Thukhawchang

Ram & hnam vanga zirlaite nawrhna kha

Lalthlamuana Ralte - Sep 28, 2014

Ram & hnam vanga zirlaite nawrhna kha

Thangkhat lian dawn lai Aizawl a sorkar laka lungawi lo zirlai inhawrkhawm, district khawpui hrang hrang nghawng khawpa boruak sosang kan hmuh tawh loh hnuah ningani (September 25,2014) khan kan hmu leh ta. Kha thil thleng kha kum 20 dawn kal ta vela college kal rualte tan kha chuan a lunglenthlak phian maithei a; MZP in Mizorama Chakma foreigner chhiarpui nei a, khatih laia an tawngkam takin 'mikhual cham reite' hnawh chhuah an tum hun lai a zirlaite leh sorkar inep nasat thin zia te kha an ngaihtuah let rauh rauh ngei ang. Chuvangin, tun tum chu zirlai movement leh a behbawm vel hi titi nana hman mai mai a chakawm tlat. Mizoram a zirlai movement lo chhuak tawh te kha han chhui let ta ila, ram leh hnam hmangaih vanga lo chhuak a ni deuh vek awm e. Kum engemaw chen MZP tlu chhe tawh 1993 a kaihthawha a awm lehna chhan pawh kha (Tunlai kan buaina ang deuha) Mizoram quota-a MBBS zir tur zinga hnam dang thlan tel an nih duh lo a zirlai rualten beihpui an thlak kha a ni. Sorkar leh zirlai rualte nasa fe a an innawr hnuah sorkar a tlawm ta zawk a nih kha, kha thil thleng avang khan zirlaiten hnam an vei thar a, kum rei tak chhung hnam hmangaihna thinlung muhil tawh chu kaihthawh a ni leh ta, ti zawng pawhin a sawi theih ang. Tichuan zirlai pawl hrang hrang inchhung khawmin MZP a lo tuai thar leh ta a ni. Rambuai reh tawh hnu kum engemaw zat zirlaiten thawm an neih meuh loh chhung khan kan ramah, a bikin khawpuiah hnam dang sumdawng an lo tam hman em em a, chhim lam leh khawthlang lamah phalna nei lo a lo lut ru Chakma leh Tuikuk an pung nasa hman hle bawk. Chuvangin, a hun takah zirlai pawl chak tak kha a lo ding chhuak leh tih loh rual a ni lo. Eng pawh huam ram leh hnam vengtu thalai rual an lo awm takah chuan sumdawnna hmanga min thunun hman tep hnam dangte pawh an insa seng ta zung zung a nih kha. Tunhma atanga a ruka lo pem lut, Chakma foreigner dap chhuah a, hnawh chhuah tumin 1995 atangin zirlaiten hma an la zui a. harsatna hrang hrang kara rim taka zirlai rualten beihpui an thlak kha kan hnam himna atana a lo pawimawh zia hi kan la hre chhuak tulh tulh ang. Sorkar nena inep chang a tam a, zirlai tam takin jail an tan phah a, hliam na tak tuar te an awm a, zirna bahlah phah ta te pawh an awm teuh a ni. Khatih laia zirlai hruaitute thawh rim zia kha thangtharte hian kan hre pha tawh lo ang, document hlui atangin Chakma zinga foreigner leh citizen an thliar hrang a, khaw hrang hrangah an zin kual a. Kum a vei hnuah citizen list an siam ta a, chuta chuang lo, khua leh tui dik tak anga inchhal ngam lo foreigner ni a ngaih Chakma 58673 te chu Mizoram atang hnawt chhuak turin sorkar an ngen zui nghe nghe a ni. Chutiang vel chu rual u zawkte hmalak tawh dan chu a ni. Hmana kan buaina bawk kha tunah kan buaina a lo ni leh ta chiah mai a, Karl Marx-a'n "Thil thleng tawh hi a lo thleng nawn leh thin" a tih ang deuh kha a ni. Chakma vang bawkin zirlaiten hnam tan ke an pen a lo tul leh ta a, tunhma ang bawkin sorkar nen an inep leh a, district khawpui hrang hrangte a kangkai nghal a. Hman ang bawkin zirlaite huaisen taka an han pen chhuah takah chuan mipuiin an thlawp nghal em em a, sorkar chak taka inchhal thin pawh a zam ta mai reng a nih kha. Mi tam ber rilruah party a nghehna aiin Mizona hi a lo chak zawk daih tih a hmuh theih bawk. A nih leh vawiina Chakma chungchanga kan buaina ber hi eng nge ni le? A tawi zawngin sawi ila, zirna lama ram leilung fate chauhin kan chan tur hamthatna sorkarin Chakma leh vai thenkhat a lo pek vang a ni. Kan sorkar hian Mizoram leilung fate (Indigenous people of the state of Mizoram) zingah Chakma leh hnam dang an telh ve ang hialah pawh a ngaih theih ang. Chu tak chu a pawi lai tak pawh a ni reng a ni. Tunhma zawngin Chakma leh hnam dangte hian Mizoram hi an 'homeland' ah an chhal kan hre ngai lo a, an chanchin ziahna leh Bangladesh sorkar laka an harsatna tawh thin khawvel huapa an puanzarna ah pawh Chittagong Hill Tracts khu an ram dik tak anga an chhal thin chu a ni. Anmahni mai bakah Bangladesh sorkar leh sorkar dangte pawhin Chakmate hi indigenous tribe of Chittaging Hill Tracts an ni tih hi an pawmpui bawk. Chutihlai chuan, Chittagong Hill Tracts pumpui hi an ram anga ngaih tur a ni lo a, helai bial history chhui chian phei chuan a neitu tak chu Kuki/Lushai (Mizote) tho kan ni nghe nghe. Engpawhnise, Mizoram luah hmasa bertu kan nih angin Mizote hi ram lei lung fa (Indigenous people of Mizoram) kan ni a, he kan chanvo hi duhsak zawngte hnena pek ve ngawt chi a ni lo. Sapho min awp hnu a lo lut ve chauh Chakma te, Gorkhali te bakah India hnuaia kan awm hnu a kan zinga inbeng bel ta vai hote hi chu kan rama cheng ve an ni mai a, fa tak nihna chang tur an ni lo. Kan buaina ber hi thuneitute tan hian chin fel har tak niin a lang lo reng a ni. A lehlam zawnga thlir chuan Chakmate hi hnam khawngaihthlak zet mai, tunhmaa Pakistan sorkarin detribalisation policy (tlangmite chimral policy) a kalpui avanga tuar nasa em em mai an ni a. Kum 1960 a an chenna Chittagong Hill Tracts a paper mill leh hydro electric project (Kaptai dam) a din avangin chenna in nei lo leh eizawnna nei tawh lo (tuiin a chim pil sak) mi tam tak an raltlan ta a. 1970 chhoah khan Bangladesh sorkarin Chittagong bial tlangram a cheng tribal-te chimral zawng leh an ram chhuhsak zawngin hma a la nasa zual a, phaizawl a cheng bengali nuai li zet chu tlangmite chenna ah hian an pem luhtir a. Tlangmi hnam hrang hrang intel khawm chuan Bangladesh sorkar laka hel pawl Shanti Bahini leh political party JSS (Jana Samhati Samity) an din ta hial a, helai biala hnam tam ber Chakmate chu a khaipa ber an ni nghe nghe. An harsatna tawh avang hian India ramah an rawn ral tlan zel a, Mizorama erawh raltlan an awm ve lo a, a ruka Mizoramah lo lut leh an thlahte an ni hlawm. Kum 1972-a UT dinhmuna hlankai a nih khan pheichham an man a, kan ram chhim lamah Chakma District Council hi a lo piang nawlh mai a nih kha, khawvela an puala an ram neih chhun a ni hial ang. Lo pem lut tam zia hi an population pun dan thlir hian a chiang, inthlahpun vangin heti zat hian a pun theih loh. Hun a kal zel a, chung hun lai vela lo pem lut ho leh an thlahte kal zel chuan vote tam tak an lo nei ta a, kan hruaitute hian Mizoram leilung fa (Indigenous people) emaw a ti ta hial mai a, ram leilung fate hamthatna hial an chan tir a, kan buai zo ta a ni. Engpawhnise, khua kan la tlai chhe lo a, kan hnam himna hi thupui bera kan neih thar leh a hun ta hle mai tih tunhnai thil thleng hian a tarlang chiang hle a ni
Share now