ZALEN October 20, 2024 : October 3, 2024 atanga hman tan, Hnahsin Kût chu Zirtawpni zan khan khar a ni ta a, mipuiin an hlutin tlawhtu an thahnem hle.

Champhai leh a chhehvelah hian pangpar chi khat, Hnahsin hi a tam hle a, a bikin New Champhai leh Zotlang inkarah hian a par vul chûk zel a. Hnahsin awmsa bakah mi thahnemngaiten a chi hi lakhawmin kawngpui sirah an theh a, a par vul lai, October thlaah a tum khatna atan kût hi hman a ni.

Hnahsin Kût hi October 3, 2024 khan Adviser to Chief Minister (Finance) TBC Lalvenchhunga chuan Au-i Garden, Champhai zawlah a hawng a. October 18 zan khan Mualnuam-ah khar niin hemi zana khar a nih chhan hi kum khat chhunga thla ên zan ber, ‘super full moon’ a nih vang a ni.

Hnahsin Kût denchhen hian ei leh in tur bakah Mizo thuam chi hrang hrang leh Mizo kutchhuak handloom-te zawrh a ni a, dawr (stall) hrang hrangten an hlawkpui hle niin an sawi.

Hei mai bakah kawng chi hrang hrangin Champhai mai bakah a chhehvel khuaten an hlawkpui hle a. Champhai-a home stay neitu pakhat chuan mikhual an tam avangin riahna chungchangah harsatna a awm phah niin ZALEN a hrilh a. “Hotel, home stay leh riahna hmun zawng zawngte chu a khat hneh hle mai a. Keini pawh Hnahsin Kût denchhen hian kan homestay hi an luah khat deuh reng a, rawn thleng duh hi an tam viau a; mahse, kan thlenna hmunin a daih ngang lo a ni,” a ti.

Champhaia khawsa pa pakhat pawhin, “Kan chhungkhat laina mai bakah thian tha lo kal duh mi eng emaw zat chu thlenna kan hmuh zawh loh avangin an lo kal loh phah hial a. Riahna tur leh thlenna tur hi tun ai hian nei tam ila chuan kut chhim tura lo kal hi tun ai hian an tam leh zual ngei ang,” a ti.

Aizawl leh Champhai inkara hotel siamtu nu pakhat pawhin an beisei aia khualzin veivak an tam avangin an hotel-a thil ei tum thenkhat chu an hnar hial niin a sawi bawk.

Zokhawthar-a police duty-te pawhin Hnahsin Kût hmangtu mi eng emaw zat chu Ril dil tlawhin an kal tih sawiin a bikin a kharni, Zirtawpni leh Inrinni khan tlawhtu an tam zual niin an sawi.

Aizawl atanga Hnahsin Kût chhimtu pa pakhat chuan a beisei aia mipui an tam chu mak a tih hial thu sawiin, “Kût khar zanah hian ka beisei phak aia tam mipui an pungkhawm a, lirthei pawh kal hleihtheih loh khawpin a tam a. Hei hian mipuiten intihhlim leh rilru tihthawven kan lo mamawh hle tih a lantir niin ka hria,” tiin ZALEN a hrilh bawk.

Hnahsin Kût hi Champhai Nature Conservancy bultuma neih a ni a, kût hmanna atan hian mi inphal eng emaw zatin sum leh pai an thawh a ni.