan hman thiam a va tul em.Mi hlimna kan tawm pui thei lo a nih chuan ngawih chuh mai te hi mi pangngai nihna a ni. Mi lawmna, hlimna hmu thei miah lo, mahni indahtha chung si a, mi tlin lohna hmu thei em em kan nih leh si chuan tha chung chuang bîk kan ni tihna a ni. An sawi fo thin, khawvelah hian mi famkim a awm theih loh. 

Chanchin chhe lam ngaihven em em, a chhe lam chauh ngaithla duh kan ni nge? Chanchin tha lam chauh hre duh? Kan duhthlanna hi kan kutah a innghat. Mi chanchin tha lai awm reng a, a chhe lai chauh sawi nuam ti kan ni em? 

Phêngphehlep hi Pathian thil siam mawi tak niin hlaah te kan hmu nual. Hla phuahtu pakhat chuan, “Phengphe nunnêm leh zaidam” a ti a. Hla pakhatah pawh, “Phêngphehlep tial mawite'n Tuikual an hrût dêl dêl,” tih a awm bawk. Pangang an nih laia kan tihbai teh lul nên!

Pangang hi râpawm kan ti a, hmeichhia zawng zawng tih theih deuh thawin an hlau pawh hi a âwm viau. Mahse, hêng pangang tihbaiawm tak takte hi phêngphehlepah an la chang leh thuai dâwn tih ngaituah ila, kan thlir dân a dang deuh hian ka ring thin. Phêngphehlep mawi takah an la chang anga, an dam chhûng rei lo tê âm takin an la hmang ve dâwn tih ka hria a, pangang duhawm lo tak phênah khân phêngphehlep mawi tak ka hmuh tlat thin vâng a ni.

Hetiang chiah hi hringnun pawh hi a lo ni. Ngawlvei, kawng sira lo rui, kan ngei rilruk êm êm, jail-a khung bo hmak hmak emaw, han hlap zawt zawt emaw kan châk hialte pawh hi naktuk maia phêngphehlep mawi taka la chang tur an ni tiin vawi khat tal kan thlir tawh em le?

Hêng kan en dawng, sual kan tih êm êm, khawtlâng mita mi hnawksak kan tihte hi tute emaw fanu/fapa an ni a, tute emaw tunu/tupa an ni a, tute emaw farnu/nuta an ni a. Chûng mite chuan 'pangang' mai an nihna ata chu lo thova,  'phêngphehlep' mawi taka an rawn chan hun tur an thlir a, an beisei tlat a, chutiang tur chuan bâng lovin an tawngtai thin tih kan ngaituah ngai em le?

Kan ram hi dam se, kan khawtlâng hi thianghlim se tia ram leh khawtlâng rawng kan bâwl hian rah pelh a awl khawp mai. Thahnemngaih luatah pawi kan khawih palh fo mai. Phêngphehlep mawi taka a fapa a lo chan beiseia in chhûng tlabal ve tawh taka mittui tla zawih zawiha pitar tawngtai lai mitthlaa hmu chungin ram leh khawtlâng rawng hi bâwl hrâm hrâm ila a tha ngawt mai. Talhfiak te hial kan lo chelek a nih pawhin, 'pangang' atanga 'phêngphehlep' mawi taka an chan theih nâna puitu nihna thinlung i bosal lo vang u.

Tute emaw chu sual tiin kan lo hmu pangang viau thin a ni mahna, phêngphehlep mawi tak i hmuh hmaih lo vang u. Tanpuitu nge kan nih hmusit tu? Khawngaihtu nge kan nih hliamtu? Vawiina pangang tihbaiawm tak hi nakinah phêngphehlep niin ka tân mawi taka thla zâpin a rawn thlawk chhuak leh ang tih ring ila, a theih ngei a ni tih i theihnghilh ngai lo vang u.