Ni hnih liam ta maia tam zawk thawn chhuah tum anga insawi siin a khap leh thut avang hian sorkar lakah zawhna a tam hle. 

“Sorkarin Morocco, Tunisia, Indonesia, Philippines, Thailand, Vietnam, Turkey, Algeria leh Lebanon-ah sumdawnna lama palai tirin wheat thawn chhuah tam zawk theihna tur an dap dawn a. Khawvela mamawhna a san mek laiin India chuan kum 2022-23 chhung hian tonne maktaduai 10 tal thawn chhuah a tum,” tiin Ningani mai khan sorkar hian thu a chhuah. 

Tam zawk thawn chhuah tum a nih avang hian lo neitu, sumdawng leh thawn chhuaktute pawh kawmin India wheat chu a thain a rintlak tawk tih miin an hriat theih nana tha taka ti zel turin an ti bawk.

Hei mai a ni lo va, Department of Commerce chuan ram chhunga wheat thar tam - Punjab, Haryana, Madhya Pradesh, Uttar Pradesh leh Rajasthan-a hotu liante pawh tam zawk thawn chhuah dan tur sawipui tuma hma an lak thu an sawi bawk.

Tun hnaia Prime Minister Narendra Modi-a’n Germany a tlawh tum pawh khan khawvela wheat tlakchham a nih mek laiin Indian lo neitute chu a chawmtu ni tura an ke an pen thu a sawi a. “Hun harsaah inpuih a ngaih lai hian India chu a chhanna nih tumin a che chhuak a ni,” a ti.

Hetiang a nih mek laia thawn chhuah khap a nih leh si chuan zawhna a titam ta hle a ni.

India chuan a ram chhunga wheat man sang zel thunun nan ram danga a thawn chhuah thin a titawp lailawk.

Zirtawpni khan thawn chhuah khapna hi a tichhuak a, khapna tihchhuah a nih hmaa man inpe fel tawhte chauh a hnu lamah hi chuan thawn chhuah phal a ni tawh tih sorkar chuan a puang. 

Hetiangte bakah hian ram dang atanga ngenna an dawn pawmsakte chu thawn an ni dawn bawk tih Directorate General of Foreign Trade (DGFT) chuan a tar lang.

Hriattirna tihchhuahah hian sorkar chuan thutlukna hi ‘ram chhunga ei tur kham a awm theih nan leh thenawm ram leh a tam zualte mamawh tur a awm theih nan’ siam a nih thu tar lan a ni.

India hi China dawta wheat thar chhuak tam ber a nih avangin ram tam tak innghahna a ni a, tun hnauai Russia-in Ukraine a rûn avanga Black Sea hnaih ramten an thawn chhuah theih tak loh atang phei chuan amaha innghat hi an tam zual.

Wheat thawn chhuah khapna hi March thlaa ni sa lutuk avanga lo neituten an thlai tam tak an hloh hnu lawa siam a ni a. Sorkar hian April thlaa thil man a sanna 7.79% zet chu thununa tihhniam a tumna a ni bawk.

India hian thawn chhuah a khap hma ni hnih emaw lekah khan wheat khuahkhirh a tum loh thu a lo sawi tawh a, heti thuta a thutlukna a thlak leh si hian zawhna a titam hle.

Sorkar chuan China-in ei tur lam chi thlai tharte a laksak nasa a, thlai thar a chhiat zui bawk si avangin ram chhunga kham tur a awm ngei theih nan hetiang hi ti ta thut niin a insawi. 

Ni sa lutuk avangin wheat thar hi a tlem reng a, February thlaa seng thinah kum nga chhung zet wheat thar tam lamah record siam zawn a nih hnuah kuminah hian tonne maktaduai 111.3 thar beisei a nih laiin maktaduai 105 chauh thar a ni.

DGFT hian hriattirna dang a chhuahah purunsen chi thawn chhuah chu a tizalen ve thung a. “Purunsen chi thawn chhuah hi chhan tha tak avangin restricted category-ah dah a ni,” a ti a. Tun hma zawng chuan phal loh thin kha phal a ni tawh a ni.