Mizorama tlawngai pawl hmasa Standing Helper Association (STA)

Rinngaia Colney - Oct 23, 2022

Tunhma-in Mizoram-ah ram leh hnam hmasawnna ngaihtuahin mithiam hmasa te leh kan hnam tana thahnemngai te chuan Pawl (Association) din ngaituahin hma an la a, chung pawl te chu thatna pawh an nei ngei niin a lang

Kum 1929 Thingtam leh minpui kum a ni. Mizoram pawh heng te avang hi a ni mai thei e, Harhna chu kum 1930 hnuah chuan a lo chuai tan ta deuh a, Chutia Harhna an chuai mek lai chuan kum 1934 kumtirah Aizawl kiang Hlimen khua chu nasa deuhin an hlim ta tlat a ni. (Rev. Liangkhaia 'Harhna thu' phek 53-56) 

Hlimsang Harhna : Thlarau rui, an rui chhulh mai a ni, Vantawng, van zai, tawng hriatloh in an inbia a, Pathian pawh an bia a, Pathian pawhin a rawn bia a, Tawnghriatloh leh zai te, vei zawngin an lam kual mup mup - Tin Pen-thum lamin an lam a, a lo chhuahna bul a ni.

Upa Vawmphunga in ah Krismas hmang zo lungleng leh khawhar zualte chu Ni 30, December, 1933-ah chuan an lengkhawm a, kum 1934 kum lo thar tur chu an urlawk tel bawk a ni. Chutia lungleng taka an zai tleng tleng lai chuan chawhnu dar 2:00 bawr velah Pu Chawnga, Vawmphunga pa chu choka lam atangin a lo chhi a, thawmdang lam tak mai a hria, vansangah ri veng veng a hria, a lo hnai zel a, inchung zawn a lo thlen chuan zaikhawmho chu an ri ta huk mai a ni. An te chhuak ta teng tung mai a ni. He harhnaah hian nula leh tlangvalte rilruah mi te tanpui duhna in hmun a chang lian hle. Tlawmngai pawl "Standing Helper Association' an din ta a, an tangkai hle. YMA leh pawl dang a la ding lo.

Pu Liansiama (Upa) leh Pu Rokunga (Upa) ten Mission Press-ah hna an thawk a, an Zosap te leh an thian te bulah an pawl din tangkaizia ha hipin an sawi thin. Sailo lal - Lasavunga khua Hlimen (1812-1824) - ah Vanapa pawhin tlawmngaihna kawngah bul tha taka a lo tanna hmun a ni, tih te chu mithlaah a lo lang uai uai mai a ni.

Kristian Tlangau ka bihchhuahna lama Pu Lianhnuna 'Standing Helper Association Secretary article hi ka chhiar hlauh mai a, tunlai tawngin hei ka suan lut ta a ni.
SHA (Standing Helper Association) Hlimen-ah

Tunhma-in Mizoram-ah ram leh hnam hmasawnna ngaihtuahin mithiam hmasa te leh kan hnam tana thahnemngai te chuan Pawl (Association) din ngaituahin hma an la a, chung pawl te chu thatna pawh an nei ngei niin a lang a, chungte chu heng te hi an ni a.
BSA - Boy Scout Association
YLA - Lushai thatna ngaihtuah pawl
IBRA - Bible chhiar pawl
RCS - Kros sen pawl
LSA - Lushai Zirlai pawl
SHA - Tanpuitu pawl

Heng pawlte hi an mahni kawng theuhah chuan tih tur tha tak tak tihna kawng remchang tak a ni a; thenkhatte chu phaituala pawl dingnghet sa leh dan tha tak neia hun rei tak lo awm tawh te an ni a. BCS leh RCS te phei hi chu khawvel huap an ni. Pawl dangte erawh hi chu mahni ram emaw, mahni awmna khua emaw atana a ni a. Tuna ziah ka tum SHA hi a awmzia chu hetiang hi a ni a ;-

Kan khuaah harhna a lo awm a, chutah chuan nula leh tlangvalin Pathian rawngbawl an lo chak a, an ngaihtuah naah Kohhran rawngbawlna atan Boy Scout ang pawl din tha in an ring a, chutichuan SHA chu kan din ta a, December 2, 1934 khan.

Hruaitu tur mi 10 kan thlang a, chumi pawl Committee chuan he pawl hi a vawng a ni ber. Thla tin inkhawmna kan nei a, chutah chuan committe rorel chu puanchhuah a ni thin a, Inkhawm erawhchu Pathian thu hril na leh hnam hmawsanna thu sawina atan kan hmang a ni ber. He pawlin a thil tih te chu hengte hi a ni - A hmasa berin thawhlawm kan khawn a, a bulatanna atan Kohhranin Rs. 5/- min pe a, chuti chuan In tinah kan thil tum te hrialhfiah zelin thawhlawn kan khawn a, Rs. 5/- emaw lai kan ngah a.

Rs. 10/- lai kan lo nei ta a, chu chuan kan zingami tanpui ngaite chu kan tanpui bawk a, chu chauh ni lovin kumtin thing phurhpui kan nei a, a then kan hralh a, a then mi mangang tanpuina atan kan hmang thin a. Tin, huan kan siam bawk a, chutah chuan thlai kan ching a, damlo chawhmeh zawng thei lo te kan pe a, a then a zar chu kan zuar a.

Tin, kan vengah nu pakhat (Thangbawihi) fa 2 nei, ramtuileilo a awm a, SHA hian a In sak sak ila tiin kan rawt a, Kohhranhin a tanpuina atangin kan sak sak ta a. A khawsak bultana atan SHA in thawhlawm a khawn sak a, mi ten tlawmngai takin buhte leh an neih ang apiang ui lovin an pe a, a lawm em em a ni. Khawlai leh inchhung hi a bawlhhlawh em em thin a, a fai a, a lo hrisel theih nan SHA in a theh ang tawkin a bei a, a tifai ber te hnenah fakna leh lawmthu sawina leh ti zel tura fuihna certificate, Mission khawla chhut kan pe zel bawk.

Share now