Right to Information Act 2005 (RTI Act) hi India-in zalenna a hmuh hnu a Parliament-in dan a siam zinga la tha ber niin an sawi thin a. A chhan chu he dan hian mipui thuneihna a tipung nasa a, hlemhletna dona hriamhrei tha elkhen a ni a, puan hnuai thil hai chhuahna hmanraw tangkai zet a ni bawk a. Politician-te leh sorkar hnathawk pamham tak takte titimtu, mipuiten an dikna chanvo dik tak an hauh theihna a ni bawk. ‘RTI Mipuite Tan’ tih lehkhabu ziaktu Robert Hrangdawla chuan RTI Act a tulna chhan a sawi chu, “Mipuite sorkarna, democracy, hi a hlawhtlin theih nan mipuiten sorkar hnathawh dan an hriat theih a ngai a; chumi atan chuan sorkar hnathawh leh thawh dan chungchang hi thup loh, zep loh, hmuh theih a ngai a, chu chuan mipuite zingah finna leh remhriatna a hring ang. Sorkar hnathawh leh thawh dan lang tlang theia a awm chuan thup leh zep a awm lo ang a, hmuh lai renga thilsual tih a har avangin, thilsual ti pawh an tlem phah anga, dan anga thil tih a tam zawk ang. Chutiang dinhmun siam nan chuan Right to Information Act hi mipuite hman leh inhumhim nan Parliament-in a siam ta a ni,” a ti. He dan ropui tak (a then tan chuan dan sakei ni si) vang hian tunhma lam ai khan sorkara thuneitute hi an fimkhur zual tawh a, eiruk chingte pawh an kimki ta hle tih hnial rual loin a chiang awm e. RTI Act lo zik chhuah dan kawng hi a thuiin a bumboh hle a, mi thahnemngaiten nasa takin an bei a, chutianga tha thlah lo a an buaipui hnuah chuan ram hruaitute an harh chhuak ta a, UPA sorkar laiin parliament-ah RTI Bill pass a ni a, chumi hu lawk kum 2005 October thla atang khan India ram pumah (Jammu & Kashmir tel loin) hman tan a ni ta a ni. He dan hman tan a nih veleh hian mipui thuneihna a pung nghal a, sorkar kalphung fel lo lai leh hmalakna dik lote phawrh chhuah a ni ta chuai chuai a, hmun hrang hrangah thubuai lian tak tak awrh an awm ta nawk a. Chutihlaiin, mi tam takin an chanvo dik tak an chan phah thung a, mipui sum bothlau tur tam tak hmuh let a nih phah bawk. Mizoramah pawh RTI Act kum khat a tlin hma 2006 khan he dan hmang hian Zozam (weekly) chanchinbuin MLA/minister thenkhatte zin/zin loh bill lak dan felhlel a chingchhuak a. MLA eng emaw zatin dawt an bill lak thu a tarlang a nih kha kan la hre awm e. Hmun dangah chuan mipui tana RTI buaipuitu (activist) an awm thin a, kan ramah pawh chutiang anga he dan hmang tangkai a thil dik lo hai chhuak a, huaisen taka corruption dotu - SOSA te, PRISM te, MICLUN te an ding tawh a. An hmalakna avang hian mipui sum chheprel eng emaw zat hailan a ni a, dik lo taka sum luang ral tur venhim a ni a, eiruk chingten thubuai an nei a, sorkar pawh a fimkhur phah hle a ni. Kum 2006 khan RTI activist langsar tak Arvind Kejriwal chuan Asia khawmualpuia chawimawina sang Magsaysay Award a dawng a. A hnu lamah corruption dona kawnga huaisen takin ke a pen zui zel a, politics-a a zuan luh hnuah tunah hian Delhi chief minister a ni ta hial a ni. Keini ramah hian huaisen taka corruption dotute leh thahnemngai taka sorkar khalh ngil tur leh mipuite hamthatna tura beitute (mi mal, pawl leh chanchinbu mite) hian chawimawi an hlawh tawk em le? Ngaihtuah zui tham a ni awm e. RTI Act kan fak viau lai hian kum 10 chuang liam ta chhung khan he dan hi kan hmang tangkai tawk em? tih pawh ngaihtuah tham a ni. Dan tha tak a awm a, a hman tangkai leh tangkai loh chu mipui thu a ni tawh. Kan khawtlang hmasawnna atana sum lokal zat te, step leh tuikhur siamna, lei dawhna, thlaichi semna leh a dang danga sorkar sum hman zat te hi kan ngaihven ngai lo thin a, pawl hminga mi thahnemngaiten an buaipui lo a nih phei chuan sum bothlau leh hlep rukna tam tak a awm tih pawh kan hre lo thin. Mipuiin kan hriat chian tur chu Right to Information Act hi dan dang ang mai mai a ni lo a, sorkar atanga duh zawng hriat theihna hi mipui dikna-chanvo (right) a ni a, chu chanvo chu kan hman tangkai poh leh sorkar inrelbawlna a tha deuh deuh dawn a ni tih hi. India danpuiah khua leh tuiten dikna-chanvo bulpui an nei vek a, chu chu fundamental rights an ti a, zalen taka duh duh sawi theihna te, sakhaw duh ber zawm theihna, leh a dangte hi an chanvo bulpui a ni. Right to Information Act hi he fundamental rights tifamkim zualtu a ngaih a ni a, mipuite hnenah chanvo sang tak a pek avangin mipui thuneihna nasa takin a pung a ni. Chuvangin, mipuiten sorkar hnathawh dan leh hmalak dan hriat hi kan chanvo a ni tih hriain RTI Act hi, sorkar khalh ngilna hmanraw tha ber pawl a ni bawk si a, kan hman uar zel a tha a ni. Mahse, a chang chuan sorkar hnathawkte hian RTI Act hmanga thil dil hian harsatna an siam fo thin nia sawi awm thin hi a pawi khawp mai. He danin a phal chin zawhna hi chu a rang thei ang bera chhan mai tur a nih laiin zawhna thenkhat chhan pial daih te, a then chu chhan loh dan an ngaihtuah tlat emaw tih tur te a awm thin. RTI activist politician ni ta Arvind Kejriwal-a’n, Information Officer-te hian zawhna an dawnah a bawplawk a lak tur leh chhuanlam tur an zawn bakah, information pek tur tih khawtlai leh pek loh theih dan an zawng char char, ni a a sawi a kan ramah pawh hian a dik thui viau a ni. RTI Act, 2005-ah hian kum sawm a ral hnuah pawh a taka la hman loh, sorkarin a la tihpuitlin duh rih loh langsar tak a awm a. Chu chu Section 4 hi a ni. Hei hi state dangah pawh an la tihlawhtling hlawm lo a, sorkar laipui pawh hian a la tihhlawhtling bik lo a ni awm e. Section 4-ah chuan sorkar thuneituten an hnathawh chungchang leh an hmalakna chi hrang hrang mipui hmuh theih turin an pholang thin tur a ni. Chutianga sorkar ruahmanna leh hmalakna te, sum hman dan te, sorkar hnathawkte hlawh bi zat, biak pawhna tur number, leh dangte hi zawh kher ngai loin a khat mawi tawkin mipui hmuh theih turin (internet leh thil dang hmangin) an puangzar thin tur a ni. Hei hi tihlawhtling se chuan zawh kher ngai lo a hriat theih a tam dawn a ni.