Retheihna hi a huat thla la a, a ngeiawm bawk. Retheih hi a nuam lova, a hrehawm thin. Rilru leh taksa retheihna hi thlan theih a ni lova. "Kumin chu ka lo rethei lawk teh ang, emaw tun thla chu ka hausa thut dawn," ti a thutlukna siam theih chi a ni hek lo. Mi retheite hian an châk leh duh avangin an rethei ngai lova. Duh lo chunga retheihna hian min hmachhawn zawk fo thin. 

Hausakna hi thlan theih pawh a ni bik hek lo. Hausak tuma hausa te erawh an awm mahna le. Miin a nuna thlensan a tum tlat chuan a thleng sang thei. Sap thufing chuan "Tum chuan kawng a awm," a ti a. Chu chu Sap tawngin "Where there is a will, there is a way," tih a ni a. Rilrua tum ruhna chuan rah tha chu a chhuah nge nge a ni. Tumna sang tak nei chuan a bei a, a hlawhtling thin bawk.

Tumruhna hi hlawhtlinna a ni a. Rilrua hausa te chan tur a ni. Chapona rilru hi hausa rilru a ni thei lova. Rilru a hausa te chuan chapona an hnawl ngam tlat a. Tlawmna nun chu rilru hausa thinlung luang liam a ni. Ngilneih­na te, dawhtheihnate, thuhnuai rawlhnate chu thinlunga hausate rah chhuah  duhawm tak chu a ni. Tuna kan sawi mek hi kan Lal Isuan "poor heart" a tih erawh kha chu a ni lo, thinlung rethei a tih hi mi inngaitlawm a sawina ni bawk mah se, mi ngaihtuah awm tak, itsiknaa khat an ni thin. Chungho ngaituahna chu awhnate, chapona te, lungawi theih lohnate, itsikna te, thatchhiatna te, awm mai mai a ei hmuh tum tlatnate chu a ni. 

Mizoramah hian rilrua pa­chhiate hi sawi tur an va tam em! Mahni chan tawka lungawi lo, mi dang te tuarna leh chhiatna  tawmpui thei lo te hi an ni a. Rilru pachhia te hi khawi hmunah  pawh hmuh tur an tam em em a. Rilrua pachhiate hi mi dangte tan an hnawksak duh hle. Thenawm khawvengte tan malsawmna an ni ngai hek lo. Thenawmte  ramri an chuh a, thenawmte neihah an buai a, an insawh, an insawh thin. Ram inchi khat pawh an ui thin zu nia! 

Mi duham tak an ni a, an dawn(received) phawt chuan an lawm a, an lungawi  chuang si lo. An nun khua chu englai mahin a lawm ngai lova, a hlim ngai hek lo. An kalna apiangah neih belh tur an dap a, hmuh belh tur an ngaihtuah thin. Engahmah an lung­awina kim an hmu zo ngai lova, lawmna tak tak an tan  hmuh tur a awm lo a ni ber. 

Sawrkar hnaah lut mah se, an hnaah lungawina an hmu lova, an thawh hlawhah a lawm zo hek lo. Hlawh kham lo reng rengin an hun an hmang zova, eiruk tur an dap ruai a, mi hmingin contract hna an thawk a, mi hmingin 'supply' an ti thin. Sawrkar thil te chu a hawn mai zel a, inthiam lohna pakhat mah an nei ngai lo! Mahse, a lungawi ngai hek lo. A hnaah a lawm zo lova, mi dang hnaah a buai a, mi dang neihah a rilru a tihah si thin. 

Kohhranahte hian rilru pachhe tak tak hmel hmuh tur an va tam em! Pastor zingah mahni chan tawka lungawi lo hmel hmuh tur an va tam sawt ve. Rawngbawlpuite rawngbawlna thik reng thin hmuh tur an va tam sawt em? Pathian ram vei lova, mahni ram vei Beram pu hi engzat tak awm ang maw! Kohhran Upa zingah hlei hlei hian Upa chapo, Upa nun ro, beramte ngaihsak ngai miah lo, mahni hmasialnaa khat hi an tam ngawt  ang, chawlhni kohhran hruaitu, politics leh Pathian thu chawhpawlh nun a nung. Kohhran aia party politics dah pawimawh zawk, politics khelh inthlahrunna reng nei lo mi hi hmuh tur an va tam sawt em! Thil peka thang chak, nun hul si hi phung velh ang maia tam hi hmuh tur an awm nia maw le! 

Sawrkar hnathawk, pensioner sawrkar pawhin a rawih duh tawh loh officer tha pui pui, sum leh nihna duh avanga party politics ruih chilh ta tlat, eng ruai ni tawh lote hian mi dik an tibuai a, an ti mangang zawk thin a ni. Rilrua hausa, felfai tak ni awm a lang, mahse nun ram buai em em te hian politics an ti chhia a, mi thate an hnuk hniam tih reng an hre si lo. 

Thawh hlawha lungawina hmu lo, side income ngaihtuah reng mai thin mihringte hian kan chenna khawvel tui thianghlim an tinû a, hman tlak loh khawpin an ti bawlhhlawh thin a ni. Thianghlim leh felfai bera insawi politician te hian khua leh tui thinlung an chawk buai a. Khua leh tuite nun kawng dik lovah an hruai a, a tawpa chhiatna nasa eltiang a lo thleng thin a ni. Rilru pachhia politician an pung tual tual a, thinlunga rethei an inlar nasa tial tial a. Hengho hian nun cancer, tihdam theih loh natna ril tak a thlen thin a ni. 

Rilrua pachhia leh retheite chuan an chenpuite hmuiah hmarcha thak an tât a, awlsam taka sum hmuh duhna hmarcha an barh a, a tawpa chhungkaw tlachhia a thlen thin a ni.Infiah ila, rilru thianghlim, ngaihtuahna felfai, corruption laka fihlim kan pu em? Rilrua rethei te hian ram hruai lo se. Thinlung pachhiate u, Kohhran hruai suh u. Chuti angin rilru pachhiate leh retheite u, politics bansan rawh u. Ram mipui tan in hnawk hle si a.