Mizote Kût ropui ber Chapchar Kût 2025 thupui atan Zonun Zemawi Hawihhawmna thlan a ni a. Hawihhawmna tih hi nungchang tha leh mawi, midangte ngaihsak, midangte tana thil tha tih a, a taka lan tir emaw chet chhuah tih hian a chiang em em a, hawihhawm tih thumal ringawt hi sawi fiah kher ngailo in zofate rilruah chuan a chiangin zonun zemawi lan chhuahna ber a ni. Midang kepna rilru hi a Kristian em em a, midangte tana inpek, midangte ngaihsak, thil tha tih hi zofate nuna bet tlat a ni. Kan kristianna nena inrem thlap hawihhawmna hi kan nitin nunah a takin kan lan chhuah tir tur a ni a, zofate chuan kan pi leh pute atanga kan rochun zonun zemawi hi kan kal san a thiang lo a, changkanna in kan phum bo tur a ni hek lo. Zonun zemawi - Aia upa zah, Tlawmngaihna, Rinawmna, Hawihhawmna leh adt hi changkan sân chi a ni lo.

Changkanna leh awlsamnain min luh chilh hneh tawh hle a, kan pi leh pute khân zonun zemawi nun pui lo ta se, kan ram hi nuam kan ti ang em? Kan vanneih zia hi chhut nawn fo tur kan ni. Khawvelin hmasawnna leh changkanna a zawh mêk zel a, eizawnna leh zirna avang te leh tulna hrang hrang avangin kan ram kan kal san a tul chang te a awm thin, kan ram pel a, kan zin chhuah changa kan haw châkna ber chu kan ram bawk a ni. Pu Rokunga (fam) in "Kan Zotlang Ram Nuam", tiin kan ram nawmzia hla thuin a phuah a, ramdang kan zin changin mi thenkhat chuan kan ram sit zawngin kan iak fo thin a, kan zotlang ram nuam kan ti tak nâng a, kan zotlang ram nuam aia nuam leh mawi hi a lo tam tiin an sawi fo thin zuk nia! 

Kei zawng he kan ram, kan pi leh puten lu chhum ban chhum huam a, an sah zau aia nuam hi ka hmu lo! He kan ram riangte hi Pu Rokunga khân, "Hei ang ram nuam reng hi ram dang awm ve maw;" tiin a lo phuah a nih kha... A ram nawmna a hmu fuh a, he kan ram ang, a chhunga chengten zonun zemawi an vawnna ram, an pi leh pute rochun zonun zemawi an nun chhuah pui avanga  Zoram Nuam an siam hi awm ve tak ang maw? Ram dang mawi leh nuam chu a awm a ni mahna, kan zotlang ram nuam tluktu reng an awm lo'ng e.. A chhunga chengten lungrualna an hma chhuan a, rinawmna leh dikna an pi leh pute atanga an chhawm chu vawn zel an tum a, midangte tana thil tha tih tum tlat rilru pu tu te chenna ram hi zawng ram dang aiin a thlanawm zawk a, midangte kenna rilru put zel tumin sem sem dam dam, ei bil thi thi tiin tun thlengin he zonun zemawi hi an la kal pui asin!

Zonun Zemawi Hawihhawmna hian chhung tin thleng phâk se, kan pi leh puten nunze mawi tak min rochun tir hi hnam dangte zingah lan tir zel ila, kan zingah pawh rinawmna leh dikna in hmun chang zel se, midangte kepna rilru, thil tha tih tum tlatna rilru hi a mawi em em a, a zo em em bawk. Zonun Zemawi Hawihhawmna inzirtir zel hi kan tih mâkmawh a ni a, kan changkanna te, hma kan sawn zelna te hian he nunze mawi hi kal san lo se,  kan hriat reng tur chu hawihhawmna hian mihring nun a ti mawi a, Kristian kan nih ang a, kan nun pui tel tur a ni bawk. Kan eizawnna, sikul kalna, in thenawm khawvenna leh a dang tam takah midangte ngaihsak, nungchang mawi leh rilru tha put zel hian mi hawihhawm kan ni tihna a ni mai. Keimah chauh ka inngaihtuah a, midangte ngaihsak lohna, engahmah ngaih lohna rilru hi a zo zia lo a, kan tih loh tawp tur a ni. Lal Isua zuitu chu mi hawihhawm a ni tur a ni a, a thu a kan hmuh angin mahni aiin midang tha zawkah ruat ila, mahni in dah pawimawh lovin midangte tana nun, midangte tana inpek, eng emaw tala mi tangkai nih tumna rilru hi zonun zemawi hawihhawmna lan tirna vek a ni.

Hawihhawmna hian mi a ti zahawm a, midangte tana inpekna, that chhuah tumna rilru hi zonun zemawi a ni. Mizo Kristian chu a hawihhawm tur a ni a, midangte ngaihdam, midangte kep, midangte ngaihsak hi Lal Isua zui tute tih tur a ni. Mi hawihhawm bula awm a nuam a, a hahdam a, rilru chhe put a theih loh. Kan chunga that chhuah tute hi thatna vekin kan rul let ve thin, chu chu Zonun Zemawi Hawihhawmna a ni. thatna a in lawm tawn nun hi hmuh a nuam a, vawng reng turin leh hawihhawmna nun mawi tak nei turin i inbuatsaih zel ang u.