Aizawl: Tunhnai kum 5 chhungin ramsa in chhiatna hrang hrang a thlen a sorkarin ex-gratia a sum a sen zat chu cheng nuai 63.90 a tling. Hetihlai hian 2003 atanga 2020 thleng khan Mizoram ah ramsa seh leh beih tawk, hliam tuar mi 261 awmin, nunna chan mi 45 an awm.

Environment, Forest & Climate Change (EF&CC) chhinchhiah danin kum 2003-04 a tanga 2019-20 (kum 17) chhung a ramsa vanga nunna chân tam ber kum chu 2019-20 kha niin nunna chan mi 6 an awm a, hemi kum hi ramsa vanga hliam tuar tam ber kum a ni bawk. Nunna chân leh hliam tuar zingah rul chuk an tam ber.

Kum 17 chhungin 2008-09 leh 2014-15-ah te ramsa vanga nunna chan an awm lo a, kum dang zawngah chuan nunna chan an awm.

Tunhnai kum nga, 2015-16 atanga 2019-20 chhungin ramsa vanga nunna chân leh ramsa vanga ramtuileiloa awmte hnenah ex-gratia atan cheng nuai 31 sen a ni a, hliam na tak tuarte hnenah ex-gratia cheng nuai 1.90 sen niin, hliam tenau tuar te ex gratia ah cheng nuai 12 leh ramsain thlai a tihchhiatsakte ex gratia-ah cheng nuai 19 sen a ni.

Ramsa vanga nunna chânte zangnadawmna Rs. 2,00,000 pek thin an ni a, hliam tuarte chu an nat dan azirin ex-gratia pek thin an ni. Hengte bakah hian ramsain thlai hmun a tihchhiat neitute chu an dinhmun azirin sorkarin zangna dawmna a pe thin bawk.