India chu Chandrayaan-3 hmangin thlaa a inkap kai ta a, Indian Space Research Organisation (ISRO)-a scientist-te chuan ni lam an hawi zui leh mek.

Aditya-L1 tia a hming an vuah, India-in ni zir chianna tura tirh chhuah a tum mek boruaklawng hi spaceport lian ber, Sriharikota-ah a awm tawh.

Aditya-L1 boruaklawng hi solar corona leh ni boruak (atmosphere) zir chiangtu tura duan a ni.

Nia thli awm dan pawh thuk zawkin a zir dawn a, nia thli hi khawvela buaipuiawm tak thlen theitu niin leiah chuan ‘aurora’ tia hriat thlentu a ni.

Nakinah chuan he mission hian niin khawvela sik leh sa a nghawng danah pawh thui taka hriat theihna kawngah a tangkai thei dawn nia ngaih a ni.

Boruaklawng hi peih fel vek tawh niin Sriharikota pawh thlenpui a ni tawh a; mahse, Aditya-L1 kah chhuah hun tur hi ni hnih vel hnuah puan a ni dawn tih ISRO chief S Somanath chuan a sawi.

September chawlhkar khatna velah a nih rin a ni a, space agency hian September 2 a tinzawn nia hriat a ni bawk.

Aditya-L1 hi India-in vanthengrenga boruaklawng phurtu a neih len ber, PSLV-in a phurh chhuah a ngai dawn a, km maktaduai 1.5 chuang a thlawk ang.

“Kah chhuah a nih atanga ni 125-ah Lagrange point 1 (L1) a thleng ang a. Hemi hnu thleng hi kan nghak phawt ang,” tiin Somanath chuan a sawi.

Vanthengrengah hian a din theihna tur hmun awl, leihipna inbuktawk awmna hmunah a ding ang a, hei hi tuialhthei a hman tlem zawk theih nana tih a ni.

Heng hmuna awm hi Lagrange Point tih a ni a, a hming hi Italian-French mathematician Joseph-Louis Lagrange-a hming chawia phuah a ni.

ISRO hian space engineering lamah sum pawh a seng hnemin sorkar pawhin space industry-ah hian sum pawh a thap huap hle.

Chandrayaan-3 mission hmang khan India hi khawvel ram zinga thla chhim tawpa tum hmasa ber a ni a. Rs. Vaibelchhe 600 vel sen a ni a, Bollywood movie hlawhtling tak tak eng emaw zat siamna zat a ni.

Aditya-L1 erawh a man a tlawm deuh zawk dawn a, Chandrayaan-3 zahve man pawh a ni phak dawn lo va. Sorkar chuan kum 2019 daih tawhah khan ni boruak zir chianna atan hian Rs. vaibelchhe 378 a lo ruahman tawh a. ISRO hian a man hi hei bak hi sawi engmah a la nei lo.